الماتى اكىمشىلىگىنىڭ قىزمەتكەرلەرى كولىكتەرىن ۆەلوسيپەدكە ايىرباستاپ جاتىر. سونىمەن قاتار، اتالعان ترانسپورت ءتۇرىن ساتىپ الۋ ءۇشىن اقشا جيناپ جۇرگەن قىزمەتكەرلەر دە بار دەپ حابارلايدى Stan.kz.

وسى ۋاقىتقا دەيىن الماتى قالاسىنىڭ اكىمى باۋىرجان بايبەكتەن باستاپ ونىڭ قولاستىنداعى 86 قىزمەتكەردىڭ ۆەلوسيپەدپەن جۇمىسقا قاتىناۋدى قولعا الاتىندىعى تۋرالى ايتىلعان بولاتىن. مۇنداعى باستى ماقسات – الماتى قالاسى ەكولوگياسىن جاقسارتىپ، حالىقتىڭ تازا اۋامەن تىنىستاۋىنا جاعداي جاساۋ. مۇنىمەن قاتار، قالا تۇرعىندارىنا ۇلگى بولۋ.

بۇگىندە اكىمشىلىك قىزمەتكەرلەرى تولىقتاي ۆەلوسيپەدكە كوشپەسە دە، اتالعان ترانسپورت ءتۇرىن تاڭدايتىندار قاتارى كوبەيگەن.

ء“وزىڭىز كورىپ تۇرعانداي ارىپتەستەرىمىز ۋاقىت وتە كەلە سالاۋاتتى ءومىر سالتىنا ۇيرەنىسىپ جاتىر. مىناۋ تۇرعان ەكونوميكا باسقارماسىنىڭ توراعاسى ماقسات كاكىموۆتىڭ ۆەلوسيپەدى. اتالعان ترانسپورت تۇرىنە ءوزىم جاقىندا عانا اۋىستىم. ساتباەۆ كوشەسىنىڭ بويىندا تۇراتىندىقتان، ماعان بارىنشا ىڭعايلى. ءتىپتى تۇسكى اس ۋاقىتىندا بالا وتىرعىزاتىن قوسىمشا بولشەگىن ساتىپ الماقپىن. بۇگىن بالامدى بالاباقشاعا الىپ بارامىن دەپ ازداپ كەشىگىپ قالدىم. ويتكەنى ءبىر قولىممەن بالامدى جەتەكتەپ، ەكىنشى قولىممەن ۆەلوسيپەدتى سۇيرەۋىمە تۋرا كەلدى. ۋاقىت وتە كەلە قاتارىمىز كوبەيەدى دەگەن ويدامىن”، – دەگەن اكىمشىلىكتىڭ ءباسپاسوز قىزمەتشىسى ەركەبۇلان كەنجەبۇلاتوۆ جۇمىسقا كەلەتىن بويجەتكەندەردىڭ دە ۆەلوسيپەدكە كوشۋگە دايىن ەكەنىن ايتتى.

مۇنىمەن قاتار، كەي قىزمەتكەردىڭ ۆەلوسيپەد ساتىپ الۋ ءۇشىن اقشا جيناپ جۇرگەنىن ايتتى. ارىپتەستەر ءبىر-ءبىرىنىڭ ۆەلوسيپەدتەرىن دە تانىپ العان ەكەن.

كەي ازامات بىردە قوعامدىق كولىكپەن جۇرسە، ەندى بىردە جۇمىسقا ۆەلوسيپەدپەن كەلۋدى ءجون كورەدى. ولار بارلىعى دا اۋا رايىنا بايلانىستى ەكەنىن ايتادى. اراسىندا ءالى كۇنگە دەيىن كولىكپەن كەلىپ جۇرگەن ازاماتتار دا جوق ەمەس.

بىراق اكىمنىڭ قازىرگە ۆەلوسيپەدپەن جۇمىسقا كەلگەنىن ەشكىم كورمەپتى.

ەستەرىڭىزگە سالا كەتسەك، الماتى اكىمىنەن باستاپ، اكىمدىكتىڭ 86 قىزمەتكەرى ۆەلوسيپەدكە كوشەتىنى تۋرالى حابارلاعان بولاتىنبىز.

Abai.kz