جاقىندا رەسەي دۋماسىنىڭ دەلىقۇلى دەپۋتاتى ۆلاديمير جيرينوۆسكي بەلگيادا بولعان تەرراكتىگە قاتىستى اگرەسسيۆتى مالىمدەمە جاسادى. بەلگياداعى لاڭكەستىك شابۋىلدان كەيىن رەسەيلىك تەلەارنالاردىڭ بىرىندە ءسوزجارىس وتكەن ەدى.

«ۆەچەر س ۆلاديمەروم سولوۆەۆىم» دەپ اتالاتىن تەلەشوۋدا رف دۋماسىنىڭ سپيكەرى، رلدپ-نىڭ ليدەرى ۆلاديمير جيرينوۆسكي بەلگيا استاناسىندا بولعان لاڭكەستىك وقيعاعا قاتىستى پىكىرىن بىلدىرگەن.

وندا رەسەيلىك دەپۋتات بىلاي دەيدى:

«سيريا – ەۋروپا ەمەس. قازىر تەرراكتىلەر ەۋروپادا بولىپ جاتىر. جانە بۇل بىزگە ءتيىمدى. دۇرىس! سولار تەرراكتىگە تۇنشىعا بەرسىن، سولار قۇرىپ كەتسىن.(جيرينوۆسكي ءسوزى جۇمسارتىلىپ الىندى-رەد.) سەندەر ءبارىڭ نەنى كۇتىپ وتىرسىڭدار؟!جەتەر ەندى. ەندى ولار بىزگە كەلسىن. نەگە سەندەر وزدەرىڭدى تومەندەتەسىڭدەر؟!».

ال انشەيىندە ءارتىس بولىپ، ءمانسىز مالىمدەمەلەرىمەن جۇرتتىڭ نازارىن وزىنە اۋدارتۋعا بەيىم دەپۋتاتتىڭ بەيساياسي ءام انتي-كاسىبي سوزدەرىن اينالاسىنداعىلار مۇقيات تىڭداپ تۇرعان.

تەك باعدارلاما جۇرگىزۋشىسى عانا جيرينوۆسكيدىڭ جيىركەنىشتى سوزدەرىنىڭ اراسىندا «قۇداي ساقتاسىن»، «نە دەيدى؟!»، دەگەن قىستىرما سوزدەرىمەن، شوشىنعان كەيىپ تانىتادى.

جيرينوۆسكيدىڭ سالاقۇلاش سوزدەرىنەن كەيىن باعدارمالا جۇرگىزۋشىسى دەپۋتاتتى ستۋديادان قۋىپ شىققان.

-جيرينوۆسكي مىرزا، دەرەۋ ستۋديانى بوساتىڭىز! مەن وسى باعدارلامانىڭ جۇرگىزۋشىسى رەتىندە ۆيتسە-سپيكەردىڭ دورەكى سوزدەرى ءۇشىن ەۋروپا حالقىنان كەشىرىم سۇرايمىن. رەسەي حالقى اتىنان سىزدەردىڭ قايعىلارىڭىزعا ورتاقتاسىپ، كوڭىل ايتامىن،-دەدى جۇرگىزۋشى سولوۆەۆ.

جۇرگىزۋشى ءسوزىن قوستاي جونەلگەن دۋمانىڭ تاعى ءبىر دەپۋتاتى سەرگەي نارىشكين مىرزا بولدى.

«بەلگيا حالقى، ەۋروپا تۇرعىندارى، ءبىز رەسەيلىكتەر سىزدەرمەن بىرگەمىز. قايعىلارىڭىزعا ورتاقپىز. ءبىزدىڭ مەملەكەتتىك دۋماداعى ارىپتەسىمىز ءبىزدى ۇياتقا قالدىردى. ءدال ەرتەڭ، جيرينوۆسكي ماسەلەسى مايشام مەن قارالاتىنىنا ەش كۇماندارىڭىز بولماسىن. دۋما قابىرعاسىندا جيرينوۆسكي مىرزانى مانداتىنان ايىرۋ ماسەلەسى بىرنەشە مارتە قارالعان»،-دەدى سەرگەي نارىشكين.

ال جۋرناليست، «Power Vertical» باعدارلاماسىنىڭ جۇرگىزۋشىسى براين ۋيتمون جيرينوۆسكيدىڭ اۋزىنا ءسوز سالىپ بەرىپ وتىرعان كرەمل قوجايىنى دەپ ەسەپتەيدى.

«جيرينوۆسكيدى جۇرت ساياسي سايقىمازاق رەتىندە تانيدى. دالىرەك ايتساق، ول ويىنا نە كەلسە، سونى ايتا سالاتىن اۋمەسەر ىسپەتتى. نەگىزىندە ولاي ەمەس. جيرينوۆسكي ارنايى وسىنداي وسپادار مالىمدەمەلەردى بەيرەسمي اۋىزبەن ايتۋشى كرەملدىڭ قۇرالى عانا. رەسەيدىڭ بەلگياداعى قايعىلى جاعدايعا ءىش-باۋىرى ەزىلىپ وتىرعانى شامالى. جيرينوۆسكي مەملەكەتتىك دۋما اتىنان سويلەپ وتىر. دەمەك، بۇل رەسەيدىڭ پوزيتسياسى دەگەندى بىلدىرەدى»،-دەيدى.

سونداي-اق، رف دۋماسىنىڭ حالىقارالىق قاتىناستار كوميتەتىنىڭ توراعاسى الەكسەي پۋشكوۆ ءوزىنىڭ «تۆيتتەردەگى» جەكە پاراقشاسىندا بەلگيادا بولعان لاڭكەستىك وقيعاعا قاتىستى پىكىرىن ءبىلدىرىپ: «ازىرگە ستولتەنبەرگ  (ناتو-رەد.) رەسەيلىك قاۋىپ دەگەن ويمەن كۇرەسىپ، لاتۆياعا اسكەرىن توگىپ جاتقاندا، بريۋسسەلدە بومبا جارىلىپ جاتىر»، دەپ جازعان.

سونداي-اق، بەلگياداعى جارىلىستارعا رەسەيدىڭ قاتىسى بولۋى مۇمكىن دەگەن بولجامدار دا جاسالعان.

بريۋسسەلدەگى «Le Soir» باسىلىمىنىڭ جازۋىنشا، بەلگيانىڭ پوليتسياسى مەن ارنايى قىزمەت ماماندارى ەل اۋماعى بويىنشا انتيتەررورلىق وپەراتسيا جۇرگىزگەن. ناتيجەسىندە تەررورلىق ۇيىمدارمەن بايلانىسى بار دەگەن 16 رەسەيلىك ازامات ۇستالعان.

Great job Belgium police, in less then 24hours,16 terrorist has been arrested all Russian citizens!

ەسكە سالايىق، 22 ناۋرىزدا تاڭعى ۋاقىتتا بريۋسسەل اۋەجايىندا ەكى جارىلىس بولدى. بەلگيا بيلىگى جارىلعىش زاتتاردىڭ ءبىرىن ءولىمشى لاڭكەس ىسكە قوسقان بولۋى مۇمكىن دەپ ەسەپتەيدى. ءۇشىنشى جارىلىس مالبەك مەترو ستانتسياسىنداعى ۆاگوندا بولدى. سالدارىنان كەم دەگەندە 34 ادام قازا تاپتى، 300-گە جۋىق ادام زارداپ شەكتى. بريۋسسەلدەگى تەراكتىگە قازاقستاندا تىيىم سالىنعان دايش لاڭكەس ۇيىمى جاۋاپكەرشىلىك الدى.

نۇرگەلدى ابدىعانيۇلى 

Abai.kz