“EXPO 2017”-ءنى ءسىز قارجىلاندىراسىز با، ماماشەۆ مىرزا؟
ىستامبۇلدا تۇركيا قازاقتارى ءۇشىنشى قۇرىلتايى اياسىندا 9 ماۋسىم كۇنى وتكەن دونگەلەك ۇستەل ءوتىپتى. جينالىس بارىسىندا قازاق دياسپوراسىنىڭ ماڭىزدى ماسەلەلەرى تالقىلانىپ، كەلەسى جىلى استانادا وتەتىن دۇنيەجۇزى قازاق قۇرىلتايى دا ءسوز بولعان.
دۇنيەجۇزى قازاقتارى قاۋىمداستىعىنىڭ توراعاسىنىڭ ءبىرىنشى ورىنباسارى تالعات ماماشەۆ قۇرىلتايدىڭ فورماسىنىن بۇرىنعىلاردان باسقاشا فورماتتا بولاتىنىن ايتىپ، اعايىنداردىڭ ۇسىنىستارى بولىپ جاتسا حات جولداسىن دەپتى.
تالعات ماماشەۆ بەسىنشى دۇنيەجۇزى قازاقتارى قۇرىلتايى بيىل، ياعني 2016 جىلى وتپەيتىنىن، “EXPO 2017”-گە بايلانىستى ءبىر جىل كەيىنگە قالدىرىلعانىن ايتقان.
ماماشەۆ سونىمەن قاتار قۇرىلتايعا شەتەلدەردەن 500-دەي قازاق شاقىرىلاتىنىن جانە جاستارعا باسىمدىق بەرىلەتىنىن دە مالىمدەگەن.
ءبىزدى ءبىر سۇراق قانا مازالايدى. “EXPO 2017”-مەن دۇنيەجۇزى قازاقتارى قۇرىلتايىنىڭ اراسىندا قانداي بايلانىس بار؟ جوق الدە، “EXPO 2017”-ءنى تالعات ماماشەۆ باسقاراتىن دۇنيەجۇزى قازاقتارى قاۋىمداستىعى قارجىلاندىراتىن با ەدى؟ جەر-جاھانعا تارىداي شاشىلعان قانداستارىمىزدىڭ باسىن قوساتىن القالى جيىندى “EXPO 2017” ءۇشىن ءبىر جىلعا شەگەرۋ دەگەنىمىز مەملەكەتىمىزدىڭ ساياساتىنىڭ سولقىلداقتىعىن كورسەتپەي مە؟
ءبىز ەڭ الدىمەن ءوز قانداسىمىزدى جارىلقاۋعا ءتيىسپىز. سودان كەيىن عانا جاھاندىق كورمەنىڭ جايىن ويلاماعىمىز قاجەت.
قۇرىلتايدى 2016 جىلى وتكىزىپ، "كەلەر جىلى “EXPO 2017”-گە دە كەلىڭىزدەر" دەپ قۇشاقتى ايقارا اشۋدىڭ ورنىنا جوقتى سىلتاۋ ەتىپ، قۇلىقسىزدىق تانىتۋىمىز شەتتەگى قازاققا قالاي اسەر ەتەدى؟ مۇنى تالعات ماماشەۆ مىرزا ويلادى ما ەكەن؟
ءشارىپحان قايسار
Abai.kz
