بەيسەنبى, 17 قازان 2019
نە كورىپ ءجۇرسىز؟ 5015 0 پىكىر 22 ماۋسىم, 2016 ساعات 12:09

كەشە – دەپۋتات، بۇگىن – سپيكەر، ەرتەڭ – ؟

قر پارلامەنتىنىڭ تومەنگى پالاتاسىنىڭ سپيكەرى بولىپ كەشە عانا دەپۋتات بولىپ سايلانعان، قر پرەزيدەنت اكىمشىلىگىنىڭ ەكس-جەتەكشىسى نۇرلان زايروللاۇلى نىعماتۋلين تاعايىندالدى.

پرەزيدەنت پارمەن بەرىپ، نىعماتۋليندى اتالعان ورىنعا ۇسىنعان بولاتىن. بۇگىن قر پارلامەنتى ءماجىلىسىنىڭ التىنشى شاقىرىلىمىنىڭ پلەنارلىق وتىرىسىندا دەپۋتاتتار ءبىر اۋىزدان نىعماتۋليننىڭ كانديداتۋراسىن قولدادى. ال وسىعان دەيىن سپيكەرلىكتى اتقارىپ كەلگەن زەينەتكەر، اتىراۋ وبلىسىنىڭ ەكس-اكىمى باقتىقوجا ىزمۇحامبەتوۆ رەسپۋبليكالىق «ارداگەرلەر» ۇيىمىنىڭ توراعاسى بولىپ سايلاندى.

ءماجىلىس توراعاسىنىڭ كرەسلوسىنا از عانا ۋاقىت جايعاسقان ىزمۇحامبەتوۆ پرەزيدەنتتەن ء«وز ەركىمەن» وتستاۆكاعا جىبەرۋىن سۇراپتى.

-قۇرمەتتى ارىپتەستەر! مەملەكەت باسشىسىنىڭ شەشىمى بويىنشا،  پرەزيدەنتتىڭ ماعان ارتقان مىندەتىنە جانە سىزدەردىڭ قولداۋلارىڭىزعا يە بولىپ، مەن ءبىراز ۋاقىت ءماجىلىس توراعاسى بولدىم. مەملەكەت باسشىسىنىڭ تاپسىرماسىن ورىنداۋدا ماعان كورسەتكەن سىزدەردىڭ قولداۋلارىڭىز ءۇشىن العىسىمدى ايتامىن. مەنىڭشە ءبىز الداعى ۋاقىتتا دا بىرلەسىپ جۇمىستار اتقاراتىنىمىزعا سەنىمدىمىن. بۇگىن قايتا سايلانعان توراعا مىرزانىڭ جۇمىسىنا ساتتىلىك تىلەيمىن! سىزدەرگە كوپ راقمەت، - دەدى باقتىقوجا ىزمۇحامبەتوۆ.

ەستەرىڭىزگە سالا كەتەيىك، نۇرلان نىعماتۋلين وسىعان دەيىن 2012-جىلدىڭ قاڭتارى مەن 2014-جىلدىڭ ءساۋىرى ارالىعىندا ءماجىلىس سپيكەرى بولىپ قىزمەت اتقارعان بولاتىن. ودان كەيىن پرەزيدەنتتىڭ ىقىلاسىمەن قر پرەزيدەنتى اكىمشىلىگىنىڭ جەتەكشىسى قىزمەتىن 2015 جىلدىڭ مامىر ايىنان باستاپ اتقارعان. سونداي-اق، نۇرلان زايروللاۇلى نىعماتۋلين قاراعاندى وبلىسىنىڭ اكىمى بولدى. كەيىن باس پارتيا (نۇر وتان حدپ) توراعاسىنىڭ ءبىرىنشى ورىنباسارلىعىنا تاعايىندالدى.

نۇرلان زايروللاۇلىنىڭ دەپۋتات بولۋىنا قاتىستى قازاقستاندىق ساياساتكەرلەر ءتۇرلى بولجامدار ايتقان ەدى. نۇرلان نىعماتۋليننىڭ كەشە عانا دەپۋتات بولىپ سايلانىپ، بۇگىن سپيكەر اتانۋىنىڭ استارىندا نە بار؟ اسىرەسە، ءماجىلىستىڭ سپيكەرلىگىنە  نىعماتۋليننىڭ كەلۋى – كوپتەن بەرى ايتىلىپ جۇرگەن «پارلامەنتتىك-پرەزيدەنتتىك باسقارۋ» جۇيەسىنە ءوتۋدىڭ العاشقى قادامى شىعار. نىعماتۋليننىڭ ءماجىلىس توراعالىعىنا كەلۋىنە قاتىستى وسىنداي بولجامدى كوزقاراستار بىلدىرۋدە. ەگەر بولجامدار شىن بولاتىن بولسا، ءماسىموۆتىڭ مىندەتى اۋىسادى ما؟ ءماسىموۆتى ءتاجين اۋىستىرۋى مۇمكىن دەگەن بولجامدار قانشالىقتى شىندىققا جاناسادى؟

نۇرزات توعجان

Abai.kz 

 

 

 

 

0 پىكىر