ءبارى وتەدى. مۇڭ دا، نالا دا، وكپە، رەنىش تە. جانىڭا تۇسكەن جارا جازىلادى، كوڭىلىڭە داق بولىپ جابىسقان اشۋ تارقايدى.

ساعىنىش قانا قالادى. 

ءتۇن مەن تاڭنىڭ تالاسقان ساتىندە كەۋدەڭدى كەرنەپ وياتاتىن ساعىنىش قالادى.

الدى-ارتىڭا قاراتپاي دەدەكتەتىپ، بىرگە جۇرگەن جەرلەردەگى ىزدەردى ىزدەتىپ ساندالتاتىن ساعىنىش قالادى.

ساناڭدا سول ءبىر داۋىستىڭ سەن عانا ەستىگەن ىرعاعىن، سەن عانا سەزە العان كۇيىن جاڭعىرتاتىن ساعىنىش قالادى. 

كوزىڭدى جۇمساڭ، سول جاناردىڭ سەن عانا كورگەن ۇشقىنىن كوكىرەگىڭدە جاندىراتىن ساعىنىش قالادى.

سەن عانا بايقاي العان، سەن عانا سالا الاتىن سول ءبىر قيمىلدى قايتالاتاتىن ساعىنىش قالادى.

سەن عانا كورە العان سول ءبىر كۇلكىنى اڭساتاتىن ساعىنىش قالادى.

سەن عانا بىلەتىن، ساعان عانا ايتىلعان سىرلاردى ەسىڭە سالاتىن ساعىنىش قالادى. 

ءبىر ادامنىڭ ومىرىنە جۇك بولارلىق ورتاق اڭگىمەلەردى قايتا ەسىڭە ءتۇسىرىپ، ءار ءسوزىن قايتالاتىپ، ساعىنباۋعا سەبەپ بولارلىق ءبىر ءسوز ىزدەتىپ تىزبەكتەتەتىن ساعىنىش قالادى.

وسى جەردە ءجۇر-اۋ دەپ ىزدەپ بارعىزاتىن، سىرتىنان كورگەن ساتتە جۇرەگىڭدى شىم ەتكىزەتىن، تەك كورىپ قالماسا ەكەن دەپ قىلپىلداتىپ بەيشارا كۇيگە تۇسىرەتىن ساعىنىش قانا قالادى.

ءسونىپ قالعان شامنىڭ جارىعىن ەلەستەتىپ، اينالا ۇشاتىن ەسالاڭ جىندى كوبەلەككە اينالدىراتىن ساعىنىش قالادى.

سول ساعىنىشتان ارىلعان كۇنى ءوزىڭ بولۋدان قالاتىنىڭدى مويىنداتاتىن ساعىنىش قالادى...

نازگۇل قوجابەكوۆا

Facebook-تەگى پاراقشاسىنان