اشىق اۋكتسيون. كەن ورىندارى ساتىلمادى
ينۆەستيتسيالار جانە دامۋ ءمينيسترى 16 ماۋسىمدا وتكىزەمىز دەپ جوسپارلاعان جەرقويناۋلارىنداعى قازبا-بايلىقتى اشىق اۋكتسيونداعى ساتىلىمعا شىعارا المايتىن بولىپ جاتىر. اتالعان مينيسترلىكتىڭ اشىق اۋكتسيونى وتپەيتىندىگى تۋرالى حابارلاعان Ratel.kz سايتىنىڭ ءتىلىشىسى «قازاقستانعا ەندى ەشكىم قاراجات سالمايدى» دەپ قينالىپتى (قاراڭىز: ۆ كازاحستان دەنگي ۋجە نە ۆكلادىۆايۋت http://ratel.kz/outlook/v_kazahstan_dengi_uzhe_ne_vkladyvajut).
ماۋسىمدا بولىپ قالادى دەپ كۇتىلگەن اۋكتسيونعا قازاق جەرىنىڭ قويناۋىندا جاتقان التىن، كۇمىس، الماس، مىرش، مىس جانە سيرەك كەزدەسەتىن مەتاللدار مەن پوليمەتاللدار كەنى ساتىلماقشى ەكەن. ساتىلىمعا قويىلعان كەن ورىندارىنىڭ قۇنى دا «اقىلعا قونىمدى» بولسا كەرەك. مىسالى، اقمولا وبلىسىنداعى «كومسومولسكي ۋچاستوگى» 9 ملن، 436 مىڭ، ال سولتۇستىك قازاقستان وبلىسىنداعى قويناۋى الماسقا تولى «قاراتال» كەن ورنىنداعى جۇمىستىڭ باستاپقى قۇنى بار-جوعى 600 مىڭ تەڭگە كولەمىندە بەلگىلەنگەن. «وسىنداي كەن ورىندارىن ساتىپ الۋعا ەشكىم تاۋەكەل ەتپەدى. قازاقستاندىق كاسىپكەرلەر اتالعان جەرلەردى ساتىپ العانىمەن يگەرە الماس ەدى. وكىنىشكە قاراي، شەتەلدىك ينۆەستورلار اشىق اۋكتسيونعا قاتىسۋدان باس تارتتى»، - دەيدى سايت ءتىلشىسى.
قازبا بايلىعى ءالى تولىق بارلانباعان كەن ورىندارىنىڭ ساتىلىمعا تۇسە باستاعانىن بۇدان بۇرىن دا وقىرمان قاۋىمعا جەتكىزگەن ەدىك http://abai.kz/post/view?id=5769 . سول العاش وتكەن اۋكتسيوندا باستاپقىدا 2 ميلليونعا باعالانعان قاراعاندىداعى التىنعا باي ناۋرىزباي، التىنساي كەن ورىندارى اۋكتسيون سوڭىندا 280 ميلليون تەڭگەگە باعالانعانىن جازعانبىز.
وسى جايتتاردى كەزەكتى رەت قامتىعان Ratel.kz سايتىنىڭ ءتىلشىسى دە قاراعاندى وبلىسىنداعى مىستوبە كەنورىنى باستاپقىدا 991 مىڭ تەڭگەگە باعالانىپ، اۋكتسيوننىڭ اقىرىندا 240 ميلليون تەڭگەگە ساتىلىپ ەدى دەپ جازادى. الداعى ماۋسىم ايىندا وتەدى دەپ جوسپارلانعان اشىق اۋكتسيوننىڭ جۇمىسشى توبىنا جەتەكەشى ينۆەستيتسيالار جانە دامۋ مينيسترلىگىنىڭ ۆيتسە-ءمينيسترى البەرت راۋ: «اۋكتسيوننىڭ ەندى قاشان بولاتىنى ازىرگە بەلگىسىز. جاعداي جىل سوڭىنداعى ەكونوميكالىق احۋالعا قاراي شەشىمىن تابادى»، - دەيدى.
قىسقاسى، جەردى مەنشىككە جانە شەشەتەلدىكتەرگە ساتۋعا قارسى قازاق حالقىنىڭ نارازىلىق تانىتۋى شەتەلدىك كاسىپكەرلەردى ويعا قالدىرعان سياقتى. البەرتتەر القىنىپ ءجۇرىپ اشىق اۋكتسيونعا سالماق بولعان قازاقتىڭ قازىنالى جەرلەرىنە شەتەلدىكتەردىڭ كەنەتتەن «كوز سۇعىن قاداماي قالۋىندا» وسىنداي ءمان بولسا كەرەك.
