18 مامىر – حالىقارالىق مۋزەي كۇنىنە وراي ۇلتتىق مۋزەي ۇيىمداستىرعان «مۋزەيدەگى ءتۇن» اكتسياسىنا 30 مىڭ ادام كەلدى. قازاقستان مۋزەيلەر تاريحىندا وسىنشا كوپ ادامنىڭ ءبىر مەزگىلدە مۋزەيگە كەلۋى بۇرىن-سوڭدى بولماعان وقيعا. ۇلتتىق مۋزەيدىڭ 2015 جىلعى ۇيىمداستىرعان اتالمىش اكتسياسىنا 23 مىڭ ادام جينالعان بولاتىن.

«مۋزەيدەگى ءتۇن» اكتسياسى – حالىق نازارىن مۋزەيگە اۋدارۋ ءۇشىن جانە قالا تۇرعىندارى مەن قوناقتارىنىڭ بوس ۋاقىتىن ءتيىمدى پايدالانۋىنا جاعداي جاساۋ ءۇشىن ۇيىمداستىرىلادى. قازىر ەلىمىزدەگى كوپتەگەن مۋزەيلەر بۇل شارانى جىل سايىن تۇراقتى تۇردە وتكىزۋدى داستۇرگە اينالدىرىپ كەلەدى.

بيىلعا ۇلتتىق مۋزەيدىڭ «مۋزەيدەگى ءتۇن - 2016» اكتسياسى كوپتەگەن قىزىقتى باعدارلامالاردان تۇزىلگەن بولاتىن. مەرەكەلىك اكتسيا  «جاڭعىرتىلعان جادىگەرلەر» دەپ اتالاتىن كورمەنىڭ اشىلۋىمەن باستالدى. كورمەگە قويىلعان زەرگەرلىك بۇيىمدار، ات ابزەلدەرى، اعاشتان، بىلعارىدان جانە مەتالدان جاسالعان تۇرمىستىق زاتتار، كىلەم-كيىز، قىش جانە فارفور بۇيىمدارى كورەرمەندەردىڭ كوزايىمىنا اينالدى. بۇل بۇيىمداردىڭ بارلىعى ۇلتتىق مۋزەي شەبەرلەرى قايتا وڭدەپ، قالپىنا كەلتىرگەن جادىگەرلەر.

بۇل كۇنى ۇلتتىق مۋزەيدىڭ بارلىق زالدارىنا ەكسكۋرسيا جاساۋ تەگىن بولدى. مەرەكەلىك ءىس شاراعا  ارنايى قوناق رەتىندە شاقىرىلعان ونەر جۇلدىزدارى كەشتىڭ ءسانىن كەلتىرىپ،  كەشتى سالتاناتتى دۋمانعا اينالدىردى. ماسەلەن مايرا مۇحامەدقىزى، دوسىمجان تاڭاتاروۆ، ديماش قۇدايبەرگەن، ەرلان رىسقالي، تامارا اسار، ينديرا راسىلحان، دوس، ەدىل قۇسايىنوۆ باستاعان ونەر ادامدارى مۋزەيگە كەلۋشىلەرگە مەرەكەلىك كوڭىل كۇي سىيلادى.  

سالتاناتتى كەشتىڭ  اشىلۋىندا ءسوز العان ۇلتتىق مۋزەي ديرەكتورى دارحان مىڭباي جالپى مۋزەي سالاسى تۋرالى ايتا كەلە، الەمنىڭ ءار ەلىندە ءوتىپ جاتقان «مۋزەيدەگى ءتۇن» اكتسياسىنا توقتالىپ ءوتتى.

-                     مۋزەي – ءاربىر حالىقتىڭ وتكەنى مەن بۇگىنگى تاريحي-مادەني بايلىعىن  جيناقتاعان ۇلكەن رۋحاني ورتالىق. قازىرگى مۋزەيلەر  وزىق تەحنولوگيالارمەن جاساقتالعان. مۋزەيگە كەلۋشىلەرگە جاڭا قۇرىلعىلاردىڭ كومەگىمەن كونە جادىگەرلەر جونىندە جان-جاقتى مالىمەتتەر الۋعا جاعداي جاسالىپ وتىر. «مۋزەيدەگى ءتۇن» اكتسياسىنىڭ باستى ماقساتى – ساقتالىپ تۇرعان جادىگەرلەردى بۇقاراعا مەيلىنشە كوبىرەك ناسيحاتتاۋ. سول ارقىلى مادەنيەت پەن تاريحتىڭ وركەندەۋىنە ۇلەس قوسۋ. ال، ۇلتتىق مۋزەي اتالمىش اكتسيانى وسىمەن ەكىنشى رەت ۇيىمداستىرىپ وتىر. وتكەن جىلى بۇل شاراعا استانالىقتار مەن قالا قوناقتارىنىڭ ەرەكشە قىزىعۋشىلىق تانىتقانىن كوردىك. 23 مىڭنان استام ادام قاتىستى. بيىل مەرەكەلىك باعدارلاماعا كوپتەگەن وزگەرتۋلەر مەن تولىقتىرۋلار ەنگىزىپ، بارىنشا كورەرمەندەر كوڭىلىنەن شىعاتىنداي جوبالار ۇسىنىپ وتىرمىز. سوندىقتان دا مۋزەيدە وتكىزگەن ۋاقىتتارىڭىز ءماندى، ماعىنالى ءارى كوڭىلدى بولادى دەگەن سەنىمدەمىن، – دەدى د.مىڭباي.

         بۇل كۇنى نەمەرەسىن ەرتكەن اتا مەن اجە، قول ۇستاسقان جاستار، زيالى قاۋىم وكىلدەرىنەن باستاپ قاراپايىم بۇقاراعا دەيىنگى حالىقتىڭ بارلىعى مۋزەي زالدارىن ارالادى. ءار قايسىسى وزدەرىنە ۇناعان باعدارلامالاردى تاماشالادى. بايىرعى سالت-ءداستۇر بويىنشا كيىنىپ، قارۋ جاراعىن اسىنعان باتىرلار مەن ۇلدە مەن بۇلدەگە ورانعان ارۋلاردىڭ كيىم ۇلگىسىن تاماشالاپ، ولارمەن فوتاعا ءتۇستى. التىن ادام، تاقساي حانشايىمى سياقتى تاريحي ەكسپوناتتاردىڭ كيىم ۇلگىسىندەگى «جاندى جادىگەرلەر» مەرەكەگە كەلۋشىلەرگە ەرەكشە اسەر ەتتى. ءبىر سوزبەن ايتقاندا قالا تۇرعىندارى مەن قوناقتارى رۋحاني كۇش الىپ، سەرپىلىپ قايتتى. سىزدە مۋزەيگە كەلىپ رۋحاني كۇش الىپ قايتىڭىز، وقىرمان!

abai.kz