23 جاستاعى اكتەر جانە الماتى ءماسليحاتىنا جاڭادان سايلانعان دەپۋتات اسىلحان تولەپوۆ قازاقستاندىقتاردىڭ سىنىنا جاۋاپ بەردى. تولەپوۆ  Tengrinews.kz تىلشىسىنە بەرگەن سۇحباتىندا جاس ەكەنىن ينتەرنەتتە سىناپ جاتقانداردىڭ سوزىنە سابىرمەن قارايتىنىن ايتتى.

«سىن، كەرىسىنشە، ماعان جۇمىس ىستەۋگە كۇش بەرىپ، شابىتتاندىرا تۇسەدى. مەن ەشكىمگە رەنجىمەيمىن، ءار ادامنىڭ پىكىرىن قۇرمەتتەيمىن. سوندىقتان حالىقتىڭ مەنى بەكەر تاڭداماعانىن سوزبەن ەمەس، ىسپەن دالەلدەگىم كەلەدى. جاس ەكەنىمدى ايتىپ، سەنىم بىلدىرمەگەندەردى دە تۇسىنەمىن. بىراق، قازاقتىڭ تاريحىندا 14 جاستا دا، 20 جاستا دا ۇلى باتىر جانە بي بولعان ادامدار بار. سوندىقتان مەنىڭشە، جاس — باستىسى ەمەس. كوپ جۇمىس ىستەپ، سايلاۋشىلارىمنىڭ سەنىمىن اقتايمىن دەپ ءسوز بەرەمىن»، — دەدى تولەپوۆ.

الماتى ءماسليحاتىنىڭ دەپۋتاتى قىزمەتىندە ول بۇقارالىق سپورت پەن مادەنيەتتى دامىتۋعا، بالالار الاڭىن جابدىقتاۋعا، سالاۋاتتى ءومىر سالتىن ناسيحاتتاۋعا، جاس كاسىپكەرلەرگە جەڭىلدىگى بار جاعداي جاساۋعا جانە ناۋرىزباي اۋدانىنىنىڭ ينفراقۇرىلىمىن جاقسارتۋعا نيەتتى.

«مەن سايلاۋالدى ناسيحات كەزىندە اسفالت توسەيمىن، ەلەكتر توگىن، سۋدى جانە تاعى باسقانى جەتكىزەمىن دەپ ۋادە بەرگەن جوقپىن. سوندىقتان بۇل ۋادەنى ورىنداي الماسام ادامداردىڭ الدىندا ۇيالاتىن ەدىم. بىراق مەن ناۋرىزباي اۋدانىنىڭ تۇرعىندارىنىڭ ماسەلەلەرىن جەرگىلىكتى زاڭنامادا كوتەرىپ، شەشۋدى ۋادە ەتتىم. الدا جۇمىستىڭ كوپ ەكەنىن، ونىمەن قاتار ۇلكەن جاۋاپكەرشىلىكتى تۇسىنەمىن»، — دەدى تولەپوۆ. الايدا ول دەپۋتات قىزمەتىن شىعارماشىلىعىمەن قاتار الىپ جۇرەتىنىن ايتتى.

«قازىرگى ۋاقىتتا مۇسىرەپوۆ اتىنداعى بالالار مەن جاسوسپىرىمدەر تەاترىندامىن. بۇل مەنىڭ نەگىزگى جۇمىسىم، ونى تاستاپ كەتپەيمىن. قازىرگى ۋاقىتتا ەكى جاڭا قويىلىمدى دايىنداپ جاتىرمىز. ازىرشە كينوعا ءتۇسۋ تۋرالى جوسپار جوق»، — دەدى اكتەر.

ەسكە سالايىق، 23 جاستاعى اسىلحان تولەپوۆ №15 سايلاۋ وكرۋگى بويىنشا الماتى ءماسليحاتىنىڭ دەپۋتاتى بولىپ سايلانعان ەدى. ول سايلاۋشىلاردىڭ 73,8 پايىز داۋسىن جينادى.

تولەپوۆ اسىلحان سايلاۋۇلى 1992 جىلدىڭ 21 مامىرىندا اقتوبە وبلىسىندا دۇنيەگە كەلگەن. 1996 جىلى ونىڭ جانۇياسى الماتىعا كوشىپ كەلەدى. 2015 جىلى تولەپوۆ جۇرگەنوۆ اتىنداعى قازاق ۇلتتىق اكادەمياسىن «اكتەرلىك شەبەرلىك» ماماندىعى بويىنشا اياقتايدى. تاەكۆاندودان قارا بەلبەۋ يەگەرى.

رەجيسسەر اقان ساتاەۆتىڭ «جاۋجۇرەك — مىڭ بالا» كينوفيلمىندە باس كەيىپكەر سارتاي باتىردىڭ ءرولىن سومدادى. سونىمەن قاتار، «بالالىق شاعىمنىڭ اسپانى»، «باۋىرجان مومىشۇلى» جانە «رەكەتير-2» فيلمدەرىنە قاتىستى.

Abai.kz