ءاليحاندى قادىرلەۋىمىز كەرەك ەدى عوي... «يۋنەسكو»-نىڭ ءوزى الەمدىك تۇلعا دەپ تانىپ، ادامزات بولىپ الەكەڭنىڭ 150 جىلدىعىن تويلاعالى وتىرعاندا ءبىزدىڭ كەجەگەمىزدىڭ كەرى تارتقانى نە؟ وسى ۋاقىتقا دەيىنگى ۋاعدا، ماجىلىستەگى مامىلە قايدا؟ «دۇبىرلەتىپ تويلاۋ كەرەك» دەگەندى اكىمدىك تە، حالىق تا قوس قولداپ قولداعان. بىراق...

ءاليحان – اس بەرمەسەك الاسارىپ قالاتىن تۇلعا ەمەس. ات شاپتىرۋدى دا شارت دەمەي-اق قويايىق. بىراق، الىس-جاقىننان كەلگەن قوناققا «مىنە، مىناۋ ءاليحان تۋعان جەر» دەپ توپىراعىن كورسەتىپ، «ال ەندى كونفەرەنتسيا» دەپ كوكي سويلەپ، «مىناۋ ەسكەرتكىشى» دەپ ەلىرىپ، «توي وسىمەن ءبىتتى» دەسەك... ۇيات! ءاۋ باسىندا «نۇر وتان» جانىنان قۇرىلعان «ميراس» قوعامدىق ۇيىمىنىڭ وتىرىسىندا وسى ماسەلە تالقىلانىپ، ۇتىمدى ۇسىنىس، ورىندى وي ايتىلعان. جوسپار جاقسى-اق ەدى، ءىس ىرىگەلى تۇر. ءاليحاننىڭ يۋبيلەيى «يۋنەسكو»-عا كەرەك پە؟ 

بۇل توي جالعىز اقتوعاي اۋدانىنىڭ عانا تويى ەمەس ەدى عوي. ءيسى قازاققا ورتاق توي. قاسىم امانجولوۆتىڭ 100 جىلدىق تويى قاراعاندىنىڭ باسىندا باستالىپ، قارقارالىدا تۇيىندەلگەن. الەكەڭنىڭ تويى دا كەم دەگەندە وسى ستسەناريمەن ءوتۋى كەرەك-ءتىن. توي باسى وبلىس ورتالىعىندا، جالعاسى اقتوعايدا بولسا ءساندى ءھام ءماندى بولار ەدى عوي. باياعىدا باتىر بولىپتى-مىس دەپ اتاسىنا ات شاپتىرىپ، ايتىس جاساپ جۇرەتىن قالتالى قازاقتار بار. سولار ءجون بىلسە الەكەڭ الاشتىڭ اتاسى. ارداقتاسىن، قۇرمەتتەسىن! «الاش» ارىستارىنا «يت كورگەن ەشكى كوزدەنىپ» (اباي) قاراۋدى قاشان قويادى ەكەنبىز وسى ءبىز؟!

قولىمىزعا اقتوعاي اۋدانىندا وتەتىن ءىس-شارانىڭ باعدارلاماسى ءتۇستى. «باقساق باقا ەكەن» دەگەندەي، كوڭىلگە كۇپ كىردى. ««يۋنەسكو» تويى ءۇي ىشىندە قالا ما؟» دەگەن سۇراق سىلاڭداپ تۇر. «وتكەنىڭدى ويلاساڭ وسكەنىڭنىڭ بەلگىسى، بۇگىنىڭدى ويلاساڭ وشكەنىڭنىڭ بەلگىسى» دەۋشى ەدى عوي اتا قازاق. ءبىز ايتارىمىزدى ايتتىق، اكىم-قارانىڭ ءىشى ءبىلسىن.

باعدارلاماسى

ءا.بوكەيحاننىڭ 150 جىلدىق مەرەيتويىنا بايلانىستى اقتوعاي اۋىلىندا وتەتىن ءىس-شارالاردىڭ 
باعدارلاماسى.

1 كۇن
(23 قىركۇيەك، جۇما)

18:00 – 19:00 الىستان كەلگەن قوناقتاردىڭ اقتوعاي اۋىلىنا كەلىپ جەتۋى، قارسى الۋ (اققايىڭدار باعى)

19:00-21:30 كەشكى اس (ايفار مەيرامحاناسى)

22:00 – دەمالىس (ايفار قوناق ءۇيى)

2 كۇن
(24 قىركۇيەك، سەنبى)
08:00-08:30 – تاڭعى اس (ايفار مەيرامحاناسى)

08:30 –09:30 تالدى بەيىتكە كەلىپ جەتۋ (شابانباي بي اۋىلدىق وكرۋگى)

09:30-10:00 تالدى بەيىت قورىمىندا قۇران باعىشتاۋ، ارالاپ كورۋ (شابانباي بي اۋىلدىق وكرۋگى)

10:00-10:20 «جەكەجال» قىستاعىنا كەلىپ جەتۋ (شابانباي بي اۋىلدىق وكرۋگى)

10:20-11:00 – «جەكەجال» قىستاعىنداعى قازاقستان رەسپۋبليكاسىنىڭ قورعاۋىنداعى تاريحي ەسكەرتكىش-بەلگىتاستىڭ رەسمي اشىلۋى (شابانباي بي اۋىلدىق وكرۋگى)

11:00-12:00 اقتوعاي اۋىلىنا كەلىپ جەتۋ

12:00-12:30 – ءا.بوكەيحان اتىنداعى جببوم الدىنداعى بيۋستتىڭ اشىلۋى، مۇراجايدى ارالاپ كورۋ (اقتوعاي اۋىلى)

12:30-14:00 – تۇسكى اس (ايفار مەيرامحاناسى)

14:00-14:30 - الاش الاڭىنداعى ء«ۇش ارىس» ەسكەرتكىشىنە، «تاريح تاعىلىمى» ساياباعىنا گۇل شوقتارىن قويۋ (اقتوعاي اۋىلى)

14:30 –15:00 اۋداندىق ارحەولوگيالىق-ەتنوگرافيالىق مۇراجايدى ارالاۋ (اقتوعاي اۋىلى)

15:00-17:30 «الەمدىك تۇلعا ءاليحان بوكەيحان جانە تاۋەلسىزدىك تاعىلىمى» اتتى رەسپۋبليكالىق عىلىمي-تاجىريبەلىك كونفەرەنتسيانىڭ باستالۋى (اقتوعاي اۋىلى، مادەنيەت ءۇيى)

17:30-18:30 - «توقىراۋىن تولقىنى» حالىقتىق ءان-بي ءانسامبلىنىڭ كونتسەرتتىك باعدارلاماسى (اقتوعاي اۋىلى، مادەنيەت ءۇيى)

18:30-19:00 قوناقتاردى شىعارىپ سالۋ

جانات جاڭقاشۇلى
"ارقا اقشامى" گازەتى