جۇما, 22 ناۋرىز 2019
نە دەيدى؟! 3808 0 پىكىر 5 قىركۇيەك, 2016 ساعات 16:03

باقتىقوجانىڭ كەلىنى قايىر سۇراپ ءجۇر

قر پارلامەنتى ءماجىلىسىنىڭ ەگدە تارتقان دەپۋتاتى باقتىقوجا ىزمۇحامبەتوۆتىڭ بۇرىنعى كەلىنى كوشەدە قايىر سۇراپ ءجۇر. ءوزىنىڭ وسىنداي ءحالىن الەۋمەتتىك جەلىدە جاريا ەتكەن ول دەپۋتاتتىڭ بالاسى اليمەنت تولەمەي، قاشىپ جۇرگەنىن جازادى.

ايگەرىم ىزمۇحامبەتوۆا - دەپۋتات باقتىقوجا ىزمۇحامبەتوۆتىڭ ءۇش بىردەي نەمەرەسىنىڭ اناسى ەكەن. ونىڭ ايتۋىنشا، باقتىقوجانىڭ بالاسى قۇمار ويىندارعا اۋەس بولىپتى.  

ايگەرىمنىڭ ايتۋىنشا، ءوزى دە اندا-مۇندا جۇمىس ىستەگەنىمەن، تاپقان تابىسى بالالاردىڭ كەرەك-جاراعىنا جەتپەيدى ەكەن.

ال سوتقا شاعىمدانعانىمەن، ەشقانداي شارا قولدانىلماپتى.

«ۇزىن-ىرعاسى 11 جىل بولدى. بالالارىمنىڭ اكەسى ەشقانداي كومەك كورسەتپەي، قاشىپ ءجۇر. ەشكىمگە جولىعا المايمىن. سوت ورىنداۋشىلارمەن دە، سوت توراعالارىمەن دە جولىقتىرمايدى. ەشتەڭە كومەكتەسپەي تۇر. ءوز بالالارىڭىز ءۇشىن جاۋاپكەرشىلىكتى مويىندارىڭىزعا الىڭىزدار! ونى بىزدەن، ءوز وتباسىنان جاسىرماڭىزدار. مەنىڭ بالالارىمىننىڭ بولاشاعى جارقىن بولعانى كەرەك. ولار جۇرت قاتارلى مەكتەپكە بارۋلارى كەرەك، قوسىمشا ۇيىرمەلەرگە بارۋى كەرەك. ولاردىڭ قازىر بۇعان مۇمكىنشىلىگى جوق. سەبەبى، مەن ءۇش بالامدى اسىراي الماي وتىرمىن. وتىنەمىن، اليمەنت تولەڭىزدەر»،-دەيدى ايگەرىم.

Ratel.kz تىلشىسىنە سۇحبات بەرگەن ايگەرىم، جاس كەزىندە بۇرىنعى كۇيەۋى مەن اكە-شەشەسىنىڭ اراسىنداعى قارىم-قاتىناس كۇردەلى بولعانىن جانە باقتىقوجانىڭ بالاسى اناسىمەن مۇلدە سويلەسپەيتىنىن ايتقان.

-  مەن وسى جىلدىڭ ناۋرىزىندا سوتقا شاعىم ءتۇسىرىپ، اليمەنت تولەۋدى تالاپ ەتتىم. بىراق، سوت شەشىمى ورىندالعان جوق.  زاڭ بويىنشا، ەگەر بەلگىلەنگەن ۋاقىتتان 3 اي كولەمىندە اليمەنت تولەۋدەن قاشىپ جۇرسەڭ، وندا  قىلمىستىق جاۋاپكەرشىلىككە تارتىلاسىڭ.  الايدا ءبىزدىڭ جاعدايدا مۇلدە باسقاشا بولىپ تۇر. مەن ونى تاپپاي ءجۇرمىن،-دەيدى باقتىقوجا ىزمۇحامبەتوۆتىڭ كەلىنى.

باقتىقوجا ىزمۇحامبەتوۆ ءار جىلداردا ءتۇرلى جوعارعى لاۋازىمدى قىزمەتتەردە بولدى. 2006 جىلدىڭ قاڭتارى مەن 2008 جىلدىڭ تامىزى ارالىعىندا قر ەنەرگەتيكا جانە تابيعي رەسۋرستار ءمينيسترى، ونان سوڭ 2008-2012 جىلداردا باتىس قازاقستان وبلىسىندا، 2012-2016 جىلدارى اتىراۋ وبلىسىندا اكىم بولىپ قىزمەت ەتتى. كەيىن باقتىقوجا ىزمۇحامبەتوۆ تومەنگى پالاتانىڭ سپيكەرى لاۋازىمىنا دەيىن كوتەرىلدى. قازىر ءماجىلىس دەپۋتاتى. 

نۇرزات توعجان

Abai.kz

 

 

0 پىكىر