جۇما, 29 ناۋرىز 2024
بىلگەنگە مارجان 4011 0 پىكىر 23 تامىز, 2016 ساعات 11:19

ريو-2016: ەستە قالعان 10 وقيعا

بيىلعى وليمپيادا كوپتەگەن وقىس ءارى كۇتپەگەن وقيعالارعا تولى بولدى. ءبىز ىشىندەگى ەل ەلەڭ ەتكەندەرىن تاڭداپ الىپ، نازارلارىڭىزعا ۇسىنامىز.

ريو وليمپياداسىندا اۋىر اتلەتتەردەن اسقان ءبيشى بولمادى. ولاي دەيتىن سەبەبىمىز، جەڭىستى دە، جەڭىلىستى دە تويلاۋدىڭ ءتۇرلى ءتاسىلى بارىن سول سپورتشىلاردىڭ ارقاسىندا بىلدىك. ءبىزدىڭ نيجات راحيموۆ - 77 كەلىدە وليمپيادا چەمپيونى اتانعان جىگىت. باپكەرى الەكسەي نيمەن بىرگە قۋانعان ءساتى ءبارىنىڭ ەسىندە قالعان بولۋى كەرەك. 

ءبيدىڭ ءتۇبىن تۇسىرگەن كەلەسى اتلەت - كيريباتي مەملەكەتىنىڭ دەۆيد كاتواتوۋ اتتى سپورتشىسى. 105 كەلىدە جاتتىعۋىن ورىنداپ بولعان سوڭ، ونىڭ جاساعان قيمىلى ءبىراز ادامنىڭ ەزۋىنە كۇلكى ۇيىرگەنى راس. 

قۋانىشتى تويلاۋ تاسىلدەرىن ءارى جالعاساق. ءبىز كورمەگەن ەموتسيا قالماعان بولار؟! قۋانىشتى دا، كوز جاسىن دا، اشىنۋدى دا، باپكەرىنىڭ جاۋىرىنىن جەرگە تيگىزگەن ساتكە دە كۋا بولدىق. جاپون بالۋانى ريساكو كاۆاي 63 كەلىدە وليمپيادا چەمپيونى اتانعان ساتتە "ونەرىن" ورتاعا سالعانى بار. جۇرەككە جىلى تيگەن ءسات - قىتاي جۇزگىشىنىڭ سۇيگەنىنە ءسوز سالعان ءساتى. تسين كەي - وليمپيادانىڭ قولا جۇلدەگەرى. ال سۇيگەن قىزى حە تسزى - كۇمىس جۇلدەگەر. جەڭىس تۇعىرىنا شىققان حەگە عاشىعى ۇيلەنۋ تۋرالى ءسوز سالادى. قىز، ارينە، ءبىر اۋىزدان كەلىسىم بەردى. 

زاڭ رۇقسات ەتىپ تۇرسا، جەڭىسكە جەتۋدىڭ مىڭ ءادىسى بار. مۇنى باگام ارالدارىنىڭ سپورتشىسى شونا ميللەر دالەلدەدى. 400 مەترگە جۇگىرۋدەن فينالدا ول التى دۇركىن وليمپيادا چەمپيونىن "شاڭ قاپتىرىپ" كەتتى. جەڭىسكە جەتۋگە ءبىر قادام قالعاندا فينيش سىزىعىنا سەكىرىپ، يىعى الدىعا شىققاندىقتان چەمپيون اتانادى. سەبەبى ول ەرەجەگە قايشى ەمەس قىلىق. 

مايكل فەلپس تاڭ قالدىرۋدان جالىقپايدى. ول وسىمەن 23-رەت وليمپيادا چەمپيونى اتاندى. بۇرىن-سوڭدى مۇنداي كورسەتكىش ەشكىمدە بولماعان. 24-التىندى الۋ جولىندا سينگاپۋرلىق دجوزەف سكۋلينگ كەدەرگى بولدى. بىراق ەلدى ەلەڭ ەتكىزگەنى بۇل ەمەس. وسىدان 13 جىل بۇرىنعى فەلپسپەن تۇسكەن سۋرەتى عالامتوردى جايلادى. ءوزىنىڭ كۋميرىن باسىپ وزىپ، دجوزەف ەلىنە العاشقى التىندى ەنشىلەدى. 

سپورتقا دەگەن شەكسىز ماحابباتى كورەرمەندى تەبىرەنتپەي قويماعان ءبىر اتلەت بار. رەكورد ورناتپاسا دا، چەمپيون بولماسا دا - ەلدىڭ ىستىق ىقىلاسىنا بولەندى. فرانتسۋز يوانن دين 50 شاقىرىمدى سپورتتىق جۇرىسپەن ءجۇرىپ وتۋدەن سايىسقا ءتۇستى. ىشەك اۋرۋى بولا تۇرا، ماقساتىنان تايمادى. ءتىپتى 30 شاقىرىمداي الدىنا جان سالماعان. كەيىن ءالسىز تۇسى سىر بەرىپ، مارەگە سەگىزىنشى بولىپ كەلەدى. 

ادىلەتسىز تورەشىلەرگە تاپ بولعاندار دا كوپتىڭ ەسىندە ۇزاق ساقتالاتىن بولادى. لەۆيت-تيششەنكو كەزدەسۋىندە بۇل تورەشىلەردىڭ جۇمىسىنا بارشا كورەرمەن نارازىلىق تانىتتى. وسى جەكپە-جەكتەن كەيىن نيكيتين-كونلان اراسىنداعى جۇدىرىقتاسۋدا دا جۇمىستارىن دۇرىس ورىنداماعانى ءۇشىن باستارى داۋعا قالعان.  

داۋلى وقيعالارسىز دا وليمپيادانىڭ ء"سانى" كىرمەس ەدى. وليمپيادانىڭ قولا جۇلدەسىن العان 69 كەلىدەگى اۋىر اتلەت يززات ارتىقوۆ جارىستان شەتتەتىلدى. قىرعىز سپورتشىسىنان دوپينگ تابىلىپ، جۇلدەسىن قايتارۋعا تۋرا كەلدى. قانىنىڭ قۇرامىندا تىيىم سالىنعان "ستريحنين" بار ەكەندىگى انىقتالدى. ناتيجەسىندە قىرعىز ەلى ەش مەدالسىز قالدى. 

وليمپيادا تاريحىندا العاش رەت وليمپيادا كوميتەتىنىڭ مۇشەسى تۇرمەگە قامالدى. پاتريك حيكيگە جەمقورلىققا قاتىستى ايىپ تاعىلدى. ول وليمپيادا بيلەتتەرىن ءوز بالاسىنىڭ فيرماسىنا بەرگەن. ال فيرما بولسا، ونى وتە قىمباتقا ساتقان. 71 جاسار حيكي وقيعا ورنىنان قاشۋعا امال جاساعانىمەن، 17 تامىز كۇنى قوناق ۇيىندەگى بولمەسىندە ۇستالادى. بۇگىندە ول ەڭ قاۋىپتى قىلمىسكەرلەر جاتاتىن برازيليانىڭ بانگۋ تۇرمەسىندە. 

دەرەككوزى: aikyn.kz

فوتو: Eurosport.ru, Zimbio.com, AFP

Abai.kz

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1569
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2265
عيبىرات

قايسار رۋحتى عازيز جان

مۇحتار قۇل-مۇحاممەد 3563