برازيليانىڭ ريو-دە-جانەيرو قالاسىندا ءوتىپ جاتقان وليمپيادا ويىندارىندا ادىلبەك نيازىمبەتوۆ كۇمىس جۇلدەگەر اتانعان بولاتىن.

 سول جەكپە-جەكتەن كەيىن ونى جەڭىسىمەن قۇتتىقتادىق. ول قازاقپارات تىلشىسىنە سۇحبات بەرىپ تۇرىپ، تورەشىلەردىڭ وزىنە جاساعان قياناتىن جۇرەگى قان جىلاپ تۇرىپ جەتكىزدى. سودان دا بولار، بىردەن سۇراعىمىزدى كوڭىلىن جۇباتۋدان باستادىق.

- ادىلبەك، كۇمىس تە جامان ەمەس قوي. وسى جۇلدەگە جەتە الماي كەتكەن قانشاما سپورتشى بار. كۇمىسكە رازى ەمەسسىڭ بە؟

- جوق! مەن بۇل وليمپياداعا تەك التىن ءۇشىن كەلگەن بولاتىنمىن. ول ماقساتىما جەتە المادىم. ماعان كۇمىس تاڭسىق ەمەس. لوندوندا العانمىن كۇمىستى. ريوعا التىن ءۇشىن كەلىپ ەدىم. مەن فينالدا كۋبا بوكسشىسىن جەڭدىم عوي. تورەشىلەر مەنىڭ التىنىمدى الىپ قويدى. بۇل قياناتقا قالاي شىداۋعا بولادى، ايتىڭىزدارشى...

- وزىڭە قانشالىقتى سەنىمدى بولعانىڭدى سەزىپ تۇرمىز. بىراق، تورەشىلەر سولاي شەشىم جاسادى. ءبىزدىڭ دە قولدان كەلەر قايىر جوق...

- ءيا، سىزدەردى تۇسىنەمىن. بارىنشا قولداۋ كورسەتتىڭىزدەر. سىزدەر عانا ەمەس، بۇكىل ريو حالقى مەنى قولداعانداي سەزىندىم. سەبەبى، مەن جۇدىرىقتاسىپ ءجۇرىپ زالدان  تەك، «قازاقستان جانە ادىلبەك» دەگەن داۋىستاردى ەستىدىم. وسى داۋىستاردى ەستىگەن سايىن ءوزىمدى قايراپ، العا ۇمتىلدىم. سول ءۇشىن بارىمدى سالدىم. سىزدەردى ۇيالتقىم كەلمەدى. وكىنىشكە قاراي، تورەشى قارسىلاسىمنىڭ قولىن كوتەردى. تاڭ قالدىم.

- بۇل جاعداي وسىعان دەيىن لەۆيتتىڭ جەكپە-جەگىندە دە بولدى. ءوزىڭ كوردىڭ. سەن كۇمانسىز ۇتۋ ءۇشىن قارسىلاسىڭدى قۇلاتۋىڭ كەرەك پە ەدى؟

- ءيا، قۇلاتۋىم كەرەك ەدى. بىراق، ول دا مىقتى بوكسشى. قۇلايتىن بوكسشى ەمەس. ال مەن ونى قۇلاتا الماسام دا، ۇتقانىما سەنىمدى بولدىم. ول ماعان ەشتەڭە ىستەي العان جوق. وزدەرىڭىز كوردىڭىزدەر، قاشىپ ءجۇرىپ الدى.

- سەن 16 جىلدان كەيىن بولات ءجۇمادىلوۆ اعاڭنىڭ ەرلىگىن قايتالادىڭ. بىلەتىن دە بولارسىڭ؟

- ارينە! بىراق، قازىر «ۇستازدان شاكىرت وزعان» زاماندا بۇل كورسەتكىش مەن ءۇشىن تومەن ناتيجە. ول اعام ناعىز التىن ەدى. ول كەزدە قازىرگىدەي بارلىق جاعداي جاسالماعان. مەنى ول كىسىمەن ەش سالىستىرۋعا كەلمەيدى. ءجۇمادىلوۆ اعامىز ناعىز التىن ازامات.

- سەن وزگە ەلدە تۋىپ، قازاق ەلىنە وليمپيادانىڭ ەكى بىردەي كۇمىس جۇلدەسىن سىيلادىڭ. بۇل دا ۇلكەن قۋانىش ەمەس پە؟

- مەن قاراقالپاقستاننان ەرتە كەلدىم. نەگىزگى بالالىق شاعىم وسىندا ءوتتى. سپورت مەكتەبىن دە وسىندا باستادىم. مەن وزگە ەلدە تۋسام دا قانىم قازاق، جانىم قازاق. مەنى قازاق ەلى ەسەيتتى، ءوسىردى، جەتىلدىردى. مەن ەكى كۇمىس ەمەس، ەكى التىن سىيلاسام دا ازدىق ەتەدى.

- وسى جەكپە-جەك وتەردەن بۇرىن قانداي كوڭىل-كۇيدە بولدىڭ؟

- كوڭىل-كۇيىم تاماشا بولدى. دايىندىعىمدى دا وتە جاقسى ەدى. باپكەرلەرىم نە كەرەك، ءبارىن ويداعىداي ۇيرەتتى. الدىن الا قارسىلاسىمدى دا قاتتى زەرتتەدىك. وسال جاقتارىن كورىپ، سولاي جۇمىس ىستەدىم. مەنىڭ ەسەبىم بويىنشا جەڭىس مەنىكى بولاتىن.

- بۇل جەڭىسىڭدى كىمگە ارنايسىڭ ەندى؟

- كۇمىس بولسا دا، ەلىمە ارنايمىن. بيىل تاۋەلسىزدىگىمىزدىڭ 25 جىلدىعى. التىن السام، وسى ايتۋلى مەرەكەگە ارنايمىن دەپ جوسپارلاعان ەدىم. بىراق، ول بيىكتى باعىندىرا المادىم. بارلىق جانكۇيەرلەرىمنەن، حالقىمنان كەشىرىم سۇرايمىن.

- ەندى كەلەسى وليمپيادا ويىندارىنا قاتىساسىڭ با؟

- ول تۋرالى ايتا المايمىن. ەلگە بارىپ، ەس جيىپ الايىق. سوسىن، الداعى جوسپارىمدى مىندەتتى تۇردە سىزدەرمەن بولىسەتىن بولامىن.

- اڭگىمەڭە راحمەت!

دەرەككوزى: inform.kz

Abai.kz