«مەنىڭ قازاقستانىم». كۇنگەيدە وسىنداي تاقىرىپتا ايگىلى كومپوزيتور، ۆالس پاديشاھى ءشامشى قالداياقوۆتىڭ شىعارماشىلىعىن ناسيحاتتايتىن بايقاۋ باستالدى. بيىل 24-رەت ۇيىمداستىرىلىپ وتىرعان ونەر باسەكەسىنە قاتىسۋشىلاردىڭ دا قاراسى قالىڭ. ولاردىڭ تالانتىن 5 ادامنان قۇرالعان قازىلار القاسى تارازىلاپ جاتىر. بۇل تۋرالى otyrar.kz پورتالى جازادى.

سايىستا ۇمىتكەرلەردىڭ ءاندى ورىنداۋ شەبەرلىگى عانا ەمەس، اۋەننىڭ تانىمال انشىلەردەن ۇرلانباۋى دا قاداعالانادى. ساحنالىق كيىمدەر دە ەرەكشە ەسكەرىلمەك. ۇيىمداستىرۋشىلاردىڭ ايتۋىنشا، ءداستۇرلى بايقاۋدىڭ باعدارلاماسىنا ەنگىزىلگەن وزگەرىستەر بۇل عانا ەمەس.

بەرىك جورابەكوۆ، وبلىستىق مادەنيەت جانە حالىق شىعارماشىلىعى ورتالىعى ديرەكتورىنىڭ ورىنباسارى: «بۇعان دەيىن 2 ءاننىڭ ءبىرى ەركىن تاقىرىپ بولىپ كەلسە، ەندىگى جەردە ول پاتريوتتىق ءان بولىپ وزگەردى. بۇل ەل تاۋەلسىزدىگىنىڭ 25 جىلدىق مەرەيتويىنىڭ قۇرمەتىنە وراي ەنگىزىلدى. سونداي-اق، ماراپاتتاۋ ءراسىمى ايگىلى سازگەردىڭ تۋعان جەرى وتىرار اۋدانىندا وتەدى.» 

«مەنىڭ قازاقستانىم» وبلىستىق ءان بايقاۋىنىڭ 1-كەزەڭىنە 100-گە جۋىق ۇمىتكەر قاتىستى. ەندىق سايىستىڭ ەكىنشى كەزەڭى — اقتىق مارە تامىزدىڭ 5-جۇلدىزىندا وتەدى دەپ جوسپارلانىپ وتىر. وعان 29 جاس تالانت جولداما الدى. ال جۇلدەگەرلەر ءۇشىن ارنايى قارجىلاي سىي-تارتۋ تاعايىندالعان.

Abai.kz