وڭتۇستىك قازاقستان وبلىسىندا «مەكتەپكە جول» جالپى رەسپۋبليكالىق قايىرىمدىلىق اكتسياسى باستاۋ الدى. تامىزدىڭ 1-نەن باستاپ قىركۇيەك ايىنىڭ 30-نا دەيىن جالعاساتىن شارا ەل تاۋەلسىزدىگىنىڭ 25 جىلدىعىنا وراي «باقىتتى بالالىق شاق مەكەنى» ۇرانىمەن وتپەك. بۇل تۋرالى بۇگىن وقو ايماقتىق كوممۋنيكاتسيالار قىزمەتىندە وتكەن بريفينگتە وبلىستىق ءبىلىم باسقارماسىنىڭ ءبولىم باسشىسى عاليا ءجۇسىپوۆا حابارلادى. 

از قامتىلعان جانە كوپ بالالى وتباسىلار، جەتىم بالالار مەن اتا-اناسىنىڭ قامقورلىعىنسىز قالعان بالالار ىشىنەن وقۋشىلارعا جاڭا وقۋ جىلىنا دايىندىق كەزەڭىندە كومەك كورسەتۋ جانە الەۋمەتتىك سەبەپتەر بويىنشا بالالاردىڭ مەكتەپكە بارماۋىنىڭ الدىن الۋدى ماقسات تۇتقان اكتسيا سوڭعى سەگىز جىلدان بەرى ءداستۇرلى تۇردە وتكىزىلىپ كەلەدى. 

«وسى 8 جىل ىشىندە رەسپۋبليكا بويىنشا 2 ملن.-نان استام بالاعا جالپى سوماسى 10 ملرد. تەڭگەگە ماتەريالدىق كومەك كورسەتىلدى. ونىڭ ىشىندە، بىلتىر «مەكتەپكە جول» اكتسياسى شەڭبەرىندە ءتۇرلى تاقىرىپتا قامقورلىق اكتسيالارى وتكىزىلىپ، جالپى سانى 21656 بالاعا ماتەريالدىق كومەك بەرىلدى. ونىڭ 12918-نە بيۋدجەت قاراجاتى ەسەبىنەن ءبىر جولعى مەكتەپ جابدىعى بەرىلسە، قالعان 8738 بالاعا بيۋدجەتتەن تىس دەمەۋشىلەر قاراجاتى ەسەبىنەن ماتەريالدىق كومەك بەرىلدى. وبلىس بويىنشا ماتەريالدىق كومەك العان 21 مىڭنان استام وقۋشىعا 230 ملن. تەڭگەگە جۋىق قارجى جۇمسالدى» - دەدى ع.ءجۇسىپوۆا.

بيىل دا جىلداعى ءداستۇر جالعاساتىنىن ايتقان ءبولىم باسشىسى اكتسيا بارىسىندا مەكتەپ جاسىنداعى بالالاردى ءبىلىم ۇيىمدارىندا وقۋمەن قامتۋ، اسىرەسە كۇن كورىسى تومەن وتباسىلاردان شىققان بالالارعا الەۋمەتتىك كومەك كورسەتۋ جونىندەگى ءىس-شارالاردى وتكىزۋ ۇيىمداستىرىلىپ جاتقانىن جەتكىزدى. ول ءۇشىن قوعام قايراتكەرلەرىنىڭ، بيزنەس وكىلدەرىنىڭ قاتىسۋىمەن «بالالارعا بىرگە كومەك بەرەيىك!»، «اۋىل بالالارىنا – مەكتەپكە سىيلىقتار»، «وتباسى وتباسىعا كومەك كورسەتەدى: بالالاردى مەكتەپكە دايىندايمىز!» اتتى قايىرىمدىلىق اكتسيالارىن، مەكتەپ تابالدىرىعىن العاش رەت اتتاعالى وتىرعان بالالارعا ەستەلىك سىيلىقتار تاراتىپ، مەرەكە وتكىزۋ، از قامتاماسىز ەتىلگەن وتباسىلارعا بالالارىن مەكتەپكە دايىنداۋ ءۇشىن ءىرى ساۋدا ورتالىقتارىندا مەكتەپكە قاجەتتى زاتتاردى، وقۋ قۇرالدارىن قابىلداۋعا ارنالعان كونتەينەرلەر ورناتۋ ارقىلى «مەيىرىمدى جۇرەك» اكتسياسىن وتكىزۋ جوسپاردا بار. 

ايتا كەتكەن ءجون، بارلىق دەڭگەيدەگى مەكەمە باسشىلارى، اۋدان اكىمدەرى، ىسكەر ازاماتتار، بەلسەندى توپتار، مەملەكەتتىك قىزمەتكەرلەر، ۇكىمەتتىك ەمەس ۇيىمدار مەن اۋداندىق، قالالىق ءبىلىم بولىمدەرى، مەكتەپ باسشىلارىن جانە بۇقارالىق اقپارات قۇرالدارى وكىلدەرىن اتسالىسۋعا شاقىرىلىپ وتىرعان شاراعا ءسىز دە قاتىسا الاسىز. ول ءۇشىن الداعى ەكى اي كولەمىندە 24-75-25 سەنىم تەلەفونى جۇمىس ىستەيتىن بولادى.

Abai.kz