شاردارالىق شارۋالار گەكتارىنا 85 توننا جۋا ءونىمىن الۋدا. بۇل تۋرالى «Abai.kz» پورتالى «وقو اكىمىنىڭ ءباسپاسوز قىزمەتىنە» سىلتەمە جاساي وتىرىپ حابارلايدى.

شاردارا اۋدانىنداعى جاۋشىقۇم اۋىلى سوڭعى بىرنەشە جىلدىڭ كولەمىندە بىتىك وسكەن جۋاسىمەن جۇرتقا تانىلىپ كەلەدى. گوللانديالىق تاسىلمەن ەگەتىن پياز القابىنداعى باستى ەرەكشەلىك ونداعى قول كۇشىنىڭ بارلىعى تەحنيكا تۇرىمەن الماستىرىلعان. وسىلايشا شارۋالار ارام ءشوپتى وتاۋ، پيازدى قولمەن جەگەنە جاساۋ سياقتى ماشاقاتتاردان ءبىرجولا قۇتىلعان.

سەيدۋللا دوماتوۆتىڭ يەلىگىندەگى «تۇرار» شارۋا قوجالىعى بيىلعى جىلى 30 گەكتار جەرگە پياز تۇقىمىن سەۋىپ، قازىرگى تاڭدا ءونىمدى جيناۋمەن اينالىسىپ جاتىر. ديقانداردىڭ كوڭىلدەرى كوتەرىڭكى، سەبەبى گەكتار ءتۇسىمى 850 تسەنتنەردەن اينالىپ وتىر. ياعني، ءار گەكتاردان 85 توننادان پياز ءونىمىن الۋ دەگەن وتە جوعارعى كورسەتكىش. جاۋشىقۇمنىڭ جۋاسى قازىرگى تاڭدا استانا، اقتوبە، الماتى قالالارىنا  تاسىمالدانىپ، ساۋداعا شىعارىلىپ جاتىر.

ال، اۋدان باسشىلارىنىڭ ۇيىمداستىرۋىمەن اۋىلدان ارنايى بەكەت اشىلىپ، جەرگىلىكتى تۇرعىندارعا ءار كەلىسى 50 تەڭگەدەن جاڭا پياز ونىمدەرى تاراتىلۋدا. بازاردا پيازدىڭ باعاسى 80 تەڭگەدەن ەكەنىن ەسكەرسەك، ارنايى بەكەتتەگى ارزان باعا حالىقتىڭ قالتاسىنا جەڭىل ءتيىپ جاتقانى ءسوزسىز.

سونداي-اق، ناۋقان كەزەڭىندە سوزاق اۋدانىندا ۇشجاقتى كەلىسىمدە كورسەتىلگەندەي، اۋىل شارۋاشىلىعىن دامىتۋ جونىندەگى مەملەكەتتىك «سىباعا»، «التىن اسىق»، «قۇلان» باعدارلامالارى تولىقتاي ورىندالعان. بۇل تۋرالى اۋداندىق اۋىل شارۋاشىلىعى جانە جەر قاتىناستارى ءبولىمىنىڭ باسشىسى اۋباكىر ساحيۇلى جەرگىلىكتى باق وكىلدەرىنە بەرگەن سۇحباتىندا حابارلادى.

ماسەلەن، 2016 جىلدىڭ سوڭىنا دەيىن «سىباعا» باعدارلاماسى بويىنشا 1500 باس ءمۇيىزدى ءىرى قارا مالىن اسىلداندىرۋ كوزدەلسە، جىل باسىنان بەرى جەتى ايدا اسىلداندىرىلعان ءىرى قارا باسى 1538-گە جەتىپ، مەجە 102 پايىزعا ورىندالىپ وتىر. سول سياقتى، «التىن اسىق» باعدارلاماسىنىڭ تاپسىرماسى بويىنشا 2000 باسقا جەتكىزۋ جوسپارى، 230 باسقا ارتىق شىعىپ، 111% ورىندالدى.  ال، مەملەكەتتىك «قۇلان» باعدارلاماسى 300 باس بولىپ بەكىتىلسە، قازىرگى تاڭدا پايىزدىق مەجە 101% قۇراپ وتىر.

ءبىر جىلعا مەجەلەنگەن جوسپاردى جەتى ايدا ورىنداپ ۇلگەرگەن تەرىسكەيدىڭ اۋىل شارۋاشىلىعى ماماندارى جۇمىستار مۇنىمەن توقتامايدى دەيدى. مال باسىن اسىلداندىرامەن دەپ نيەت ەتكەن شارۋالارمەن جۇمىستار ودان ءارى جۇرگىزىلە بەرمەك.

اباي اقپارات