سەنبى, 16 قاڭتار 2021
46 - ءسوز 6369 0 پىكىر 9 قاراشا, 2016 ساعات 14:48

ازىربايجانعا ءتان 12 ەرەكشەلىك

ءازىربايجان تۇرمىسىمەن تىنىستاپ كەلە جاتقانىمىزعا بۇگىن، مىنە، بەسىنشى كۇن. ء«جۇز رەت ەستىگەنشە، ءبىر رەت كور» دەيدى قازاق. «وت قالانىڭ» تۇرعىندارى ەل اڭىز عىپ ايتاتىنداي، شىنىمەن-اق، ءدال ءوزىمىز سەكىلدى قوناقجاي حالىق ەكەن. وعان ءسوز جوق! قوناقجاي ەلدىڭ دارحان پەيىلىن سەزىنە ءجۇرىپ، مىناداي ەرەكشەلىكتەرىن دە بايقاپ، كوڭىلگە ءتۇيىپ قويدىق. 

1. ءازىربايجاندا كەز-كەلگەن ءىس-شارانىڭ ۇيىمداستىرۋ جۇمىستارىنىڭ باسى-قاسىندا تەك قانا ەر ادامدار جۇرەدى ەكەن. اسىرەسە، اۋەجايدان ءبىر ەمەس، ءۇش بىردەي ءازىربايجان ازاماتى وبەكتەپ كۇتىپ العاندا، قوناق قارسى الۋ مادەنيەتىنە ءبىرتۇرلى ءىشىڭىز جىلىپ قالادى ەكەن. قالاي دەگەنمەن، نازىك جاندىلار «وتريادىنانبىز» عوي، پرياتنو...

2. ءازىربايجاننىڭ جاسى دا، جاسامىسى دا «سالام!» دەپ امانداسادى. العاشىندا قۇلاققا تۇرپىدەي ءتيىپ، ەرسىلەۋ ەستىلۋشى ەدى. قازىر قالىپتى قابىلدايمىن...

3. باكۋ كوشەلەرىندە ءتارتىپ قاتال. قاتاڭ تۇردە باعدارشام تارتىبىمەن جۇرمەسەڭىز، جاۋاپكەرشىلىككا تارتىلۋىڭىز بەك مۇمكىن.

4. جوعارىدا اتاپ وتكەنىمىزدەي، ءازىربايجان حالقى كەرەمەت قوناقجاي. اسحاناسى ۇلتتىق تاعام تۇرلەرىنە وتە باي. بىراق، تاعامدارى اششى جانە اسقازانعا وتە اۋىر. مۇمكىن، كاۆكازدىقتارعا بۇل ەڭ جەڭىل اس شىعار. بىراق، قانشا جەردەن بەشبارماق جەپ وسسەك تە، ءازىربايجان اسحاناسىن اسقازانىم ءالى قابىلداماي كەلەدى...

5. ءازىربايجان كوشەلەرىن ارالاي قالساڭىز، فاس-فۋدتان كوز اشپايسىز. اسىرەسە، دونەرگە دەگەن سۇرانىستارى ايرىقشا ەكەن. 

6. كاسپي تەڭىزىنىڭ جاعالاۋىندا ورنالاسقاندىعىنا قاراماستان، باكۋ حالقى تەڭىز تاعامدارىنا قاتتى اۋەس ەمەس كورىنەدى. «بالىققا قارىق بولامىن-اۋ» دەپ بارعان نيەتىمىز ازىرگە ناتيجەسىز...

7. سودان كەيىن ءبىر تاڭعالعانىم، بۇل ەل ءسۇت تاعامدارىمەن اسا دوس ەمەس كورىنەدى. داستارحاننان بىرەن-ساران سىر، برىنزا تۇرلەرىن ۇشىراتپاساڭىز، ايران، ىرىمشىك، يوگۋرت، ءسۇت قوسىلىپ دايىندالعان بوتقانى تەك تۇسىڭىزدە عانا كورەسىز.

8. ەسەسىنە، مۇندا تاماقتاناتىن جەرلەردىڭ بارلىعى دەرلىك عيماتارتتىڭ ەڭ جوعارعى قاباتىنان ورىن العان. قالانىڭ سۇلۋلىعىنا، تەڭىزدىڭ تاڭعاجايىپ كەلبەتىنە بيىكتەن كوز تىگىپ، تامسانا وتىرىپ اس ىشەسىز. ماعان، ءازىربايجاننىڭ وسى ءداستۇرى قاتتى ۇنادى.

9. ءازىربايجاندار مەيرامحانا مادەنيەتىنە، عيماراتتىڭ ارحيتەكتۋراسى مەن ديزاينىنا قاتتى ءمان بەرەدى. ستيليزاتسياسىنان ۇلتتىڭ ءيىسى اڭقىپ تۇرادى. تاماقتاناتىن ورىن عانا ەمەس، ءازىربايجاننىڭ بار سالت-داستۇرىمەن تانىستىرۋشى مۋزەي–مەيرامحانا رولىندە قىزمەت ەتەدى ءاربىر اسحاناسى. 

10. سونداي-اق، بۇل مەملەكەتتە اقشا ايىرباستاۋ قيامەتتىڭ قيامەتى. ەگەر ساپارىڭىز سەنبى-جەكسەنبى كۇندەرىنە ءتۇسىپ قالسا، وندا ءتىپتى قيىن. بۇل كۇندەرى بانك ەسىكتەرى تارس جابىق. ال، كوشەدەگى الىپساتارلاردىڭ قولىنان ايىرباستاۋ وتە ءتيىمسىز، ۇتىلىپ قالاسىز. دوللارمەن ەسەپتەسۋدىڭ دە پايداسىنان گورى، زالالى كوپ. ونىڭ ۇستىنە، اقشانى قولدان ايىرباستاۋشىلار ۆاليۋتانىڭ الەمدىك نارىق بەكىتكەن حالىقارالىق تەڭگەرىمى نەگىزىندە ەمەس، كۋپيۋرانى ساپاسىنا، ياعني جاڭا-ەسكى، داق تۇسكەن نەمەسە تازا دەگەن سىڭايداعى كريتەريلەرى نەگىزىندە باعالايدى ەكەن. ال، بۇل تۋريستەرگە تىپتەن ءتيىمسىز. سوندىقتان جۇمىس كۇندەرىنە دەيىن، ءازىربايجان كوشەلەرىن ماناتسىز ء(ازىربايجان ۆاليۋتاسى) ارالاۋىڭىزعا تۋرا كەلەدى. 

11. باكۋدەگى ماعان ەرەكشە ۇناعان نارسە – تاريحي ەسكەرتكىشتەر مەن مادەني ورىنداردىڭ: تەاترلاردىڭ، ساۋدا ورىندارىنىڭ بارلىعىنىڭ ءبىر-بىرىنە وتە جاقىن ورنالاسقاندىعى. جاياۋ ءجۇرىپ-اق، شەتىنەن بارلىعىن ارالاپ شىعۋىڭىزعا بولادى. 

12. سونىمەن قاتار، قالىنىڭ تاكسيلەرى دە وتە ەرەكشە. ءبارى بىردەي كۇلگىن ءتۇستى. ارنايى شاقىرتۋمەن (تارتىپپەن) قىزمەت كورسەتەدى. كوشەدەن توقتاتۋ وتە سيرەك كەزدەسەدى. 

ءازىربايجان ۇلتىنىڭ بۇدان دا باسقا ەرەشەلىكتەرى جەتەدى، ارينە. ونى جازا بەرسە، ۋاقىت تا، شىدام دا جەتپەيدى. باكۋ حالقىنىڭ ازىرگە ءبىز بايقاپ ۇلگەرگەن نەگىزگى ەرەكشەلىكتەرى وسى. قالعانىن، ەسىمە تۇسكەندە، كەيىن جالعاستىرامىن.

نازەركە جۇماباي

Facebook-تەگى پاراقشاسىنان

0 پىكىر