مۇحامەدجان باس ءمۇفتي بولا ما؟
سوڭعى ۋاقىتتا ەلىمىزدە زيالى قاۋىم وكىلدەرى مەن تەرىس ءدىني اعىم وكىلدەرى اراسىنداعى تەكەتىرەس بەلەڭ الىپ بارادى. ارينە، بىزدەر زيالى قاۋىم وكىلدەرى تۇتاس ءوز پىكىرىن اشىق ايتۋعا باتىلدارى جەتىپ جاتىر دەپ ايتا المايمىز، وكىنىشكە وراي. بىراق، قاجەت جەردە سۇيەكتەن وتكىزىپ تۇرىپ ايتىپ جۇرگەن اعالار از ەمەس.
قازىرگى ءتاڭدا دىن سالاسى قوعامنىڭ باستى باس اۋرۋىنا اينالىپ كەتتى. ءدىن ىستەرى جانە ازاماتتىق قوعام ءمينيسترى نۇرلان ەرمەكباەۆ تا «سالافيزيمگە زاڭمەن بۇعاۋ سالماي كۇرەسۋگە بولادى» دەپ ەكىۇداي پىكىر ايتىپ قالدى. ناقتى قانداي شارالار اتقارىلىپ جاتقانى دا بەلگىسىز. ءدىن كوميتەتىنىڭ قايتا سايلانعان توراعاسى عالىم شويكيننىڭ سوڭعى ۋاقىتتا ءبىز كورگەن جالعىز جۇمىسى «كەيبىر مەشىتتەردە ۋاعىز ورىس تىلىندە دە جۇرگىزىلۋ كەرەك» دەگەن باسشىسىنىڭ ءسوزىن الەۋمەتتىك جەلىدە جانۇشىرا قورعاعانى. دۇرىس ەمەس دەمەيمىز. بىراق، كوميتەتتىڭ ناقتى ءسالافتاردىڭ كوسەمدەرىمەن كۇرەسۋگە شاماسى كەلە مە؟ كەلمەسە، ول كوميتەتتەن نە قايىر؟
ايتپەسە، نۇرلان ەرمەكباەۆ تا، ونىڭ قاراماعىنداعى عالىم شويكين دە دەپۋتاتتاردىڭ اراسىندا، نە وزگە دە لاۋازىمدى قىزمەتتەردە وتىرعان، اسىرەسە، قاۋىپسىزدىك سالاسىندا قىزمەت ەتىپ جۇرگەن سالافيتتەردى بىلمەيدى دەپ ويلايسىز با؟ ولاردىڭ اتىن اتاپ، ەل الدىنا شىعارۋعا بۇلار نەگە باتپايدى؟
يا، جاڭا مينيسترلىك پەن ەسكى كوميتەتتىڭ جۇمىسىنا قايران قالىپ وتىرعانىمىزشا، ەل اراسىندا جاڭا شۋ شىقتى. باس ءمۇفتي ەرجان قاجى مالعاجىۇلى الداعى جىلى قىزمەتىنەن كەتىپ، ونىڭ ورنىنا مۇحامەدجان تازابەكوۆ ءمۇفتي بولۋعا تالپىنىپ ءجۇر دەگەن سىبىس شىققالى، قوعام الاڭداۋلى بولدى.
جاقىندا عانا قازاقتىڭ ماڭدايىنا بىتكەن عالىمى، ابايتانۋشى مەكەمتاس مىرزاحمەتوۆ «تازابەكتىڭ ۇيىندە 20 ۋاحابشىمەن باس قوستىم. ولار دەپۋتاتتاردىڭ اراسىندا دا، قاۋىپسىزدىك سالاسىندا دا بار» دەپ اشىق ايتىپ، قالىڭ ۋاحاپشى-ءسالاف بىتكەندى جويماسا، ۇلتقا ۇلكەن قاۋىپ ءتونىپ تۇرعانىن جالپىق جۇرتقا جەتكىزىپ ەدى. ارينە، باۋىرجان مومىشۇلىنىڭ تاربيەسىن كورگەن، بۇگىندە 90-عا كەلگەن ابىز اقساقالعا سەنبەسكە لاجىمىز جوق.
يا، ەل اعالارى ۋاحاپشى دەپ ايىپتاعان ادام باس ءمۇفتي بولعاندا، قازىرگى ءدىني احۋال نە بولار ەكەن… دەگەنمەن، ءبىز ۇزىلمەيتىن ءبىر ۇمىتپەن وسى سالاعا جاۋاپتى قۇزىرلى ورگاندار ەل ءۇشىن دۇرىس شەشىمدى قابىلدايدى دەپ سەنەمىز.
يبراھيم زيارات،
qazaquni.kz
