جەكسەنبى, 24 قاڭتار 2021
ەكونوميكا 2634 0 پىكىر 8 قاراشا, 2016 ساعات 00:00

«جۇمىسپەن قامتۋ-2020 جول كارتاسى» باعدارلاماسىن جۇزەگە اسىرۋ جونىندە دوڭگەلەك ۇستەل ءوتتى

جۋىردا الماتى قالالىق كاسىپكەرلەر پالاتاسىندا «جۇمىسپەن قامتۋ-2020 جول كارتاسى» باعدارلاماسىن جۇزەگە اسىرۋ جانە كاسىبي بىلىكتىلىكتى، مەكتەپ وقۋشىلارىنا كاسىبي باعدار بەرۋدىڭ ماڭىزدىلىعى جونىندە دوڭگەلەك ۇستەل وتكىزىلدى.

دوڭگەلەك ۇستەلگە قاتىسقان ماماندار مەكتەپ وقۋشىلارىنا كاسىپتىك باعدار بەرۋدى مەكتەپ بىتىرەتىن كەزدە ەمەس،  جوعارى سىنىپقا كوشكەن ۋاقىتتان باستاپ قولعا الۋدىڭ ماڭىزدىلىعىنا توقتالدى. بولار بالانى جاسىنان تانىعان قازاق بالاسى ەرجەتپەي-اق بولاشاقتا كىم بولاتىندىعىن بولجاي بىلگەن دەسەكتە، قازىر  جاستارىمىزدىڭ اراسىندا ومىردەگى ءوز جولىن، جانىنا جاقىن ماماندىق تاڭداۋى قيىنعا ءتۇسىپ وتىر.  دوڭگەلەك ۇستەلگە قاتىسقان ماماندار بالالاردىڭ  ماماندىق تاڭداۋلارىنا  اتا-انالارىنىڭ ىقپالى  بارىن ايتتى. سوندىقتان جاسوسپىرىمدەرگە كاسىپتىك باعدار بەرۋ ءىسىن مەكتەپ پارتاسىنان باستاعان دۇرىس دەيدى بۇگىندە جۇمىسسىزدىق ماسەلەسىمەن اينالىسىپ وتىرعان قالالىق حالىقتى جۇمىسپەن قامتۋ ورتالىعىنىڭ قىزمەتكەرلەرى. بۇگىندە كاسىبي بىلىكتىلىگىن ارتتىرۋ مەن  قايتا كاسىبي  دايارلاۋ كۋرسىنا جىبەرىلەتىن جاستاردىڭ كوبى ءوز مامان­دىقتارىنا كوڭىلى تولمايتىنداردىڭ تولىق­تىرىپ وتىرعاندىعىن دا ورتالىقتىڭ جاۋاپتى ماماندارى جاسىرمادى. ماماندىق تاڭداۋ ىسىندە پسيحولوگ ماماندارعا جۇگىنۋدىڭ قاجەتتىلىگى جانە مەكتەپتەگى كاسىبي باعدار بەرۋ ارقىلى جاستاردىڭ ومىرلىك ماماندىعىن تابۋىنا جاردەمدەسۋدىڭ جولدارى تۋرالى ءوز ۇسىنىسىن  ورتاعا سالعان الماتى قالالىق حالىقتى جۇمىسپەن قامتۋ ورتالىعىنىڭ پسيحولوگى ج.تۇرعانوۆانىڭ وي-پىكىرلەرى دوڭگەلەك ۇستەلگە قاتىسۋشىلاردىڭ كوڭىلىنەن شىقتى. ول ءۇشىن جۇمىسپەن قامتۋ ورتالىعى­نىڭ  اۋداندىق بولىمدەرىنىڭ ماماندارى مەكتەپ وقۋشىلارىمەن كەزدەسۋلەر وتكىزىپ، ولارعا «جۇمىسپەن قامتۋ-2020 جول كارتاسى» باعدارلاماسىنىڭ باعىتتارىمەن تانىستىرىپ، قازىرگى ەڭبەك نارىعىنداعى سۇرانىسقا يە ماماندىقتار جونىندە ماعلۇماتتار بەرۋ قاجەتتىلىگى  دە ايتىلدى. دوڭگەلەك ۇستەلگە قاتىسۋشىلار قالامىزداعى بارلىق سالا كاسىبي بىلىكتى ماماندارعا، ءوز ءىسىنىڭ كاسىبي شەبەرى دەگەن مارتەبەگە لايىقتى، باسەكەگە قابىلەتتى  ماماندارعا ءزارۋ بولىپ وتىرعانى جونىندە دە ايتىپ قالدى.  سول سەبەپتى ەلىمىزدىڭ ەرتەڭى ءۇشىن ماماندار دايىنداپ وتىرعان جوعارى جانە ورتا وقۋ ورىندارىنىڭ باسشى­لىعى بولاشاق تۇلەكتەرىنىڭ ءوز ىسىنە لايىقتى مامان بولىپ شىعۋىنا كوبىرەك كوڭىل ءبولۋى كەرەكتىگى ەسكەرىلدى. كەيبىر وقۋ ورىندارى ءوز تۇلەكتەرىنىڭ بولاشاعىنا الاڭداۋشىلىق بىلدىرمەيتىنى، ولاردىڭ جۇمىسقا ورنالاسۋ ماسەلەلەرىنە تالداۋ جۇرگىزبەيتىندىكتەرى سىنعا الىندى.  مامان دايىنداۋ – وتە جاۋاپتى ءىس، سول سەبەپتى وعان بەي-جاي قاراۋعا بولمايدى. ال كەلەر جىلى تەگىن ءبىلىم بەرەتىن كاسىبي-تەحنيكالىق كوللەدجدەر تالاپكەرلەردى وقۋعا قابىلداۋ كەزىندە ەڭبەك نارىعىنداعى سۇرانىس­قا يە ماماندىقتاردى قامتي وتىرىپ، وقىتۋدى قولعا العاندارى دۇرىس دەيدى  دوڭگەلەك ۇستەل باسىنداعى وزەكتى ماسەلەلەر توڭىرەگىندە ءوز ويلارىن ورتاعا سالعان جۇمىسپەن قامتۋ ورتالىعىنىڭ جاۋاپتى ماماندارى.

abai.kz

0 پىكىر