ءماجىلىستىڭ سوڭعى پلەنارلىق وتىرىسىندا «اق جول» پارتياسى فراكتسياسىنىڭ وكىلى مەرۋەرت قازبەكوۆا ۇلتتىق بانكتىڭ توراعاسى دانيار اقىشەۆتىڭ اتىنا اشۋلى حات جولدادى. دەپۋتات فراكتسيا مۇشەلەرىمەن بىرگە ۇلتتىق بانك توراعاسىنا «شەتەلدىك ۆاليۋتالارمەن الىنعان يپوتەكالىق قارىزداردى قايتا قارجىلاندىرۋ باعدارلاماسىن» ادال بورىشكەرلەردىڭ مۇددەسىن قورعاۋ ماسەلەسى بويىنشا جاقسارتۋدى سۇراپ ۇستىمىزدەگى جىلدىڭ 29 شىلدەسىندە جانە 7 قىركۇيەگىندە دەپۋتاتتىق ساۋال جولداعانىن ايتادى.

«سونىڭ ىشىندە ءبىز باعدارلامانىڭ شارتى بويىنشا العان نەسيەلەرىن تولەمەي كەلگەندەرگە دەۆالۆاتسياسىنىڭ بىلتىرعىدان بۇرىنعى كۋرسىمەن قايتا ەسەپتەپ، جەڭىلدىك جاسالعانىن، ال ادال تولەپ كەلگەندەرگە قايتا قارجىلاندىرۋ بۇگىنگى كۋرسپەن ەسەپتەلگەنىن، ءسويتىپ ولاردىڭ قارىزدارى 70-80 پايىزعا ارتىپ كەتكەنىن كورسەتكەنبىز. بىزدىڭشە بۇل ادىلەتسىز، ءتىپتى ازاماتتاردىڭ تەڭدىگىن بۇزىپ، كونستيتۋتسيانىڭ نورماسىن اياق استى ەتىپ وتىر، سوندىقتان جاعدايدى تۇزەتۋىڭىزدى سۇرايمىز» دەگەن ەدىك. بىراق سونىڭ ەكەۋىنە دە ۇلتتىق بانك توراعاسىنىڭ ورىنباسارى و.سمولياكوۆتىڭ قولى قويىلعان جالتارما جاۋاپ كەلدى دەپ رەنىشىن تانىتادى دەپۋتات.       

ساۋالدىڭ توقەتەرىندە دەپۋتات: مۇنداي جاۋاپتى «اق جول» فراكتسياسىنىڭ مۇشەلەرى جاۋاپ دەپ قابىلدامايتىنىن ايتقان. ء«بىز سىزدەن ءۇشىنشى رەت ساۋالىمىزدى قاراپ، نەگىزدەلگەن جاۋاپ بەرۋىڭىزدى جانە دەپۋتاتتاردىڭ ساۋالىنا جالتارما جاۋاپ دايىنداعان قىزمەتكەرلەرىڭىزدى جاۋاپكەرشىلىككە تارتۋىڭىزدى تالاپ ەتەمىز» دەلىنگەن ساۋالدا.

ايتا كەتەتىن جايت، ءماجىلىستىڭ سوڭعى جىلدارداعى تاريحىندا مۇنداي تالاپ بولماعان ەدى. دەپۋتاتتاردىڭ ءبارى جالتارما جاۋاپقا قارسى امال تابا الماي، ءۇنسىز قويا سالاتىن.

پارلامەنت جانە ونىڭ دەپۋتاتتارىنىڭ مارتەبەسi تۋرالى كونستيتۋتسيالىق زاڭنىڭ  27-بابىندا: «دەپۋتاتتىق ساۋال مەملەكەتتiك ورگانداردىڭ لاۋازىمدى تۇلعالارىنىڭ قۇزىرەتىنە كىرەتىن ماسەلەلەر جونىندە تۇسىنىكتەمە بەرۋىن نەمەسە ءوز كوزقاراسىن بايانداۋىن رەسمي سۇراعان دەپۋتاتتىڭ تالابى بولىپ تابىلادى. سۇراۋ سالۋعا جازباشا جاۋاپ بiر اي مەرزiمدە تابىس ەتiلەدi. سۇراۋ سالۋعا قايتارىلعان جاۋاپ پەن ونى تالقىلاۋدىڭ ناتيجەلەرi بويىنشا پالاتانىڭ قاۋلىسى قابىلدانادى» دەلىنگەنىن دە كوپتەگەن لاۋازىمدى تۇلعالار بىلە بەرمەيدى. ەگەر د.اقىشەۆ وسى جولى دا جالتارما جاۋاپ جىبەرسە، دەپۋتاتتار پالاتانىڭ ارنايى قاۋلىسىن قابىلداۋ تۋرالى ۇسىنىس ەنگىزۋىنە تولىق قاقى بار. وندا د.اقىشەۆ مىرزاعا سەنىمسىزدىك كورسەتىلۋى دە مۇمكىن. شىركىن-اي، «اق جول» وسىعان دەيىن بارسا، باستىقتاردىڭ ءبارىنىڭ دە باسى اۋىرىپ، جاۋاپكەرشىلىكتەرى ارتار ەدى.

س.ەلەۋ، ساراپشى  

Abai.kz