بۇگىن وبلىس اكىمى جانسەيىت تۇيمەباەۆ جۇمىس ساپارىمەن سايرام اۋدانىندا بولىپ، بىرقاتار شارۋاشىلىقتاردى ارالاپ كورىپ، اۋداننىڭ تىنىس-تىرشىلىگىمەن تانىستى.

ەڭ الدىمەن، اكىم اۋداننىڭ قايناربۇلاق اۋىلدىق وكرۋگىندەگى «قايىپ-اتا» جشس-نە بارىپ، ەت كومبيناتىن ارالادى. ەت ءوندىرىپ، ونى بۋىپ-تۇيۋمەن اينالىساتىن سەرىكتەستىكتە 30 ادام جۇمىسپەن قامتىلعان. جىلىنا 320 توننا ەت وڭدەۋگە قاۋقارلى كومبيناتتا تاۋلىگىنە 300 باس ءىرى قارا سويىلادى. قوجالىق باسشىلىعى كەلەسى جىلى كاسىپورىندى كەڭەيتىپ، ەت وڭدەيتىن قۇرال-جابدىقتار قويۋ ارقىلى شۇجىق ونىمدەرىن شىعارۋدى جوسپارلاپ وتىر.

شارۋاشىلىقتىڭ ءمان-جايىنا قانىق بولعان ج.تۇيمەباەۆ سايرامعا جاقىن اۋدانداردا بورداقىلانعان ءتورت تۇلىكتى اتالعان ەت كومبيناتىندا سويىپ، جۇمىستى ورتالىقتاندىرۋ تۋرالى تاپسىرما بەردى.

ايتا كەتەيىك، «قايىپ اتا» جشس-ءى مال بورداقىلاۋ الاڭى رەتىندە 2011 جىلى قازىعۇرت اۋدانىنان اشىلعان شارۋاشىلىق. باستاپقىدا 1 مىڭ باس ءىرى قارانى بورداقىلاعان قوجالىقتا بۇگىنگى تاڭدا 3 مىڭ باستان استام مال بار. قىس مەزگىلىنە دەيىن مۇنداعى ءىرى قارانىڭ باسىن 5 مىڭعا جەتكىزۋ جوسپارلانىپ وتىر.

مۇنان سوڭ، ءوڭىر باسشىسى ايتەكە بي اۋىلىنداعى «Dala-frut.kz» جشس-ءنىڭ (Green Land) جەمىس باۋىن تاماشالادى. 100 گەكتاردان استام جەرگە ءۇش جىلدان بەرى الما جانە قارا ورىك جەمىستەرىنىڭ كوشەتتەرى ەگىلگەن. باققا زاماناۋي قۇرال-جابدىقتارمەن جابدىقتالعان  تامشىلاتىپ سۋعارۋ ءادىسى جانە شپالەرلى جۇيە قولدانىلۋدا.

كاسىپورىن بۇگىنگى تاڭدا 1 گا جەر تەلىمىندە «زاماناۋي تەحنولوگيالى سىيىمدىلىعى 10 مىڭ تونناعا دەيىن كوكونىس جانە جەمىس-جيدەك ساقتايتىن قويما» جوباسىنىڭ قۇرىلىسىن باستادى. ونى سوعۋ ءۇشىن كاسىپكەر «بيزنەستىڭ جول كارتاسى 2020» باعدارلاماسىنىڭ سۋسيديالاۋ باعىتى بويىنشا قولداۋ الىپ وتىر. سونداي-اق، بولاشاقتا 7 گا جەرگە قيار مەن قىزاناققا ارنالعان جىلىجاي سالۋدى جوسپارلاپ قويعان.

بۇل رەتتە، ايماق باسشىسى اتالعان قارقىندى باۋدىڭ جۇمىس تاجىريبەسىمەن وزگە دە اۋدانداردىڭ تانىسۋى قاجەتتىگىن العا تارتىپ، مۇنداعى شەتەلدىك كوشەتتەردى ونداعى شارۋالار دا ەگۋى كەرەكتىگىن ايتتى.

جۇمىس ساپارى بارىسىندا جانسەيىت قانسەيىتۇلى جۇمىس تارتىبىندەگى جوسپاردان تىس سايرامنىڭ قارابۇلاق اۋىلىنا قاراستى №81 مەكتەپتە بولدى. ونداعى جىلۋ جۇيەسىنىڭ قانشالىقتى دەڭگەيدە جۇمىس ىستەپ جاتقانىن باقىلاعان اكىم ەلەكتر قۋاتىنىڭ ۇزدىكسىز بەرىلىپ جاتقانىنا كوزىن جەتكىزدى.

اقسۋكەنت اۋىلىنداعى كاسىپكەرلەرگە قىزمەت كورسەتۋ ورتالىعىنىڭ جۇمىسى دا وبلىس باسشىسىنىڭ نازارىنان تىس قالعان جوق. شاعىن جانە ورتا بيزنەستى دامىتىپ، اۋدانداعى كاسىپكەرلىكتىڭ كوكجيەگىن كەڭەيتۋ كەرەكتىگىنە توقتالعان ايماق باسشىسى جۇيەنى وڭتايلاندىرۋدى جۇكتەدى. سونداي-اق، ول ورتالىقتا ءتۇرلى ءىس-شارالار وتكىزۋدى تاپسىردى.

ساپار سوڭىندا ج.تۇيمەباەۆ سايرام اۋدانىنىڭ اكتيۆىمەن كەزدەسىپ، اۋدان باسشىسى سامات ساپارباەۆتىڭ 9 ايدا اتقارعان جۇمىستارىنىڭ بارىسىن تىڭدادى. سايرامنىڭ الەۋمەتتىك-ەكونوميكالىق دامۋ كورسەتكىشتەرى ايتىلعان جيىندا الداعى جىلعا مەجەلەنگەن جوسپار جايى دا ءمالىم ەتىلدى. 

كەلتىرىلگەن مالىمەتتەردى مۇقيات تىڭداعان ءوڭىر باسشىسى بىرقاتار سالالار بويىنشا اۋدان باسشىلىعىنا سىن، ەسكەرتپەلەر ايتتى. اسىرەسە، سايرامنىڭ تازالىق ماسەلەسىنە كوڭىلى تولماعان ج.قانسەيىتۇلى وبلىس ورتالىعى – شىمكەنتكە جاقىن ورنالاسقان اۋدان رەتىندە سايرام اۋدانىن قوقىستان تازارتۋدى جۇكتەدى. سونىمەن بىرگە، جەر قويناۋىن پايدالانۋ جۇمىستارىن رەتكە كەلتىرۋدى تاپسىردى. مەملەكەتتىك باعدارلامالاردىڭ ورىندالۋى بويىنشا اۋدان كورسەتكىشى تومەنگى دەڭگەيدە ەكەنىن ايتقان اكىم ءاربىر مەملەكەتتىك قىزمەتكەر ءوز مىندەتىنە جاۋاپتى بولۋى كەرەكتىگىن ەسكەرتتى.

وقو اكىمىنىڭ ءباسپاسوز قىزمەتى