وڭتۇستىك قازاقستان وبلىسى ەلىمىزدەگى جىلىجاي شارۋاشىلىعى ەڭ جاقسى دامىعان ءوڭىر ەسەپتەلسە، ورداباسى اۋدانىنداعى كوكونىس وسىرۋمەن اينالىساتىن «ادەليا» جشس-نىڭ جىلىجاي كەشەنى بارلىق جىلىجايلاردىڭ ىشىندەگى ەڭ ءىرىسى. جالپى اۋماعى 16 گەكتاردى الىپ جاتقان كەشەن قۇرىلىسى جوباسىنىڭ قۇنى 5,3 ميلليارد تەڭگەنى قۇراپ، «اگروبيزنەس 2020» باعدارلاماسى اياسىندا ىسكە قوسىلعان.

«ادەليا» جىلىجاي كەشەنى جىلىنا 8,4 مىڭ توننا ءونىم جينايدى. ونىڭ 70 پايىزى قازاقستاندىق نارىققا شىعارىلسا، قالعان 30 پايىزى رەسەيگە ەكسپورتتالۋدا. فرانسۋزدىق «RISHEL» كومپانياسىنىڭ زاماناۋي جابدىقتارىمەن جابدىقتالعان كاسىپورىندا شامامەن 200 ادام تۇراقتى جۇمىسپەن قامتاماسىز ەتىلگەن. «نۇر وتان» پارتياسى توراعاسىنىڭ ءبىرىنشى ورىنباسارى مۇحتار قۇل-مۇحاممەد وڭتۇستىككە جاساعان ساپارى بارىسىندا وسى كەشەننىڭ تىنىس-تىرشىلىگىمەن تانىسىپ، جۇمىسشىلارمەن كەزدەستى.

الىپ كەشەننىڭ كەرمەتتەرىن كورگەن ول «وسىدان 10 جىل بۇرىن مىناداي ەۋروپالىق دەڭگەيدەگى جىلىجايدى ارمانداۋدىڭ ءوزى قيىن بولاتىن. ەندى مىنە، مەملەكەتتىك قولداۋلاردىڭ ارقاسىندا، «اگروبيزنەس - 2020» باعدارلاماسىنىڭ ناتيجەسىندە وسىنداي جەتىستىكتەرگە جەتىپ وتىرمىز. جىلدىڭ ءتورت مەزگىلىنىڭ بارلىعى دەرلىك جىلى ءار قولايلى بولىپ كەلەتىن وڭتۇستىك ءوڭىرىنىڭ مۇنان دا جوعارى مۇمكىندىگى بار ەكەنىن ەسكەرىپ، شاعىن جانە ورتا بيزنەستىڭ ۇلەسى ارتاتىنىنا سەنىمدىمىز»، - دەدى اعىنان جارىلىپ.  

Abai.kz