وبلىس اكىمى جانسەيىت تۇيمەباەۆ شىمكەنتتەگى «نۇرلى جول» باعدارلاماسى بويىنشا سالىنىپ جاتقان مەكتەپتىڭ قۇرىلىس جۇمىستارىمەن تانىستى. 

ەڭ الدىمەن، ايماق باسشىسى «اقجايىق» شاعىن اۋدانىنداعى №59 جالپى ورتا مەكتەپتىڭ قوسىمشا قۇرىلىسىن ارالاپ كوردى. جوسپار بويىنشا 2017 جىلى پايدالانۋعا بەرىلەتىن ءبىلىم وشاعى 600 ورىنعا شاقتالعان. مۇنان سوڭ، جانسەيىت قانسەيىتۇلى باستاعان جۇمىسشى توپ «قاينار-بۇلاق» ساياجايىنداعى 1200 ورىندىق مەكتەپتىڭ قۇرىلىسىمەن تانىستى. 

نىساننىڭ ساپاسىن قاداعالاعان ايماق باسشىسى قۇرىلىس جۇمىستارىن مەرزىمىندە اياقتاپ، وندا قولدانىلاتىن قۇرىلىس ماتەريالدارىنىڭ بالانىڭ دەنساۋلىعىنا زيانسىز بولۋى قاجەتتىگىن ەسكەرتتى.

ءوڭىر باسشىسى ايماقتاعى الەۋمەتتىك نىسانداردى سالۋ جۇمىستارىنا كاسىپكەرلەردى كوپتەپ تارتىپ، مەملەكەتتىك-جەكەمەنشىك ارىپتەستىگىن دامىتۋ كەرەكتىگىنە توقتالدى. جەكەمەنشىك عيماراتتارى بار ازاماتتارعا «بالاپان» باعدارلاماسىنىڭ ەكىنشى دەڭگەيى بويىنشا شاعىن بالاباقشالار اشۋعا مۇمكىندىك جاساۋ كەرەكتىگىن ايتتى. 

بۇگىنگى تاڭدا وبلىس بويىنشا 63 مەكتەپتىڭ ىرگەتاسى قالانىپ، ونىڭ 37-ءى بۇگىنگى كۇنگە دەيىن پايدالانۋعا بەرىلسە، جىل سوڭىنا دەيىن تاعى دا بىرقاتار نىساندار ەل يگىلىنە تاپسىرىلادى دەپ كۇتىلۋدە. نىسانداردىڭ باسىم بولىگى، سايرام، شىمكەنت، ماقتاارال جانە قازىعۇرت اۋداندارىنان بوي كوتەرۋدە.

Abai.kz