وڭتۇستىك قازاقستان وبلىسى، قازىعۇرت اۋدانىندا بۇگىندە جىلىجاي كولەمى 90 گەكتارعا جەتىپ وتىر. وسى ماۋسىمدا اتالعان جىلىجايدان قازىعۇرتتىق ديقاندار 19 875 توننا  كوكونىس، 4647 توننا باقشا داقىلدارىن جينادى. مۇندا ءار ماۋسىمدا 200-دەي ازامات ەڭبەك ەتەدى. بۇل تۋرالى «اباي اقپارات» وقو اكىمىنىڭ ءباسپاسوز قىزمەتىنە سىلتەمە جاساي وتىرىپ حابارلايدى.

تاۋلى ايماقتا جىلىجاي سالۋدا وقو، قازىعۇرت اۋدانى، تۇربات اۋىلىنىڭ ديقاندارى وزىپ تۇر. سولاردىڭ ءبىرى «راحمات اتا» شارۋا قوجالىعى. ەل العىسىنا بولەنگەن ۇجىم 20 ازاماتتى جۇمىسپەن قامتىپ وتىر. سەرىكتەستىك 1,6 گەكتار جەردە «اتيا» قىزاناعى مەن «تۋمي» قيارىن ەگىپ، بۇگىندە ەكىنشى كەزەڭنىڭ داقىلدارىن جيناۋدا.

قازىعۇرت اۋدانى، تۇربات اۋىلىنىڭ حالقى جىلىجاي شارۋاشىلىعىن دامىتۋعا بەيىمدەلگەن. جيىرما گەكتاردان استام جەردىڭ ءار گەكتارىنان 100 توننادان استام باۋ-باقشا داقىلدارىن جيناپ الىپ وتىر.

ايتا كەتكەن ءجون، اۋدان شارۋالارى وتاندىق ءونىمدى شىمكەنتتەن بولەك، الماتى، استانا قالالارىنا جونەلتۋدە.

ايتا كەتەيىك، وڭتۇستىك قازاقستان وبلىسى ەلىمىزدەگى ەڭ ءىرى اۋىل شارۋاشىلىعى ورتالىقتارىنىڭ ءبىرى بولىپ تابىلادى. سونىمەن قاتار، قازاقستانداعى جىلىجايلاردىڭ 87 پايىزى وسى ءبىزدىڭ وبلىستا ورنالاسقان. ولاردىڭ جالپى كولەمى 1 مىڭ گەكتاردان اسادى.

Abai.kz