وبلىس اكىمدىگىندە ءوڭىر باسشىسى ج.تۇيمەباەۆتىڭ توراعالىعىمەن وبلىستىق باسقارمالار مەن اۋدان، قالا اكىمدەرىنىڭ قاتىسۋمەن سەلەكتورلىق ءماجىلىس ءوتتى.

جيىندا تاۋەلسىزدىكتىڭ 25 جىلدىعىن اتاپ ءوتۋ بارىسى مەن وبلىستاعى قىلمىستىق احۋال جانە جىلىتۋ ماۋسىمىنىڭ بارىسى تۋرالى ماسەلەلەر قارالدى.

تاۋەلسىزدىك – ەلىمىزدىڭ ۇلكەن جەتىستىگى ەكەنىن ايتقان وبلىس اكىمى مەرەكەنى تويلاۋدى قاتارداعى ءىس-شارالارعا قوسپاي، وتانسۇيگۇشتىككە تاربيەلەيتىن ەرەكشە كەزدەسۋلەرگە اينالدىرۋ قاجەتتىگىنە توقتالدى. ياعني، ەگەمەندىك جىلدارىندا اتقارىلعان ەرەن ىستەر جايى باياندالاتىن شارالار ۇيىمداستىرىلۋى ءتيىس.

سەلەكتورلىق ماجىلىستە قارالعان ەكىنشى ماسەلە بويىنشا وقو ءىىد باسشىسى مەن وقو جەرگىلىكتى پوليتسيا باسشىلارى اتقارىلعان جۇمىستار بويىنشا مالىمدەمە جاسادى. 

وڭىردەگى قىلمىستىق احۋال بويىنشا بايانداما جاساعان وبلىستىق جەرگىلىكتى پوليتسيا قىزمەتىنىڭ باسشىسى ب.ابىلاەۆ  9 ايدا اسا اۋىر قىلمىس سانى 14,7 پايىزعا، قاراقشىلىق شابۋىل 20,6%، بۇزاقىلىق 11,2%، ال جول-كولىك وقيعالارى 4,3 پايىزعا ازايعانىن ايتتى. 

سونىمەن قاتار بايانداماشىنىڭ مالىمەتى بويىنشا كوشەدەگى جانە قوعامدىق ورىندارداعى قىلمىس سانىن ازايتۋ مەن جول اپاتىن تومەندەتۋ ماقساتىندا جىل سوڭىنا دەيىن وبلىس ورتالىعىندا 236 سىرتقى بەينەباقىلاۋ كامەرالارى مەن 10 جول قيىلىسىنا ارنالعان ارنايى كامەرالار ورناتىلاتىن بولدى.

ايماق باسشىسى قىلمىستىق احۋالدى جاقسارتۋ بويىنشا بىرقاتار ناقتى تاپسىرمالار بەردى.

جيىننىڭ كۇن تارتىبىندەگى ءۇشىنشى ماسەلە بويىنشا وبلىستىق ەنەرگەتيكا تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى م.مارايىم وبلىستىڭ جىلىتۋ ماۋسىمىنا دايىندىق بارىسىن باياندادى.

بۇگىنگى كۇنگە وبلىستاعى 3272 بيۋدجەتتىك مەكەمەلەرىنىڭ 2816-نا جىلۋ بەرىلگەن. ال وڭىردەگى ورتالىقتاندىرىلعان جىلۋ جۇيەلەرىنەن قامتىلاتىن  2278 كوپقاباتتى تۇرعىن ءۇيدىڭ 2118-نە  جىلۋ بەرىلە باستادى.

شاعىن جانە ورتا كاسىپكەرلىكتى دامىتۋ جايىن كۇن تارتىبىنەن تىس قالدىرماعان وبلىس اكىمى  بارلىق اۋدان، قالا اكىمدەرىنە جانە ءتيىستى سالا باسشىلارىنا كاسىپكەرلەرگە قىزمەت كورسەتۋ ورتالىقتارىنان ءبىر جەردەن قۇجات الۋ مۇمكىندىگىن ۇيىمداستىرۋدى تاپسىردى. ياعني، كاسىبىن اشامىن دەگەن ءاربىر ازاماتقا قولداۋ ءبىلدىرىپ، قاعازباستىلىقتان ارىلۋدى مىندەتتەدى.

جيىندى قورىتىندىلاعان ج.تۇيمەباەۆ بارشا مەكەمە باسشىلارى مەن اۋدان، قالا اكىمدەرىنە ەل تاۋەلسىزدىگىنىڭ 25 جىلدىق مەرەيتويىن ءوز دەڭگەيىندە اتاپ ءوتىلۋىن ءجىتى قاداعالاۋدى جانە ءاربىر كوتەرىلگەن ماسەلەلەر بويىنشا ناقتى ۇسىنىستار كۇتەتىن جەتكىزدى.

Abai.kz