ماكس بوقاەۆ پەن تالعات ايانوۆتىڭ ءىسى بويىنشا باستى سوت وتىرىسى ودان ءارى جالعاسۋدا. بىرنەشە كۇننەن بەرى ءىس بويىنشا كۋاگەرلەردەن جاۋاپ الىنىپ جاتىر. بۇگىنگى وتىرىستا اتىراۋ قالالىق اكىمدىگىنىڭ قىزمەتكەرلەرى كۋالىك ەتتى.

№2 اتىراۋ قالالىق سوتىندا ءوتىپ جاتقان سوت پروتسەسى تاعى دا ايىپتالۋشىلاردىڭ قاتىسۋىنسىز جالعاستى. م.بوقاەۆ پەن ت.ايانوۆ وتىرىسقا قاتىسۋدان باس تارتسا، ولاردىڭ قورعاۋشىلارى اكىمدىكقىزمەتكەرلەرىنەن ىسكە تىكەلەي قاتىسى جوق سۇراقتاردى جاۋدىرىپ، ۋاقىتتى سوزۋمەن بولدى.

بۇگىنگى وتىرىستا اتىراۋ قالاسى اكىمى اپپاراتى مەملەكەتتىك-قۇقىقتىق جۇمىس ءبولىمىنىڭ باس مامانى سامات ەمبەرگەنكۋالىك ەتتى. ول م.بوقاەۆ پەن ت.ايانوۆتىڭ اكىمدىك تاراپىنان رۇقسات ەتىلمەگەن جەردە ميتينگ وتكىزگەنىن جانە شەرۋدىڭ زاڭسىز ەكەندىگى جونىندە الدىن-الا ەسكەرتىلگەنىن ايتتى.

         «ميتينگ وتكىزۋگە رۇقسات بەرىلگەن جوق. ويتكەنى اتالمىش ورىن، ياعني يساتاي-ماحامبەت الاڭى بەيبىت شەرۋ وتكىزۋگە بەلگىلەنگەن ورىندار قاتارىندا جوق. قالا بويىنشا ارنايى ميتينگ، شەرۋ، پيكەت وتكىزۋگە 5 ورىن بەلگىلەنگەن. بۇنداي ورىندار 2013 جىلدان بەرى بار، ال 2016 جىلى باسقا ورىندار بەكىتىلدى. ناۋرىز ايىندا بۇل ورىندار بەلگىلەنىپ، اتىراۋ قالالىق ءماسليحات شەشىمىمەنقابىلدانعان. ولاردىڭ قاتارىندا يساتاي-ماحامبەت الاڭى جوق. م.بوقاەۆ پەن ت.ايانوۆ رۇقسات ەتىلگەن ورىندار تۋرالى بىلەتىندەرىن ايتقان»، - دەدى س.ەمبەرگەن.

اتاپ وتسەك، بۇگىنگى وتىرىستا ءبىرىنشى بولىپ اتىراۋ قالاسى اكىمى اپپاراتىنىڭ باسشىسى پولىمبەت حاسانوۆ كۋالىك ەتتى.ونىڭ ايتۋىنشا، م.بوقاەۆ پەن ت.ايانوۆتىڭ 21 مامىر كۇنى يساتاي-ماحامبەت الاڭىندا ميتينگ وتكىزگىسى كەلىپ، جازعان تاعى ءبىر ءوتىنىشى اكىمدىك تاراپىنان قاناعاتتاندىرىلماعان. ەكىنشى جيىندا اتىراۋ اكىمى ەلباسىنىڭ جەر ماسەلەسىنە قاتىستى موراتوري جاريالاعانىن ايتىپ، م.بوقاەۆقا ميتينگ وتكىزگەنشە جەر كوميسسياسىنىڭ وتىرىسىنا قاتىسقانى دۇرىس بولار دەگەن. بوقاەۆ تا، ايانوۆ تا الدىن الا كەلىسىپ قويعاندىقتان سول كۇنى ءبارىبىر ميتينگكە شىعامىز دەگەن.

ەسكە سالا كەتسەك،م.بوقاەۆ پەن ت.ايانوۆتىڭقر قىلمىستىق كودەكسىنىڭ ءۇش بابى بويىنشا ايىپتار تاعىلۋدا. اتاپ ايتساق، ولار: 174 باپتىڭ 2 تارماعى، ياعني، الەۋمەتتىك جانە ۇلتتىق الاۋىزدىق تۋعىزۋعا باعىتتالعان قاساقانا ءىس-ارەكەتتەر جاساۋ، ازاماتتاردىڭ ۇلتتىق نامىسى مەن قادىر-قاسيەتىنە ءتىل تيگىزۋ; 274 باپتىڭ 4 تارماعى، ياعني، قوعامدىق ءتارتىپتى بۇزۋعا قاۋىپ توندىرەتىن كوپە-كورىنەۋ جالعان اقپارات تاراتۋ; 400 باپ، ياعني، زاڭسىز شەرۋلەردى ۇيىمداستىرۋ، وتكىزۋ جانە وعان قاتىسۋ.

Abai.kz