سوڭعى كەزدەرى مەكتەپتەگى ءدىني احۋال كۇردەلەنىپ، ءدىن ۇستانعان وقۋشىلاردىڭ كيىم ۇلگىسى ءجيى تالقىعا تۇسەتىن بولدى. قازىر ەكىنىڭ ءبىرى ءبىلىم وردالارىنداعى ورامال تاققان قىزداردىڭ ماسەلەسىن ءسوز ەتىپ، ءبىرىنشى تاراپ مۇنىڭ دۇرىستىعىن، ەكىنشى تاراپ بولسا بۇرىستىعىن دالەلدەپ، قىرىق-پىشاق بولىپ جاتادى. ەندى وسى كۇردەلى ماسەلەگە قازاقستان مۇسىلماندارى ءدىني باسقارماسى رەسمي تۇردە مالىمدەمە جاساپ وتىر. 

"قازاقستان مۇسىلماندارى ءدىني باسقارماسى وقۋشى قىزداردىڭ مەكتەپكە ورامال تاعىپ بارۋعا بايلانىستى اتا-انالار مەن وقۋ ورىندارى باسشىلارى اراسىندا تۋىنداعان ءارتۇرلى پىكىرلەر مەن ساۋالدارعا قاتىستى ءوزىنىڭ مالىمدەمەسىن جولدايدى.

يبالى، يناباتتى، ءبىلىمدى ۇل مەن قىز ءوسىرىپ، وتانشىل، پاتريوت جاستاردى تاربيەلەۋ  ءاربىر اتا-انا مەن پەداگوگتىڭ باستى ماقساتى، ۇلى ميسسياسى ەكەنى بەلگىلى.

قازاقستانداعى ءبىلىم بەرۋ جۇيەسى تەك قانا وقىتۋدى عانا ەمەس، سونداي-اق تۇلعانىڭ بارلىق سۇرانىستارىن تولىق جۇزەگە اسىرۋ ءۇشىن جاعدايلاردى جاساۋعا، ولاردى ونەرگە، سپورتقا، زياتكەرلىك دامۋعا  تارتۋعا باعىتتالعانىن وقۋشىلاردىڭ اتا-انالارى سەزىنۋلەرى كەرەك. 

يسلام ءدىنى كۇللى ادامزات بالاسىن ءبىلىم ۇيرەنۋگە ۇندەيدى.

بىرىنشىدەن، ەر كىسى مەن ايەلگە ءبىلىم الۋ  پارىز (مىندەت). اللا ەلشىسى (وعان اللانىڭ سالاۋاتى مەن سالەمى بولسىن) ءبىر حاديستە: ء«اربىر مۇسىلمانعا ءبىلىم الۋ پارىز» دەگەن. ال بالاعا زايىرلى ءبىلىمدى ۇيرەتۋ  ءاربىر ادامنىڭ ازاماتتىق ءارى مۇسىلماندىق بورىشى. زايىرلى مەملەكەتىمىز ۇل-قىزدارىمىزدىڭ ورتا ءبىلىم الۋىن مىندەتتەيدى ءارى وسى باعىتتا بارلىق مۇمكىندىكتەر مەن جاعدايلاردى قامتاماسىز ەتەدى. اتا-انالارعا قىز بالانىڭ مىندەتتى زايىرلى ءبىلىم الۋىنا كوبىرەك كوڭىل بولۋگە كەڭەس بەرەمىز. ساپالى ءبىلىم  بالا بولاشاعىنىڭ باياندى بولۋىنا ۇلكەن سەپتىگىن تيگىزەتىنىن ۇمىتپاۋىمىز ءتيىس. 

ەكىنشىدەن، قۇران جانە مۇحاممەد پايعامبار (وعان اللانىڭ سالاۋاتى مەن سالەمى بولسىن) ءحاديسى مەن مۇسىلمان عۇلامالارىنىڭ بىرەگەي پىكىرى بويىنشا، مۇسىلمان قىزعا ورامال تاعۋ  پارىز (مىندەت). قاسيەتتى قۇراندا اللا تاعالا: «ۋا، پايعامبار! جۇبايلارىڭا، قىزدارىڭا جانە يمان كەلتىرگەندەردىڭ ايەلدەرىنە ايت: ۇستەرىنە جامىلعىلارىن ءتۇسىرسىن...» («احزاپ» سۇرەسى، 59-ايات) دەپ بۇيىرعان.  الايدا قۇراننىڭ اياتتارىندا كيىمنىڭ ءتۇسى مەن ۇلگىسى ناقتى كورسەتىلمەگەن. ءار ۇلت اللانىڭ ءامىرىن ءوز ۇستانىمدارى، ادەت-عۇرىپتارى مەن تاريحي تانىم-تۇسىنىكتەرى بويىنشا ورىندايدى.

 وسىعان وراي، ەلىمىزدىڭ قىزدارى مەن ايەلدەرىنە قارا ءتۇستى كيىمدى قولدانباي، قازاق حالقىنىڭ سالت-داستۇرلەرى مەن عۇرىپتارىن ساقتاي وتىرىپ، شاريعاتتىڭ شەڭبەرىنەن شىقپاي بايسالدىلىقپەن كيىنۋگە كەڭەس بەرەمىز. 

ال باليعات جاسىنا تولماعان قىزدىڭ ورامال تاعۋىن شاريعاتىمىز تالاپ ەتپەيدى. سوندىقتان اتا-انا كىشكەنتاي ءبۇلدىرشىندى ءالى مىندەت بولماعان ورامال ءۇشىن پارىز بولعان ءبىلىم الۋدان تىيماۋى ءتيىس.

ناقتى ايتقاندا  شاريعات تالاپتارىنا سايكەس يسلام ءدىنى مەكتەپ تابالدىرىعىن جاڭا اتتاعان قىزعا ورامال تاعۋدى مىندەتتەمەيدى.

ۇشىنشىدەن، اتا زاڭىمىز قوعامدىق قاتىناستاردى رەتتەيدى جانە ازاماتتاردىڭ بوستاندىعى مەن ءدىني سەنىمدەرىنە ەركىندىك بەرەدى. مۇسىلماندار دا اللانىڭ ءامىرى بويىنشا زاڭدى ساقتايدى جانە وعان قۇرمەتپەن قارايدى. ويتكەنى، زايىرلى قوعامداعى زاڭدار مەن ەرەجەلەر  بارشا ادامنىڭ تەڭ قۇقىعىن باستى ورىنعا قوياتىن كەپىلدىك قۇجات جانە ازاماتتاردىڭ ءومىر ءسۇرۋ ءتارتىبىن كورسەتەتىن باعدار.

قازاقستان مۇسىلماندارى ءدىني باسقارماسى مۇسىلمان جاماعاتىن، اتا-انالاردى بىرلىككە ۇندەيدى جانە مەكتەپ باسشىلارىمەن ورتاق مامىلەگە كەلۋگە شاقىرادى.

ءدىني باسقارما اللا تاعالادان ەلىمىزدى ءتۇرلى بۇلىكتەن ساقتاپ، حالقىمىزدىڭ بىرلىگى مەن ىنتىماعىن نىعايتىپ، بەرەكەسىن ارتتىرۋدى تىلەيدى".  

Abai.kz