بۇگىن شىمكەنتتە «جاڭا اقپاراتتىق ساياسات: باعدار مەن بولاشاق» ءىى رەسپۋبليكالىق جۋرناليستەر فورۋمى ءوتتى.

وڭىرلەردىڭ بۇقارالىق اقپارات قۇرالدارىنىڭ باسىن قوسقان شاراعا وبلىس اكىمى جانسەيىت تۇيمەباەۆ، «تۇركىستان» گازەتىنىڭ باس رەداكتورى پاتتەەۆ شامشيدين، «ايقىن» رەسپۋبليكالىق قوعامدىق-ساياسي گازەتىنىڭ ديرەكتور- باس رەداكتورى ءجۇسىپ نۇرتورە، تۇركيا رەسپۋبليكاسى «جيھان» اقپارات اگەنتتىگىنىڭ قازاقستانداعى وكىلى يىلدىز دوعان،  «جاس قازاق» گازەتىنىڭ باس رەداكتورى سرايىل سمايىل، «قالامگەر - مەديا» ورتالىعى جشس اتقارۋشى ديرەكتورى ءاشىمجان جاناربەك، «حابار 24» تەلەارناسىنىڭ شەف-رەداكتورى قوجاەۆ شالقار سىندى بىرقاتار رەسپۋبليكالىق، وبلىستىق جانە اۋدان، قالالىق بۇقارالىق اقپارات قۇرالدارىنىڭ وكىلدەرى مەن ۇستاز-عالىمدار، حالىقارالىق اقپارات اگەنتتىكتەرىنىڭ وكىلدەرى قاتىستى.

فورۋمنىڭ اشىلۋ سالتاناتىندا ءسوز العان ايماق باسشىسى ج.تۇيمەباەۆ ەل تاۋەلسىزدىگىنىڭ 25 جىلدىعى اياسىندا ءوتىپ جاتقان بۇگىنگى باسقوسۋ – ەلباسىمىز ن.نازارباەۆ ايقىنداپ بەرگەن «100 ناقتى قادام – ۇلت جوسپارىن» ورىنداۋ ماقساتىنداعى ماڭىزدى جيىننىڭ ءبىرى ەكەنىن اتاپ ءوتىپ، بولاشاق پەن اقپاراتتىق ساياساتقا جاڭاشا باعدار كورسەتۋدە وسىناۋ جۋرناليستەرمەن بولاتىن ديالوگ الاڭىنىڭ ماڭىزدى ەكەنىن جەتكىزدى. ءسوز سوڭىندا فورۋم جۇمىسىنا ساتتىلىك تىلەپ، ەل دامۋىنا ءوز ۇلەستەرىن قوسىپ وتىرعان بارشا جۋرناليستەرگە العىسىن ءبىلدىردى.

جۋرناليستەر قاۋىمى رەسپۋبليكالىق فورۋمدا بولاشاق پەن اقپاراتتىق ساياساتقا جاڭاشا باعدار ماسەلەلەرىن تالقىلادى. جيىندا ءشامشيددين پاتتەۆ، نۇرتورە ءجۇسىپ، جاناربەك ءاشىمجان، سرايىل سمايىل سىندى  رەسپۋبليكاعا تانىمال جۋرناليست-قالامگەرلەر مەن ەل ىشىندە قوعامدىق پىكىر قالىپتاستىرىپ ۇلگەرگەن مەديا-ساراپشىلار قاتىستى. بۇگىندە اقپارات سالاسى جاڭاشا سيپاتقا يە، ينتەرنەت، الەۋمەتتىك جەلى ءداستۇرلى جۋرناليستيكانى باسىپ وزدى. وسى ورايدا، فورۋمعا قاتىسۋشىلار گازەت باسىلىمدارى اعارتۋشىلىقتى باعدار ەتۋ ءتيىس دەدى. سونداي-اق، جيىندا كاسىبي مامانداردىڭ جەتىسپەۋشىلىگى، مەرزىمدى باسىلىمداردىڭ نارىققا بەيىمدەلۋى، شىنايى اقپارات تاراتۋ  توڭىرەگىندە ءتۇرلى پىكىرلەر ايتىلدى

سونىمەن قاتار، «ايقىن» رەسپۋبليكالىق قوعامدىق-ساياسي گازەتىنىڭ ديرەكتور- باس رەداكتورى ءجۇسىپ نۇرتورە اتالعان فورۋم اقپاراتتىق ىلگەرلەتۋ بويىنشا رەسپۋبليكا كولەمىندە وتكىزىلىپ وتىرعان ەكىنشى جيىن بولىپ تابىلاتىنىن اتاپ ءوتتى. «بۇل ايماق باسشىلىعىنىڭ جانە وڭىردەگى جۋرناليست قاۋىمداستىعىنىڭ جاڭا اقپاراتتىق ساياساتقا ەرەكشە ءمان ماڭىز بەرىپ وتىرعاندىعىن اڭعارتادى»،-دەدى ءجۇسىپ نۇرتورە.

سونىمەن قاتار، فورۋمعا قاتىسۋشىلار «تاۋەلسىزدىك قۇندىلىقتارىن قالىپتاستىرۋداعى باق-تىڭ ماڭىزى»، «مەدياكەڭىستىكتەگى باسەكە، ءداستۇرلى باق-تىڭ بولاشاعى» تاقىرىپتارى بويىنشا بايانداما جاساپ، پىكىر الماستى. اقپاراتتىق ساياساتتىڭ بولاشاعى تۋرالى ويلارىن ورتاعا سالدى.

Abai.kz