2016 جىلدىڭ 15 قازانىنا دەيىن 28 ءسۇت قابىلدايتىن بەكەت پەن 3,3 مىڭ وتباسىلىق مال بورداقىلايتىن الاڭ قۇرىلعان، ولار 15 مىڭ جەكە قوسالقى شارۋاشىلىقتى بىرىكتىردى

اۋىل شارۋاشىلىعى ءمينيسترىنىڭ ءبىرىنشى ورىنباسارى قايرات ايتۋعانوۆ بۇگىن ۇكىمەت وتىرىسىندا قازاقستاندا جىل سوڭىنا دەيىن 100 ءسۇت قابىلدايتىن بەكەت پەن 2 مىڭ 200-دەن استام مال بورداقىلايتىن الاڭدى بىرىكتىرەتىن 150 قۇرىلىم ىرگەتاسىن قالاۋ جوسپارلانىپ وتىرعانىن مالىمدەدى. قازاقستاننىڭ ءاربىر وبلىسىندا پيلوتتىق رەجيمدە اۋىلشارۋاشىلىق كووپەراتيۆتەرىن قۇراتىن اۋداندار تاڭدالادى.   

سونىمەن قاتار، ءبىرىنشى ۆيتسە-ءمينيستردىڭ ايتۋىنشا، 2016 جىلدىڭ 15 قازانىنا دەيىن 28 ءسۇت قابىلدايتىن بەكەت پەن 3,3 مىڭ وتباسىلىق مال بورداقىلايتىن الاڭ قۇرىلعان، ەسەپ بويىنشا، ولار 15 مىڭ جەكە قوسالقى شارۋاشىلىقتى تارتۋعا مۇمكىندىك بەرەدى.

«بۇگىن «اتامەكەن» ۇلتتىق كاسىپكەرلەر پالاتاسىنىڭ ماماندارى قاراعاندى وبلىسى نۇرا اۋدانىنداعى پيلوتتىق جوبا بويىنشا وقىتۋدى باستايدى. «اتامەكەننىڭ» جانىنان فەرمەرلەردى وقىتاتىن اگروبىلىكتىلىك ورتالىعى قۇرىلدى»، – دەپ اتاپ ءوتتى قايرات ايتۋعانوۆ.

بۇدان بولەك، اۋىلشارۋاشىلىق كووپەراتسيالارىن دامىتۋدا بەلسەندىلىككە قول جەتكىزۋ ءۇشىن جاڭا ىنتالاندىرۋ تەتىكتەرى قاراستىرىلعان، ياعني «ىنتىماق» كووپەراتيۆتەرىن قوسىمشا نەسيەلەندىرۋگە، ءسۇت قابىلدايتىن «بىرلىك» بەكەتتەرىن جانە «بەرەكە» مال بورداقىلاۋ الاڭدارىن ىسكە قوسۋعا جاڭا نەسيەلىك ونىمدەر ازىرلەنىپ، بەكىتىلدى». وسى ماقساتتارعا رەسپۋبليكالىق بيۋدجەتتەن 31,8 ملرد تەڭگە قاراستىرىلعان.

«شاعىن نەسيەلەردىڭ قولجەتىمدىلىگىن قامتاماسىز ەتۋ ماقساتىندا ۇكىمەتتىڭ قاۋلىسىنا نەسيەلەر كولەمىن 16 ملن تەڭگەگە دەيىن جانە ونى وتەۋ مەرزىمىن 7 جىلعا دەيىن ارتتىرۋدى قاراستىراتىن تولىقتىرۋلار ەنگىزىلەدى»، – دەپ مالىمدەدى قايرات ايتۋعانوۆ.

اۋىل شارۋاشىلىعى كووپەراتيۆتەرىنىڭ قۇرىلتايشىلارىنا ارنالعان ەرەجەلەر دە ءسوز بولدى. قايرات ايتۋعانوۆ ء سۇت قابىلدايتىن بەكەتتەردەگى جۇكتەمەنى قامتاماسىز ەتۋ ءۇشىن كووپەراتيۆكە قاتىسۋشى سانى 20-دان كەم بولماۋى كەرەك ەكەنىن اتاپ ءوتتى.

«بۇرىن اۋىلشارۋاشىلىق كووپەراتيۆتەرى تۇتىنۋشى رەتىندە قۇرىلىپ، ودان پايدا كورە المايتىن. بۇگىنگى تاڭدا زاڭ جوباسىندا اۋىلشارۋاشىلىق كووپەراتيۆتەرى پايدا تابۋعا قۇقىلى ەكەندىگى ايقىن جازىلعان»، – دەپ اتاپ ءوتتى قايرات ايتۋعانوۆ.

قازاقستانداعى اۋىلشارۋاشىلىق كووپەراتسيالارىنىڭ ۇزاق مەرزىمگە ارنالعان قىزمەتىنە باعا بەرە وتىرىپ، اۋىل شارۋاشىلىعى ءمينيسترىنىڭ ءبىرىنشى ورىنباسارى ودان پايدا تۇسەتىنى انىق ەكەنىن اتاپ ءوتتى.

«كوپتەگەن اۋىل تۇرعىندارى قالاعا كەتىپ جاتادى، دەگەنمەن، اۋىلدا قالالى جەرگە قاراعاندا كوبىرەك اقشا تابۋعا بولادى.  مەن بىرقاتار وبلىستاردى مىسالعا كەلتىرە الامىن، ماسەلەن، قاراعاندى وبلىسى.  وندا جاس فەرمەرلەر كووپەراتيۆتەرگە بىرىككەن جانە ءۇش جىلدان بەرى رەسەيگە قازدىڭ ەتىن ەكسپورتتاپ، ميلليونداعان تەڭگە جانە ءتىپتى دوللارلار الىپ وتىر»، – دەپ  تۇيىندەدى قايرات ايتۋعانوۆ. 

Abai.kz