وبلىس اكىمى جانسەيىت تۇيمەباەۆتىڭ قاتىسۋىمەن وڭتۇستىك قازاقستان وبلىسى اكىمدىگىندە جاستار مەن ءوزىنىڭ اسكەري بورىشىن وتەپ جاتقان جاۋىنگەرلەردى ەسكەري-پاتريوتتىق تاربيەلەۋگە اتسالىسىپ جۇرگەن مەملەكەتتىك قىزمەتكەرلەردى ماراپاتتاۋ ءراسىمى ءوتتى. بۇل تۋرالى «Abai.kz»پورتالى وڭتۇستىك قازاقستان وبلىسى اكىمىنىڭ ءباسپاسوز قىزمەتىنە سىلتەمە جاساي وتىرىپ حابارلايدى.

جيىنعا قر ۇلتتىق ۇلانى «وڭتۇستىك» وڭىرلىك قولباسشىلىعى قولباسشىسىنىڭ تاربيە جانە الەۋمەتتىك قۇقىعى جونىندەگى ورىنباسارى سابىرجان سۇلەيمەنوۆ پەن 6506 اسكەري ءبولىمىنىڭ كومانديرى جامبىل قۋلباەۆ جانە اتالعان سالانىڭ وزگە دە قىزمەتكەرلەرى قاتىستى.

باسقوسۋدا س.سۇلەيمەنوۆ ايماق باسشىسىنا مەرەيتويلىق مەدال تابىستادى. ءوز كەزەگىندە، جاسالعان جوعارى قۇرمەت ءۇشىن ءوڭىر باسشىسى قوناقتارعا العىسىن ءبىلدىرىپ، تاۋەلسىز ەلدىڭ ەڭ باستى قاجەتتىلىكتەرىنىڭ ءبىرى – ونىڭ قاۋىپسىزدىگى ەكەنىن، وسكەلەڭ ۇرپاقتى وتانسۇيگىشتىككە، جاڭا قازاقستاندىق پاتريوتيزمگە تاربيەلەۋ بارشانىڭ مىندەتى ەكەنىن جەتكىزدى.

سونداي-اق،  ەل شەبىن قورعاۋشىلارمەن بولعان كەزدەسۋدە ءى دارەجەلى «ۇلتتىق ۇلان» توسبەلگىسىمەن وڭتۇستىك قازاقستان وبلىسى اكىمى اپپاراتىنىڭ جۇمىلدىرۋ جانە قۇقىق قورعاۋ ورگاندارىمەن جۇمىس جونىندەگى باس ينسپەكتورى مەيىركۇل باتىربەكوۆا ماراپاتتالسا، ءىى دارەجەلى «ۇلتتىق ۇلان» توسبەلگىسى وڭتۇستىك قازاقستان وبلىسى ىشكى ساياسات باسقارماسىنىڭ باسشىسى بولات تولەگەنگە تابىستالدى. 

Abai.kz