بۇگىن ءوڭىر باسشىسى جانسەيىت تۇيمەباەۆتىڭ قاتىسۋىمەن وڭتۇستىك قازاقستان وبلىسىنىڭ ورتالىعى – شىمكەنت قالاسىندا جاڭا «Front office» مەملەكەتتىك قىزمەت كورسەتۋ ورتالىعى اشىلدى. عيماراتتىڭ اشىلۋ راسىمىنە قالا اكىمى ع.ءابدىراحىموۆ پەن دەپۋتاتتار قاتىستى.

تۇڭعىش رەت شىمكەنت قالاسى اكىمدىگىنىڭ جانىنان اشىلعان «فرونت-كەڭسە» تمد-داعى تەڭدەسى جوق جوبا بولىپ تابىلادى. مۇندا قالالىق اكىمدىك تاراپىنان كورسەتىلەتىن مەملەكەتتىك قىزمەتتەردىڭ بارلىق ءتۇرىن ءبىر جەردەن ء"بىر تەرەزە" جۇيەسى ارقىلى ۇسىنادى. سالا جاۋاپتىلارىنىڭ ايتۋىنشا، مەملەكەتتىك قىزمەت كورسەتۋدىڭ بۇل ءتۇرى بيزنەس جۇيەسىنىڭ وكىلدەرىنە سەنىم بەرەدى دەيدى.

ورتالىقتىڭ ءىشىن ارالاپ، جۇمىسىمەن تانىسقان وبلىس اكىمى «فرونت-وفيس» قىزمەتكەرلەرىنىڭ جۇمىسىنا تابىس تىلەدى.

«Front office» قۇرۋ يدەياسى - جاقسى باستاما. ەندى ورتالىقتى حالىققا كەڭىنەن تانىستىرىپ، ناسيحات جۇمىستارىن قولعا الۋىمىز كەرەك. سونىمەن بىرگە، وبلىسقا قاراستى بارلىق اۋدان، قالا اكىمدىكتەرىنىڭ ماماندارى وسىندا كەلىپ ۇيرەنىپ، تاجىريبە الماسۋى قاجەت. وسىلايشا، تولىقتاي اشىقتىقتا جۇمىس ىستەپ، حالىققا قىزمەت جاساۋىمىز كەرەك»، - دەدى جانسەيىت قانسەيىتۇلى.

ءوز كەزەگىندە، ءسوز العان شىمكەنت قالاسىنىڭ اكىمى عابيدۋللا ءابدىراحىموۆ اتالعان قىزمەت كورسەتۋ جوباسىنىڭ سمارتفوندارعا ارنالعان قوسىمشاسىن دايىنداۋ ماسەلەسى قولعا الىنىپ جاتقانىن، ياعني، حالىققا مەيلىنشە، ىڭعايلى بولۋ جاعى ويلاستىرىلىپ جاتقانىن  جەتكىزدى.

ايتا كەتۋ كەرەك، «فرونت-وفيس» جۇيەسىنىڭ ارتىقشىلىعى سول، ەڭ الدىمەن، ءوتىنىش يەسىنىڭ قۇجاتتارىن قابىلداۋ كەزىندە وعان ارنايى باقىلاۋ كودى بەرىلەدى. تىركەۋگە الىنعان قۇجات شتريح كود ارقىلى اكىمدىكتىڭ ءتيىستى بولىمىنە جونەلتىلەدى. ءوتىنىش قىسقا مەرزىمدە قارالعان سوڭ جاۋابى "فرونت-وفيسكە" باعىتتالىپ، تۇرعىندارعا بەرىلەدى نەمەسە ءوتىنىش يەسىنىڭ ەلەكتروندى مەكەن-جايىنا جىبەرىلەدى. سونداي-اق ءوتىنىش يەلەرى باقىلاۋ كودى ارقىلى ءوتىنىشتىڭ قارالۋ بارىسى جونىندە مالىمەت الۋعا مۇمكىندىگى بار. 

ول ءۇشىن "shymkent.gov.kz/frontoffice" سايتىنا كىرۋ ارقىلى نەمەسە بايلانىس ورتالىعىنىڭ 545-545 تەلەفونىنا قوڭىراۋ شالۋ ارقىلى اقپارات الۋعا بولادى. بۇل ءبىر سوزبەن، ىڭعايلى، جىلدام ءارى زامان تالابىنا ساي قىزمەت ءتۇرى بولىپ سانالادى. 

"فرونت-ءوفيستىڭ" قىزمەتىنە جۇگىنۋ ارقىلى كەز-كەلگەن تۇرعىن ءوز ۋاقىتىن ۇنەمدەۋىنە بولادى. قۋانتارلىعى، بۇل ەلەكتروندى جوبا بيۋروكراتيالىق قاعازباستىلىقتان قۇتىلۋ، سىبايلاس جەمقورلىق قىلمىستارىنىڭ سانىن ازايتۋ، بيلىك ورگاندارى مەن حالىقتىڭ اراسىنداعى كەدەرگىلەردى ازايتۋعا مۇمكىندىك بەرەدى.

جاڭا كەڭسەدە 25-26 مامان ەڭبەك ەتىپ، 400-دەن استام مەملەكەتتىك قىزمەت ءتۇرىن كورسەتەتىن بولادى دەپ جوسپارلانىپ وتىر. بارلىق ءوتىنىش، سۇراقتارعا قر زاڭناماسىندا بەلگىلەنگەن مەرزىمدە جاۋاپ بەرىلەتىن بولادى.

وقو اكىمىنىڭ ءباسپاسوز قىزمەتى