اتى شۋلى پاشا - پاۆەل كۋلاگين - اقمولا وبلىسىنىڭ اكىمى، قازاقستانداعى الىپ جەر يەلەنۋشى (لاتيفۋنديست) سەرگەي كۋلاگيننىڭ ۇلى. مىنە، وتىزعا ەندى تولعان «پاشا-پاتسان» ەرەكشە  قابىلەت دارىنىمەن  كوزگە ءتۇسىپ، پرەزيدەنت اكىمشىلىگىنىڭ ء(پا) ينسپەكتورى بولىپ تاعايىندالىپتى. پەرىندىرتىپ ءپا-گە بارعانى تۋرالى پاۆەل سەرگەەۆيچ ءوزىنىڭ «ينستاگرامم» جەلىسىندەگى پاراقشاسىندا ءسۇيىنشى سۇراپ، مالىمدەدى.

«قىمباتتى دوستار! بۇگىن استانا اكىمى اسەت ورىنتايۇلى مەنىڭ پرەزيدەنت اكىمشىلىگىنىڭ مەملەكەتتىك ينسپەكتورى قىزمەتىنە تاعايىندالعانىمدى ايتىپ، قۇتتىقتادى. ماعان كورسەتكەن سەنىمدەرىڭىز بەن قولداۋلارىڭىز ءۇشىن راقمەت ايتقىم كەلەدى. دوستار، مەن ارقاشان دا بىرلەسىپ جۇمىس ىستەۋگە دايارمىن. ارينە، اۋدانىمىزدى، قالامىزدى ءام وتانىمىزدى كوركەيتۋ جولىندا، ەلباسىنىڭ ماعان ارتقان سەنىمىن اقتاۋعا ايانباي ەڭبەك ەتەمىن»،-دەپ جازادى ول.

پاشانىڭ پاپاسى دا پاڭ كىسى. اكىمدەر كورپۋسىندا بىرنەشە مارتە تەنتەكتىك جاساپ، كوزگە تۇسكەن كۋلاگيننىڭ اگرو-الپاۋىت ەكەنى بارشاعا بەلگىلى. «80 مىڭ گەكتار جەرىم بار» دەپ شىرەنگەن سەرگەي مىرزا كەرەك دەسەڭىز "پايعامبارمەن دە ىستەس ادام".

(رۋدنىيداعى يوانن-بوگوسلوۆ شىركەۋىندە يسا پايعامباردىڭ يەرۋساليمگە كەلگەن  ءساتى بەينەلەنگەن تومەندەگى كارتيناعا قاراڭىز):

مىنە، سول فرەسكادا  پايعامباردى كۇتىپ الۋشى يەرۋساليمدىكتەردىڭ  اراسىندا كۋلاگين دە تۇر. «ارامىزدا جۇرگەن  كۋلاگين 2 مىڭ جىل بۇرىنعى كونە يەرۋساليمگە قالاي بارىپ قالدى، مۇمكىن قاتەلىك شىعار»، دەسىپ ەدى جۇرت. جوق، قاتەلىك ەمەس ەكەن، بۇل اكىمگە جاعىنۋعا تىرىسقان سۋرەتشىلەردىڭ «توسىن سىيى» بولىپ شىقتى. ال  شىركەۋدەگى پوپتار «كۋلاگيننىڭ اپوستولداردىڭ اراسىنان تابىلۋى دىنىمىزگە قايشى كەلمەيدى» دەپ اقتاي جونەلدى. ءجا، ول بولەك اڭگىمە. پاشاعا ورالايىق...

پاۆەل كۋلاگيننىڭ جاسى 30-دا. مەملەكەتتىك قىزمەتتىڭ ءتۇر-ءتۇرىن كورگەن كۋلاگيننىڭ بالاسى ءبىر كەزدەرى ەلوردا اكىمىنىڭ كەڭەسشىسى دە بولعان. سوسىن 2013-جىلى استانا قالاسىنداعى «الماتى» اۋدانىنىڭ تىزگىنىن ۇستادى. ول كەزدە پاشانىڭ جاسى نەبارى 26-دا ەدى.  «26 جاسىندا قالايشا اۋدان اكىمى بولادى؟» دەپ جۇرت سوندا ءبىر شۋلاعان.  اكە جولىن قۋامىن دەگەن  «پاشا-پاتساننىڭ» اكىم بولۋىعا شاماسى جەتپەي، تەستىلەۋدەن وتە الماي، اقىرىندا استانا قالاسىنىڭ كوممۋنالدىق شارۋاشىلىق باسقارماسىن باسقارىپ ەدى. الايدا 2015 جىلى «سارىارقا» اۋدانىنىڭ اكىمى بولىپ شىعا كەلدى. راس، پاشا العاش اكىم بولعاندا پاپاسى ونى جاقسىلاپ قورعاشتاپ باققان-دى. «جاس بولسا نەسى بار؟ مەن دە 26-27 جاسىمدا كولحوزدى باسقارعانمىن. 26 جاسىندا باستىق بولعاندار جوق دەيسىڭدەر ما؟ نەگە تەك كۋلاگيندى بايقاپ قويدىڭدار؟ انىقتاپ كورسەڭدەر، جاسى ودان دا كىشىلەردى تاباسىڭدار» دەپ ەدى سول كەزدە سەرگەي كۋلاگين. سەكەڭنىڭ ءسوزىنىڭ جانى بار. تەگىندە «اقوردانىڭ اقساۋساق بالالارى» از ەمەس.  ابىقاەۆتىڭ بالاسى - سەرگەي نۇرتاەۆ  يتاليادا ەلشى، مينيستر بولعان ۆلاديمير شكولنيكتىڭ بالاسى - يگور شكولنيك «سامۇرىق-قازىنادا» ىستەيدى ت.ب. 

حوش، استانا اكىمشىلىگىندە بىرنەشە كابينەت اۋىستىرعان پاشا ەندى پرەزيدەنت اكىمشىلىگىنە اۋىستى. اكىم بولۋعا قابىلەتى جەتپەگەن پاشانىڭ پرەزيدەنت اكىمشىلىگىندە نە ىستەپ، نە تىندىراتىنىن الداعى ۋاقىتتا كورە جاتارمىز...

نۇرگەلدى ابدىعانيۇلى

Abai.kz