تولەبي اۋدانى لەنگەر قالاسىنىڭ 1 شاعىن اۋدانىندا «وڭىرلەردى دامىتۋ -2020» مەملەكەتتىك باعدارلاماسى اياسىندا، 480 پاتەرلى 8 كوپقاباتتى تۇرعىن ءۇي قۇرىلىسى باستالدى.

عيماراتتارعا جەر قازۋ جۇمىستارى باستالعالى اۋدان باسشىسى بۇحارباي پارمانوۆ يگى ءىستىڭ باسى-قاسىندا بولىپ، جۇمىستاردىڭ ساپالى بولۋىن ءجىتى باقىلاۋدا.

لەنگەر قالاسىنان بوي كوتەرىپ جاتقان بەس قاباتتى 8 ءۇيدىڭ ءاربىرى 60 پاتەردەن تۇرادى. بۇگىنگە دەيىن اتالعان باسپانالاردىڭ مەردىگەرلەرى مەن ينجينيرينگتىك قىزمەت كورسەتۋشى مەكەمەلەرى انىقتالىپ، كەلىسىم-شارت ءتۇزۋ جۇمىستارى جۇرگىزىلدى. قازىرگى تاڭدا، نىساندار قۇرىلىسىن جۇرگىزۋ ءۇشىن وبلىستىق مەملەكەتتىك ساۋلەت-قۇرىلىس باقىلاۋ باسقارماسىنان رۇقسات قاعاز الىنىپ، ۇيلەردىڭ جەر قازۋ جۇمىستارىنىڭ قايتا نىعىزداۋ جۇمىستارى  جۇرگىزىلۋدە.

ايتا كەتەيىك، كوپقاباتتى تۇرعىن ۇيلەردىڭ قۇرىلىسى 2017 جىلى اياقتالىپ، قىركۇيەك ايىنا قاراي پايدالانۋعا بەرىلەدى دەپ كۇتىلۋدە. 

سونىمەن قاتار،  وسىنىڭ الدىندا وبلىس ورتالىعى شىمكەنت قالاسىندا دىبىستى باعدارشامدار پايدا بولعاندىعىن حابارلاعان ەدىك. كوزدەرى ناشار كورەتىن زاعيپ جانداردى قولداۋ ماقساتىندا قولعا الىنعان ىلكىمدى تىرلىك كوپشىلىكتىڭ كوڭىلىنەن شىعىپ ۇلگەردى. قالا باسشىلىعى بيۋدجەتتەن بولىنگەن 6 ملن تەڭگەدەن استام قارجىعا كادىمگى باعدارشامدار ورناتىلعان 20 قيىلىستا وسىنداي دىبىستى باعىتتاعىشتاردى ىسكە قوسىپ وتىر.

بۇل باعدارشامنىڭ ەرەكشەلىگى سول، قاي كوشەنىڭ قيلىسىندا تۇرعانىڭىزدى جانە جۇرۋگە نەشە ۋاقىت قالعانىن ەسىڭىزگە سالىپ، ايتىپ بەرەدى. سالا ماماندارىنىڭ مالىمدەۋىنشە، وقو بويىنشا مۇمكىندىگى شەكتەۋلى 109 مىڭنان استام ازامات بار. ونىڭ جارتىسىنا جۋىعى — زاعيپ جاندار. مىناداي باعدارشامدار سول جاياۋ جۇرگىنشىلەردىڭ قاۋىپسىزدىگىن قاراستىرۋعا باعىتتالعان بىردەن ءبىر قوندىرعى.

وسىنداي باعدارشامداردى الداعى ۋاقىتتا قالامىزدىڭ وزگە دە كوشەلەرىنە ورناتۋ جوسپارلانعان. شىمكەنت قالاسى بويىنشا بۇگىندە 167 باعدارشام، 7 مىڭنان استام جول بەلگىسى بار. ەندى دىبىستى باعدارشامنىڭ جۇمىس جاساۋ جۇيەسىن جۇيەلەۋ كەرەك.

Abai.kz