جاقىندا بىرىككەن ۇلتتار ۇيىمى تاياۋ شىعىس پەن افريكا ەلدەرىنەن اعىلعان بوسقىنداردىڭ ءبىر بولىگىن قازاقستانعا دا كىرگىزۋ تۋرالى ماسەلەنى ءسوز ەتكەنى بەلگىلى بولدى.

بۇۇ باس حاتشىسى انتونيۋ گۋتەرريش مىرزا گەرمانيالىق «Focus» جۋرنالىنا بەرگەن سۇحباتىندا بوسقىنداردى ورنالاستىرۋ ماسەلەسىن ءسوز ەتكەن.

«ليۆان، تۇركيا جانە يوردانيا سەكىلدى ەلدەر قازىر بوسقىنداردىڭ كوپتەپ كەلۋىنەن ەكونوميكالىق ءام ساياسي قىسىمعا ۇشىرادى. سوندىقتان ول ەلدەردەگى مولشەردەن تىم كوپ بوسقىنداردى الەمنىڭ وزگە ەلدەرىنە دە ورنالاستىرۋىمىز قاجەت. بوسقىنداردى الەمنىڭ بارلىق ەلدەرىنە تەڭدەي ءبولۋىمىز كەرەك»،-دەدى پورتۋگاليانىڭ ەكس-پرەمەرى.

ايتا كەتەيىك، 13-قازان كۇنى بۇۇ باس اسسامبلەياسى ۇيىمنىڭ باس حاتشىلىعىنا پورتۋگاليانىڭ ەكس-پرەمەرى انتونيۋ گۋتەرريشتى سايلاعان بولاتىن. ونىڭ كانديداتۋراسىن ۇيىمنىڭ قاۋىپسىزدىك كەڭەسى ماقۇلداپ، اسسامبلەيا مۇشەلەرى ءبىر اۋىزدان قولداعان-تىن. ەندى ول ءوز مىندەتىنە 2017 جىلدىڭ 1-قاڭتارىنان باستاپ كىرىسەتىن بولادى.

ال 14-قازان كۇنى قازاقستان پرەزيدەنتى نۇرسۇلتان ءابىشۇلى نازارباەۆ جاڭا باس حاتشى انتونيۋ گۋتەرريشتى جەڭىسىمەن قۇتتىقتاپ، ۇيىمعا مۇشە مەملەكەتتەردىڭ ءبىر اۋىزدان داۋىس بەرۋى، وعان ارتىلعان سەنىمنىڭ جوعارى ەكەندىگىن بىلدىرەتىندىگىن ايتقان.

P.S. بۇۇ باس حاتشىسى ايتقانداي تاياۋ شىعىس پەن افريكا ەلدەرىنەن اعىلعان بوسقىنداردى ەكونوميكالىق الەۋەتى بار، بوسقىن قابىلداۋعا قاۋقارلى مەملەكەتتەرگە تەڭدەي بولەتىن بولسا - بۇل ساناتتا قازاقستاننىڭ دا بولاتىنى انىق.  اسىرەسە، الەمدىك ساياساتتا ويىپ تۇرىپ ورىن الاتىن مەملەكەت باسشىسىنىڭ بەدەلى مەن قازاق حالقىنىڭ كەڭقولتىق پەيىلى قازاقستاندى دامۋشى ەلدەر تىزىمىنە ەنگىزگەنى تاعى بار. جەرىنىڭ استى مەن ءۇستى "شاشپا-توك بايلىققا تولى" قازاقستاننىڭ وتكەن جىلدان بەرى بۇۇ تۇراقتى ەمەس مۇشەلىگىنە وتكەنىن ەسكەرسەك، بوسقىندار كوشىن جونەلتەتىن ەلدەر ساپىندا ەكەنىمىز تاعى راس. ونىڭ ۇستىنە قازاقستان ءوز تاريحىندا، سوناۋ سوعىس جىلدارىندا كەڭەستىك جۇيە بوسقىندارىن قابىلداپ، بۇگىندە تەرەزەسى تەڭ ازاماتتار قاتارىنا قوسقانىن الەم حالقى جاقسى بىلەدى. بۇگىندە سول ەتنوستار تولىققاندى قازاقستان ازاماتتارى اتانىپ، ءتىپتى ولاردىڭ وكىلدەرى ەلىمىزدىڭ ەڭ ىقپالدى ورگاندارىندا قىزمەتكە ورنالاستى.

دەمەك، انتونيۋ گۋتەرريش جۇمىسىنا كىرىسەتىن ەندىگى جىلدان باستاپ قازاقستان بوسقىندار قابىلداۋ لاگەرىنە اينالۋى ابدەن مۇمكىن ەكەندىگىن ازىرگە جوققا شىعارا المايتىنىمىز راس.

نۇرزات توعجان

Abai.kz