ءدىن سالاسىنداعى ەڭ ماڭىزدى مىندەت - ەلىمىزدىڭ دامۋىنىڭ زايىرلى قاعيداتىن قامتاماسىز ەتۋ جانە نىعايتۋ. ياعني، ازاماتتاردىڭ ار-وجدان بوستاندىعىن بۇلجىتپاي كەپىلدەندىرۋ، ونىڭ ءدىندى تاڭداي الۋ نەمەسە دىننەن باس تارتا الۋ قۇقىعىن قامتاماسىز ەتۋ - ءبىزدىڭ زايىرلىلىق مودەلىمىزدىڭ اينىماس نەگىزدەرى رەتىندە قالا بەرەدى. 

وسى تۇرعىدان العاندا قوعامىمىزدا بەرىك ورنىققان كونفەسسياارالىق كەلىسىمدى  ودان ءارى نىعايتۋ ءدىني بىرلەستىكتەرمەن بىرلەسكەن جۇمىسىمىزدىڭ اسا ماڭىزدى باعىتى بولىپ تابىلادى.

ەلىمىزدىڭ ءدىن سالاسىنىڭ دامۋى تۋرالى تۇتاستاي تۇسىنىك قالىپتاستىرۋ ءۇشىن ءبىز ءدىن سالاسىنداعى مەملەكەتتىك ساياسات تۋرالى كونتسەپتسيانى (تۇجىرىمدامانى) ازىرلەۋدى كوزدەپ وتىرمىز. بۇل قۇجاتتا مەملەكەتتىڭ ءدىن سالاسىنداعى ۇستانىمى، ستراتەگيالىق ماقساتتارى مەن جۇمىس باعىتتارىن ايقىندايتىن بولامىز.

بۇل قۇجاتتى ازىرلەۋگە ساراپشىلاردى، ءدىنتانۋشىلاردى، ازاماتتىق قوعام وكىلدەرىن تارتا وتىرىپ، ونى قوعامنىڭ قاتىسۋىمەن اشىق تۇردە تالقىلاۋدى جوسپارلاپ وتىرمىز.

كونتسەپتسيا نەگىزىندە ءدىني قىزمەت تۋرالى زاڭناماعا ەنگىزىلەتىن وزگەرىستەر مەن تولىقتىرۋلاردى دايىندايتىن بولامىز.

ۇيىمداستىرۋشىلىق جانە زاڭنامالىق شارالار مەملەكەت پەن قوعامنىڭ زايىرلىلىعىن ودان ءارى نىعايتۋعا باعىتتالادى. بۇل ءدىني ءبىلىم الۋ ءتارتىبىن رەتتەۋدى، جاسوسپىرىمدەردى ءدىني قىزمەتكە زاڭسىز تارتۋعا جول بەرمەۋدى، ءدىني ادەبيەتتەردى تاراتۋ ءتارتىبىن جەتىلدىرۋدى قاجەت ەتەدى.

وسى ورايدا، مەنەن ء«دىن سالاسىنداعى  كونتسەپتسيانى ازىرلەۋ مەملەكەتتىڭ دىننەن ءبولىنۋ قاعيداتىنا قانشالىقتى سايكەس كەلەدى» دەپ سۇرايتىندار بار.  مەنىڭشە، مۇندا قانداي دا ءبىر قايشىلىق جوق، ويتكەنى بۇگىنگى كۇندە ءدىني بىرلەستىكتەر – قوعامدىق ومىردەگى شىنايىلىق، ازاماتتىق قوعامنىڭ ءبىر بولىگى، ال مەملەكەت ولاردىڭ قىزمەت اتقارۋى ءۇشىن قۇقىقتىق جاعدايلار مەن ورتا قالىپتاستىرادى.

وسى تۇرعىدان العاندا، كونتسەپتسيا – مەملەكەت پەن ءدىني بىرلەستىكتەر اراسىنداعى قاتىناستارعا كوزقاراستار جۇيەسى، زايىرلىلىق قاعيداتىنىڭ تۇعىرى دەر ەدىم.

ءدىن سالاسىنداعى كوپتەگەن ۆەدومستۆولاردىڭ جۇمىستارىن ۇيلەستىرۋ ءۇشىن ۇكىمەت جانىندا ۆەدومستۆوارالىق كوميسسيا قۇرىلاتىن بولادى.