وبلىس اكىمى جانسەيىت تۇيمەباەۆ شىمكەنتتەگى «اق ورداسى كورپوراتسياسى» جشس-ندا بولىپ، سەرىكتەستىكتىڭ جۇمىسىمەن تانىستى.

جۇمىس ساپارى كەزىندە ءوڭىر باسشىسى كورپوراتسيانىڭ مودۋلدىك ۇيلەر ءوندىرىس زاۋىتىندا بولىپ، باسپانا سوعۋدىڭ جاڭا تاسىلىمەن تانىستى. جىلىنا 1 مىڭ دانا ءۇي سالۋعا قاۋقارلى «Ak Ordasy Duilding» جشس-ندا 100-دەن استام ادام جۇمىسپەن قامتىلعان. زاۋىتتى ارالاۋ كەزىندە كورپوراتسيا توراعاسى يبادۋللا قالىبەكوۆ وبلىسىمىزدا امەريكاندىق تاسىلمەن سالىناتىن 500 ءۇيدىڭ قۇرىلىسىن جۇرگىزۋدى ۇسىنىپ، ونى قىسقا مەرزىمدە جانە ارزان باعاعا سالۋعا بولاتىنىن، سونداي-اق، باسپانا ماڭىنان جىلىجاي سالىناتىنىن ءتۇسىندىردى. اتالعان جوبانىڭ تيىمدىلىگىمەن تانىسقان جانسەيىت تۇيمەباەۆ ۇسىنىستى قولداپ، اكىمدىك تاراپىنان قاجەتتى كومەكتىڭ كورسەتىلەتىنىن، ءتىپتى، مۇندا ءدۋالدى وقىتۋ جۇيەسى اياسىندا ستۋدەنتتەر جۇمىسپەن قامتىلۋى كەرەكتىگىن جەتكىزدى.

مۇنان سوڭ، جۇمىسشى توپ سەرىكتەستىكتىڭ كولەمى 12 گەكتار بولاتىن كوكونىس جىلىجايلارىن ارالاپ، ونداعى اۋىل شارۋاشىلىعى ونىمدەرىن ءوسىرۋ تەحنولوگياسىن كوردى. نەگىزىنەن، قىزاناق پەن قيار وسىرۋمەن اينالىساتىن ەنشىلەس كومپانيا ونىمدەرىن شىمكەنتتەن بولەك، قاراعاندى مەن استاناعا ساۋدالايدى. ونىمدەردىڭ گوللانديالىق جانە يزرايلدىك سۇرىپتارى جايقالعان جىلىجايلاردى ارالاۋ بارىسىندا كورپوراتسيا جەتەكشىلىگى تاراپىنان ايتىلعان وڭتۇستىكتەگى جىلىجاي كلاستەرىن دامىتۋ ۇسىنىسى دا ايماق باسشىسىمەن قولداۋ تاۋىپ، تاياۋ ارادا وبلىستا تاجىريبە الماسۋ سەمينارى ۇيىمداستىرىلاتىن بولدى.

سونداي-اق، وبلىس اكىمى باستاعان توپ سەرىكتەستىكتىڭ گازوبلوك شىعاراتىن زاۋىتىندا بولىپ، كوكونىس ساقتاۋ قويماسىن ارالادى. سونداي-اق، تاياۋدا ىسكە قوسىلاتىن پوليەتيلەن ونىمدەرىن شىعارۋ زاۋىتىن كورىپ، كورپوراتسيانىڭ ەنشىلەس كومپانياسى قۇرىلىسىن جۇرگىزگەن كوپقاباتتى ءۇيدىڭ ساپاسىن باقىلادى.

ايتا كەتەيىك، نارىقتا سوڭعى 10 جىلدان بەرى جۇمىسىن جانداندىرىپ كەلە جاتقان «اق ورداسى كورپوراتسياسىنىڭ» ءتۇرلى سالالار بويىنشا جۇمىس ىستەپ كەلە جاتقان 13 ەنشىلەس كومپانياسى بار.

اباي اقپارات