بۇگىن قازاقستان پرەزيدەنتىنە سالقىن ءتيىپ قالعاندىعى تۋرالى اقپاردىڭ تاراعانىنا ءۇش كۇن بولدى. قازىر ەم قابىلداپ جاتقان نۇرسۇلتان نازارباەۆتىڭ بىرقاتار حالىقارالىق جيىندارعا بارمايتىنىن ونىڭ ءباسپاسوز حاتشىسى مالىمدەدى.

ۇلكەن ساياساتتا بىتىمگەرلىك ميسسياسىمەن تانىلعان قازاق پرەزيدەنتىنىڭ دەنساۋلىعىنا قاتىستى اقپارات الەمدىك باق-تى شارلاپ كەتتى. اسىرەسە بۇگىن ارمەنيا استاناسىندا ءوتۋى ءتيىس ۇجىمدىق قاۋىپسىزدىك كەڭەسىنىڭ كەزەكتى سامميتىنە قازاقستان پرەزيدەنتىنىڭ بارماي قالۋى قىزۋ تالقىلانۋدا. «Abai.kz» پورتالى سولاردىڭ ءبىرسىپىراسىن نازارلارىڭىزعا ۇسىنادى.

مىسالى، ارمەنيالىق «LRAGIR.AM» پورتالى «نازارباەۆتىڭ اۋىرىپ قالۋىنىڭ ديپلوماتيالىق استارى بار»، دەپ جازادى.

«قازاقستان پرەزيدەنتىنىڭ سالقىن ءتيىپ، اۋىرىپ قالۋى – ەرەۆانعا كەلگىسى كەلمەۋىن اڭعارتادى. رەيتەر بۇنى – ديپلوماتيالىق سىلتاۋ دەپ جازادى. استانا مەن ەرەۆان اراسىنداعى بايلانىس ساۋىردەگى قاراباق جانجالىنان كەيىن قاتتى ناشارلاپ كەتكەن. ول كەزدە قازاقستان پرەزيدەنتى ەرەۆانداعى ەاەو سامميتىنە كەلۋدەن اشىق باس تارتقان بولاتىن»، دەپ توپشىلايدى ارمەنيالىق باق.

ءدال وسى اۋانداعى اقپاراتتى تاعى ءبىر ارمەنيالىق باسىلىم «PANARMENIAN.NET» پورتالى دا جازادى. اتالعان پورتال قازاقستان پرەزيدەنتىنىڭ ەرەۆان ساپارىنان باس تارتۋى – قاراباق ماسەلەسىمەن بايلانىستى ەكەندىگىن ايتادى.

ايتا كەتەيىك، ەرەۆانداعى ۇجىمدىق قاۋىپسىزدىك كەڭەسىندە قارالاتىن نەگىزگى ماسەلە – قاراباق حالقىنىڭ تاعدىرى بولادى دەيدى ساراپشىلار. اتالعان ماسەلەدە قازاقستاننىڭ پوزيتسياسى تاعى بەلگىلى. ەلباسى نۇرسۇلتان نازارباەۆتىڭ 2014 جىلى قاراباقتىڭ ازىربايجانعا تيەسىلى ەكەنىن ايتقانى بار.  ال بيىل قاراباقتا اشىق سوعىس جاساعان ءازىربايجان مەن ارمەنيا باسشىلارىن بىتىمگەرلىككە شاقىرعان دا نۇرسۇلتان نازارباەۆ بولعان ەدى. بۇل جولعى سوعىستا ارمەنيا ارمياسى جەڭىلىس تاپقان. سەبەبى، اۋەل باستا ەرەۆان پوزيتسياسىن قولدايمىن دەگەن رف پرەزيدەنتى ازىربايجانعا ءىرى كولەمدە قارۋ-جاراق جەتكىزۋ تۋرالى كەلىسىمدەرگە قول جەتكىزگەن-ءتىن.

كۇنى بۇگىن ەرەۆاندا وتەتىن ۇقك جيىنىنا پرەزيدەنت نازارباەۆتىڭ ورنىنا سەنىمدى وكىل رەتىندە ۇكىمەت باسشىسى باقىتجان ساعىنتاەۆ اتتاندى.

ال «REUTERS.COM» اگەنتتىگىنىڭ ءتىلشىسى ەندريۋ وسبورن (Andrew Osborn) «نازارباەۆتىڭ دەنساۋلىعىنا قاتىستى اقپارات كونفيدەنتسيالدى  بولعان» دەپ جازادى.

«پرەزيدەنت نازارباەۆتىڭ سالقىن تيگىزىپ الۋىنا قاتىستى اقپاراتتى پرەزيدەنت كەڭسەسىنىڭ ءوزى تاراتۋى تاڭ قالدىرادى. سەبەبى 76 جاستاعى قازاق ليدەرىنىڭ دەنساۋلىعى تۋرالى حابار تاراتۋ قر زاڭنامالارىنا سايكەس رۇقسات ەتىلمەيتىن»،-دەيدى ەندريۋ وسبورن.

سونداي-اق، ارمەنيا پرەزيدەنتى سەرج سارگسياننىڭ قازاقستان پرەزيدەنتى نۇرسۇلتان نازارباەۆتى سارعايا كۇتكەندىگىن دە جازادى.

«الايدا قازىر ارمەنيا مەن قازاقستان اراسى اناۋ ايتارلىقتاي تاتۋ ەمەس. قازاقستان دا، ءازىربايجان دا تۇركىتىلدەس، مۇسىلمان مەملەكەتتەر. ونىڭ ۇستىنە قازاقستان مۇناي ەكسپورتىندا ءازىربايجاننىڭ ۇلەسى باسىم»،-دەپ تۇيىندەيدى.

«THEDIPLOMAT.COM» پورتالى قازاقستان پرەزيدەنتىنىڭ دەنساۋلىعى تۋرالى اقپاراتتىڭ تاراۋىن وزگەشە توپشىلاعان ەكەن. اتالعان پورتال ءتىلشىسى كاتەرينا پۋتتس (Catherine Putz) ءوز ساراپتاماسىندا نۇرسۇلتان نازارباەۆتىڭ ورتالىق ازياداعى ەڭ ەگدە پرەزيدەنت ەكەندىگىنە توقتالىپ، سالقىن ءتيۋدىڭ سالدارىنا كوڭىل ءبولىپتى.

«قازاقستاندا بيلىك ترانسفەرى قالاي ءوتۋى مۇمكىن؟ بيىل جازدىڭ سوڭىندا وزبەكستان پرەزيدەنتى 78 جاسىندا دۇنيە سالدى. تاجىكستان كوشباسشىسى ەمومولي راحمون 64 جاستا، قىرعىزستان پرەزيدەنتى المازبەك اتامباەۆ 60-تا. ونان كەيىن تۇركىمەنستان باسشىسى بيىل 59-عا كەلدى. ورتالىق ازيا ەلدەرى باسشىلارىنىڭ ىشىندە ەگدە جاستاعى ناعىز ليدەردەن تەك – نۇرسۇلتان نازارباەۆ قالدى. سوندىقتان وسى جولعا رەسمي مالىمدەمەنىڭ تاراۋى – قازاقستاندا بيلىك ترانسفەرىنىڭ ورىن الۋىن اڭعارتسا كەرەك. قر كونستيتۋتسياسىنىڭ 48-بابىنا سايكەس ۋاقىتشا بيلىك تىزگىنى سەنات توراعاسىنا بەرىلەدى. ال بيىل داريعا نۇرسۇلتانقىزى نازارباەۆانىڭ سەنات دەپۋتاتتىعىنا «تاعايىندالۋى» دا بەكەر ەمەس»،-دەيدى اۆتور.  

مەملەكەت باسشىسى نۇرسۇلتان ءابىشۇلىنىڭ سالقىن ءتيىپ، سىرقاتتانىپ قالۋى تۋرالى «UNIINDIA.COM» سايتى دا اقپارات بەرگەن.

ال ازىربايجاندىق «AZERNEWS.AZ» پورتالى «نازارباەۆ سىرقاتتانىپ قالۋىنا بايلانىستى باكۋگە كەلمەيتىن بولدى» دەپ جازادى. الايدا ازىربايجاندىق باق وكىلدەرى قازاقستان ۇكىمەتىنىڭ باسشىسى كىم ەكەنىن ءالى كۇنگە بىلمەيتىن بولىپ شىقتى.

«قر پرەمەر-ءمينيسترى كارىم ءماسىموۆ ەرەۆانداعى ۇجىمدىق قاۋىپسىزدىك كەڭەسىنىڭ سەسسياسىنا قاتىسادى» (Prime Minister of Kazakhstan Karim Massimov will take part in the session within the Collective Security Treaty Organization (CSTO) meeting in Yerevan, he added) دەپ جازادى.

بەلورۋسيالىق «BELARUSPARTISAN.ORG» پورتالى دا بۇل اقپاراتتى بولىسكەن. سونىمەن قاتار، اتالعان پورتالى قازاقستان پرەزيدەنتىنىڭ بەلورۋسياعا ساپارىن كەلەر جىلعا قالدىرعانىن جازادى.

قىرعىزستاندىق «INOZPRESS.KG» پورتالى «سالقىن تيۋ – ساياسي فاكتور» («پروستۋدا» كاك پوليتيچەسكي فاكتور) دەپ جازادى.

نۇرگەلدى ابدىعانيۇلىنىڭ شولۋى

Abai.kz