بۇگىن وبلىس اكىمى جانسەيىت تۇيمەباەۆ ءوڭىردىڭ ءبىر توپ سوعىس، ەڭبەك ارداگەرلەرى جانە زيالى قاۋىم وكىلدەرىمەن كەزدەستى. بۇل تۋرالى "Abai.kz" پورتالى وقو اكىمىنىڭ ءباسپاسوز قىزمەتىنە سىلتەمە جاساي وتىرىپ حابارلايدى.

كەزدەسۋ بارىسىندا وبلىس باسشىسى اعا ۇرپاقتىڭ قوعام ومىرىنە قوسقان ۇلەسىنە شىنايى ريزاشىلىق ءبىلدىرىپ، ۇلكەندى سىيلاۋ، ارداگەرلەرگە قامقورلىق كورسەتۋ كەيىنگى ۇرپاقتىڭ مىندەتى جانە پارىزى ەكەنىن اتاپ ءوتتى.

بەيرەسمي باسقوسۋدا وبلىستىڭ الەۋمەتتىك ماسەلەلەرى تالقىلانىپ، ونىڭ شەشۋ جولدارى بويىنشا ايماق باسشىسى ومىردەن تۇيگەنى مول ەل اعالارىنىڭ  پىكىرىن تىڭدادى.

ازىرگە، وڭتۇستىك قازاقستان وبلىسىنىڭ تىنىس-تىرشىلىگىمەن تانىسىپ جاتقانىن ايتقان وبلىس اكىمى الداعى ۋاقىتتا بىرلەسە اتقاراتىن مىندەتتەردىڭ كوپ ەكەنىن جەتكىزدى.

سونداي-اق، حالىقتىڭ ءال-اۋقاتىن كوتەرۋگە باعىتتالعان جۇمىستاردا ءاربىر سالانىڭ ەڭبەك ارداگەرلەرىمەن جەكە كەزدەسىپ، كەڭەسكىسى كەلەتىنىنە نيەت ءبىلدىردى.

كەزدەسۋ سوڭىندا زيالى قاۋىم وكىلدەرى مەن قازىنالى قاريالار اكىمنىڭ وبلىستى باسقارۋداعى جۇمىسىنا ساتتىلىك تىلەپ، باتالارىن بەردى.

جالپى وبلىستا بۇگىنگى كۇندە 220 مىڭعا جۋىق زەينەتكەر تۇرادى. ولاردىڭ 300-ءى ۇلى وتان  سوعىسىنىڭ ارداگەرى بولسا، 21 مىڭى تىل ەڭبەككەرلەرى.

ايتا كەتەيىك، وسىنىڭ الدىندا وقو اكىمى ءبىر توپ زيالى قاۋىم وكىلدەرىمەن كەزدەسكەنىن حابارلاعان ەدىك.

وقو اكىمىنىڭ ءباسپاسوز قىزمەتى