مۇنداي جاڭالىق تۇركىستاندا ءداستۇرلى تۇردە وتەتىن «اق كەرۋەن» ماقتا تەرىمى شاراسى كەزىندە ايتىلىپ، جۇرتشىلىققا تانىستىرىلدى. وسىلايشا، قاراشىق اۋىلدىق وكرۋگىندەگى «تۇران» شارۋا قوجالىعىندا وتكەن جيىنعا كەلگەن قاتىسۋشىلار، الدىمەن، ماقتا القاپتارىن ارالاۋدان باستادى.

بيولوگيا عىلىمدارىنىڭ دوكتورى A.سۇلتانوۆ پەن اۋىل شارۋاشىلىعى عىلىمدارىنىڭ كانديداتى ءا.اليەۆ سورتتاردىڭ ەرەكشەلىكتەرى تۋرالى اڭگىمەلەپ بەردى. ەرەكشەلىگى سول، بۇل ماقتا تالشىعىنىڭ ۇزىندىعى كادىمگى سۇرىپتاعى ماقتاعا قاراعاندا الدەقايدا جوعارى. ياعني، «تۇركىستان» ماقتاسىنىڭ تالشىعى 4-ۇلگىگە جاتادى. ماقتانىڭ بۇل ءتۇرى توقىما ونەركاسىبىندە كەڭىنەن پايدالانىلادى. ەندى تۇركىستاندىق كاسىپكەرلەر وڭتۇستىكتەگى توقىما كاسىپورىندارىن جەرگىلىكتى شيكىزاتپەن قامتۋعا تولىق كەپىلدىك بەرە الادى.

ايتا كەتەيىك، تۇركىستاندىق ماقتاشىلار بيىل 17 مىڭ توننا ءشيتتى ماقتا جيناۋعا نيەتتى. قالا اكىمىنىڭ ورىنباسارى ت.مۇساەۆتىڭ ايتۋىنشا، تۇركىستاندا وتكەن جىلى 3500 گەكتار جەرگە ماقتا ەگىلسە، بيىل بۇل كورسەتكىش 6600 گەكتارعا ۇلعايعان. 

سونىمەن قاتار، ۇكىمەتتىڭ جەرگىلىكتى جەرلەردە اگروكەشەندەردى دامىتۋ باعدارلاماسى اياسىندا وتكەن جىلى وڭتۇستىك قازاقستان وبلىسى وتىرار اۋدانىندا جالپى قۇنى 450 ميلليون تەڭگە، قۋاتتىلىعى 10 مىڭ توننا ءونىم قابىلداۋعا قاۋقارلى كاسىپورىن اشىلعان-دى. بۇل اۋداندا جۇگەرى داقىلىن سوناۋ 1990 جىلدارداعى كولەمگە جەتكىزۋ جانە جۇگەرى كلاستەرىن دامىتۋ بويىنشا جۇمىستار اتقارۋعا مولىنان مۇمكىندىك اشقان بولاتىن. وسى سالتاناتتى جيىندا اۋدان اكىمى س.پولاتوۆ 2020 جىلعا دەيىن جۇگەرى القابىن 15 مىڭ گەكتارعا جەتكىزۋ جونىندەگى ءىس-شارا جوسپارى بەكىتىلگەنىن ايتقان ەدى. مىنە، وسى جوسپاردى ىسكە اسىرۋ بيىلعى جىلدان باستالىپ كەتتى. وسى جىلى ديقاندار اۋدان برەندىنە اينالعان داقىل ءتۇرىن 7 مىڭ گەكتارعا ەگىپ، گەكتارىنان 120 تسەنتنەردەن ءونىم الىندى. بۇرىندارى شارۋالار جيناعان ءونىمىن كەپتىرە الماي، جازداي ەتكەن ەڭبەگى زايا كەتەتىن. ەندى شارۋالارعا ونىمدەرىن ىسىراپسىز جيناپ الۋىنا مۇمكىندىك تۋدى.

تىڭ تەحنولوگيامەن جۇمىس ىستەيتىن كاسىپورىندا الدىمەن جۇگەرى ءدانى سوبىعىنان الىنىپ، كەپتىرىلەدى. سودان كەيىن قامبالاردا ساقتالادى. كەپتىرەتىن قۇرال-جابدىقتار انگليادان، ساقتاۋ قۇرىلعىلارى قىتايدان ارنايى الدىرىلعان. كاسىپورىندا بۇگىندە 30-عا جۋىق ادام جۇمىس ىستەۋدە. ولاردىڭ كۇندەلىكتى تابىس كولەمى ورتاشا 5-8 مىڭ تەڭگەنى قۇرايدى ەكەن. الداعى ۋاقىتتا ءونىم وتكىزۋ كولەمى ارتاتىن بولسا، جۇمىسشىلار سانى دا كوتەرىلەتىن بولادى.

تۇركىستان قالاسى اكىمىنىڭ ءباسپاسوز قىزمەتى