ەل ءىشى ەلەڭدەپ كۇتىپ جۇرگەن  «قازاق ەلى» تەلەسەريالى ءدال بيىل ەكرانعا جول تارتپاق.

بۇگىن اتالعان جوبانىڭ باس پروديۋسەرى ارمان اسەنوۆ مىرزا Abai.kz پورتالىنا  سۇحبات بەرىپ، اتالعان سەريالدىڭ ناقتى قاي كۇنى جارىق كورەتىنى تۋرالى  اڭگىمەلەپ بەردى.

- ارەكە، سىزبەن سۇحباتتى مىنا سۇراقتان باستاسام دەپ وتىرمىن. «قازاق ەلى» سەريالىنا  قر مادەنيەت جانە سپورت مينيسترلىگى تاراپىنان قازىر قانداي دا ءبىر قولداۋ جاسالىپ جاتىر ما وسى؟

-سۇحباتىمىزدى وسى ساۋالدان باستاعانىڭىز جانە ونى  ماعان قويعانىڭىز وتە ءجون بولدى. سەبەبى مەن – وسى جوبانىڭ باس پروديۋسەرىمىن. ماسەلەنىڭ ءمان-جايىن ناقتى بىلەمىن. نەگىزىنەن جوبانى قولداپ وتىرعان قر مادەنيەت جانە سپورت مينيسترلىگى. سوندىقتان مينيسترلىكتەگى ازاماتتارعا راقمەت ايتۋىمىز كەرەك.

-باستاپقىدا قارجى جەتپەيدى دەپ، جۇرتتان جىلۋ جيناعان ەدىڭىزدەر. قازىر قارجىلاندىرۋ جاعى قالاي؟

-ونداي كەزدەر بولدى، راس. قازىر قارجى ءبولىندى. جۇمىس رەتىمەن ءجۇرىپ جاتىر.

-قانشا ءبولىندى جانە قايدان؟

-نەگىزى ەڭ باسىندا مينيسترلىكتەن 1 ميلليارد تەڭگە بولىنگەن. ول قارجى ءوز ورنىمەن جۇمسالدى. كەيىن قارجىلىق قيىندىقتار بولعان سوڭ، ءبىز قوسىمشا قارجى سۇرادىق. مينيسترلىك قوسىمشا تاعى اقشا ءبولدى. 

-الماتى قالاسى اكىمشىلىگى دە ارالاسىپ، ءبىراز قارجى تابىلعان ەدى عوي.

-ءيا، الماتى قالاسى اكىمشىلىگى ۇسىنىس جاساپ، «بازيسا» كومپانياسى 180 ميلليون تەڭگە ءبولدى. ودان بولەك، «Freedom Finance» ۇيىمى دا 100 ميلليون بەردى. وسىنىڭ بارلىعىن مادەنيەت مينيسترلىگى ۇيىمداستىردى.

- سونىمەن ءتۇسىرىلىم جۇمىستارى اياقتالعانى بەلگىلى. وتكەن جولى رەجيسسەر رۇستەم ابدىراشەۆپەن سويلەسكەنىمىزدە، مونتاجداۋ جۇمىستارى ءجۇرىپ جاتقانىن ايتىپ ەدى...

-راس، ءبىرىنشى ماۋسىمنىڭ تۇسىرىلىمدەرى اياقتالدى. ءتىپتى، مونتاجداۋ جۇمىستارى دا مارەگە جەتىپ قالدى. بۇيىرسا بيىل «قازاق ەلى» سەريالى ەكرانعا جول تارتادى دەپ جوسپارلاپ وتىرمىز. ال ءتۇسىرىلىم جۇمىستارىنا كەلەر بولساق، ول اياقتالعان جوق. سەبەبى، ءبىز جوبانىڭ ەكىنشى ماۋسىمىن شىعارماقپىز. بۇل باعىتتا باتىستا كوپتەگەن سەريالدار ءتۇسىرىلىپ جاتىر عوي. سول سەكىلدى، «قازاق ەلى» سەريالى جۇرتتى تاڭ قالدىرىپ، تامساندىراتىن قازاق كينوگەرلەرىنىڭ تۇڭعىش تۋىندىسى بولادى دەپ ويلايمىز.

-دەمەك، بۇل باتىستىق فورماتتاعى ەكشن-سەريال بولماق قوي... مىسالى، «تاقتار ويىنى»...

-ءيا، ءدال سولاي. ءبىزدىڭ ەلدە بۇل جانردا، بۇل فورماتتا سەريال تۇسىرىلگەن جوق. باتىستا، باتىستى قويىپ دۇنيەجۇزىندە سۇرانىسقا يە بولىپ وتىرعان «تاقتار ويىنى» فورماتىندا دايىندالدى. ەگەر «تاقتار ويىنى» سەريالىندا كوپ ەپيزودتار كومپيۋتەرلىك گرافيكامەن دايىندالسا، بىزدە ءبارى تابيعي بولادى. «تاقتار ويىنى» سەريالىندا فانتاستيكا باسىم، كەيىپكەرلەر ويدان شىعارىلعان. ال ءبىزدىڭ سەريالدا ءبارى شىن كەيىپكەرلەر. ومىردە بولعان، وقيعالار دا تاريحي دەرەكتەر بويىنشا  تۇزىلگەن. ايتا كەتەيىن، بىزدە بۇرىن-سوڭدى مۇنداي سەريالدار بولعان جوق. سوندىقتان ءبىز بارىمىزدى سالدىق.

-«تاقتار ويىنىنا» الەمدىك دەڭگەيدە سۇرانىس جوعارى. ال ءبىزدىڭ «قازاق ەلى» سەريالى الەمدىك پروكاتتا باسەكەلەسە الا ما؟

-بىلەسىز بە؟ بىزگە كوپتەگەن شەتەلدىك تەلەارنالار حابارلاسىپ جاتىر. مىسالى، بەرىسى رەسەي مەن ۋكراينا ءبىزدىڭ سەريالدى ساتىپ الۋعا ۇسىنىس جاساپ ۇلگەردى. ماسەلەنكي، قازىر ورت ارناسىمەن كەلىسسوزدەر جۇرگىزىلۋدە. ارىسى باتىستىڭ تەلەارنالارى حابارلاسىپ، سەريالدىڭ قاشان دايىن بولاتىنىن سۇراپ وتىر. «NBC»  باستاعان باتىس ەلدەرى ارنالارى كوپتەپ حابارلاسۋدا. ء«ال جازيرا» ارناسى دا ءبىزدىڭ سەريالدى ساتىپ الۋعا كەلىستى. سەبەبى، باتىس پروكاتىنداعى سەريالداردىڭ كوپشىلىگى كومپيۋتەرلىك گرافيكامەن تۇسىرىلەدى. ال بىزدە شىنايى كەيىپكەرلەر، شىنايى  تابيعات اياسى. جاسىل فوندى قولدانبادىق. سوندىقتان «قازاق ەلى» سەريالىنىڭ ساپاسى دا، اسەرى دە ەرەكشە بولماق.

- فيلم بىلتىر، قازاق حاندىعىنىڭ 550 جىلدىعى اياسىندا كورسەتىلۋى كەرەك ەدى. بىزگە بەلگىلى، بەلگىسىز سەبەپتەرمەن كەشىگىپ، انە-مىنە دەپ ءجۇرىپ، بيىل عانا ءازىر بولعان سياقتى. نەگە؟

-راس ايتاسىز، سەريالىمىز بەلگىلى سەبەپتەرمەن كەشىگىپ قالدى. دەگەنمەن بيىلعى جىل دا قازاق حالقى ءۇشىن ايتۋلى داتالارمەن سايكەس كەلەدى. تاۋەلسىزدىگىمىزدىڭ 25 جىلدىعىن اتاپ وتكەلى وتىرمىز.  جەلتوقسان كوتەرىلىسىنە دە 30 جىل تولدى.

-سونىمەن سەريالدى قاشان كورەمىز؟

-بيىلعى جىلدىڭ 16-جەلتوقسانىندا «قازاق ەلى» سەريالىنىڭ كينو نۇسقاسى كورەرمەنگە جول تارتادى. العاشقى كورسەتىلىمى استانا قالاسىندا «قازاقستان» كونتسەرت زالىندا، الماتى قالاسىندا «رەسپۋبليكا» سارايىندا وتكىزىلەدى. ال 17 جەلتوقسان كۇنى ەلىمىزدىڭ بارلىق كينوتەاترلارىندا «قازاق ەلى» سەريالىنىڭ كينونۇسقاسى شىعادى. كينو نۇسقانىڭ ۇزاقتىعى 2 ساعات.  سەريالدى كورگەن ادامنىڭ وكىنبەيتىنىنە بەك سەنىمدىمىن.

-ال سەريال شە؟

-كەز كەلگەن سەريالدى تۇسىرگەن سوڭ، الدىمەن ونىڭ كينو نۇسقاسى كورسەتىلىمگە شىعارىلادى. ءبىز دە سولاي ىستەدىك. ال سەريالعا كەلەر بولساق، جەلتوقسان ايىندا، جاڭا جىلعا قارسى ەكى اپتالىق دەمالىس بولادى. ءدال سول كەزدە ءبىز سەريالدى كورسەتپەكپىز.

-قانشا سەريال ءتۇسىرىلدى؟

-«قازاق ەلى» سەريالىنىڭ العاشقى ماۋسىمىنا 10 سەريال ءازىر. ءار سەريالدىڭ ۇزاقتىعى 40-45 مينۋتتان تۇرادى.

-العاشقىدا كوپ سەريالى دەگەن ەدى... دايىن بولعانى 10 ءبولىم ەكەن. وسى 10 ءبولىمدى ەكى جىل تۇسىردىڭىزدەر مە؟

-نەگىزى قازىر ءبىز «قازاق ەلىنىڭ» ەكىنشى ماۋسىمىن دايىنداپ جاتىرمىز. العاشقىدا «ماڭگىلىك ەل» باعدارلاماسى اياسىندا 100 ءبولىم دەپ جوسپارلانعان بولاتىن. بەلگىلى سەبەپتەرمەن ءتۇسىرىلىم جۇمىستارى كەشىكتى. سوندىقتان ءبىز العاشقى ماۋسىمدى 10 سەريامەن باستايمىز. سوسىن ەكىنشى ماۋسىم، ءۇشىنشى ماۋسىم بولىپ جالعاسا بەرەدى.

 -جاقسى،  ارەكە، ىسكە ءسات!

-سىزدەرگە دە راقمەت!

سۇحباتتاسقان - نۇرگەلدى ابدىعانيۇلى

Abai.kz