6 قازان كۇنى قازاقستان پرەزيدەنتى نۇرسۇلتان نازارباەۆتىڭ قاۋلىسى بويىنشا "مەملەكەتتىك باسقارۋ جۇيەسىن جاڭعىرتۋ جانە ونىڭ تيىمدىلىگىن ارتتىرۋ ماقساتىندا" قورعانىس جانە اەروعارىش ونەركاسىبى مينيسترلىگىنىڭ قۇرىلعانى جاريالاندى.

قازاقستان پرەزيدەنتىنىڭ رەسمي ۆەبسايتىندا شىققان اقپاراتقا سايكەس جاڭا مينيسترلىكتىڭ قىزمەتى "قورعانىس، اەروعارىش ونەركاسىبى جانە ەلەكتروندىق ونەركاسىپ، اقپاراتتاندىرۋ جانە بايلانىس سالاسىنداعى اقپاراتتىق قاۋىپسىزدىك (كيبەرقاۋىپسىزدىك)" سالالارىن قامتيدى. مەكەمەنىڭ نەگىزگى باسشىلىق باعىتتارى "بىرىڭعاي اسكەري-تەحنيكالىق ساياساتتى جانە اسكەري-تەحنيكالىق ىنتىماقتاستىقتى جۇرگىزۋگە قاتىسۋ، قورعانىستىق تاپسىرىستى قالىپتاستىرۋ، ورنالاستىرۋ جانە ورىنداۋ" دەپ كورسەتىلگەن.

جاڭا مينيسترلىكتىڭ قۇرامىنا قورعانىس مينيسترلىگىنەن – قورعانىس ونەركاسىبى سالاسىنداعى، ينۆەستيتسيالار جانە دامۋ مينيسترلىگىنەن – عارىش قىزمەتى سالاسىنداعى، ۇلتتىق ەكونوميكا مينيسترلىگىنەن – جۇمىلدىرۋ دايارلىعى جانە جۇمىلدىرۋ، مەملەكەتتىك ماتەريالدىق رەزەرۆتى قالىپتاستىرۋ جانە دامىتۋ سالاسىنداعى وكىلەت بەرىلگەن.

قورعانىس جانە اەروعارىش ونەركاسىبى مينيسترلىگىنە پرەمەر-مينيستر كەڭسەسىنەن – اقپاراتتىق قاۋىپسىزدىكتى قامتاماسىز ەتۋ، اقپارات جانە كوممۋنيكاتسيالار مينيسترلىگىنەن - اقپاراتتاندىرۋ جانە بايلانىس سالاسىنداعى اقپاراتتىق قاۋىپسىزدىكتى قامتاماسىز ەتۋ فۋنكتسيالارى كوشەدى.

اباي-اقپارات