دۇيسەنبى, 23 قىركۇيەك 2019
كاسىپ-ءتۇبى ءناسىپ 2663 0 پىكىر 2 قازان, 2016 ساعات 13:42

"جىبەك جولى" وتاندىق ءتۋريزمنىڭ برەندى بولۋى ءتيىس

ەجەلگى جىبەك جولىن جاڭاشا جاڭعىرتۋ ەلدەگى تۋريستىك سالانىڭ عانا ەمەس، باسقا سالالاردىڭ دامۋىنا دا سەرپىن بەرمەك.

ەلوردالىق تۋريزم قاۋىمداستىعىنىڭ باسشىسى رىستى قاراباەۆا استانادا وتكەن قازاقستان-قىتاي فورۋمىندا: ء«بىز قىتاي تۋريستەرىن نەمەن قىزىقتىرا الامىز؟ مەنىڭ ويىمشا، ءبىزدىڭ برەندىمىز جىبەك جولى – قازاقستان بولا الادى. ەگەر جىبەك جولى دالىزدەرىن قاراپ وتىرساڭىز، 2014 جىلدان بەرى قازاقستان ارقىلى  چانان-تيان-شان ءدالىزى وتەدى. ەگەر جىبەك جولىنىڭ ساۋدا نارىعىنا قاراساق، ول جاقتا قازاقستان مۇلدە بولماعانداي: قازاقستانعا سوقپاي وتەتىن قىرعىزستان، وزبەكستان بىرىكتىرىلگەن باعىتى ءجۇرىپ وتەدى، ودان ارى قاراي قىتاي. وسى ولقىلىقتىڭ ورنىن تولتىرىپ، جىبەك جولىنداعى وزىمىزگە تيەسىلى ورىندى يەمدەنەتىن كەز كەلدى دەپ ويلايمىن»، – دەپ مالىمدەدى.

جىبەك جولىنىڭ قازاقستاندىق دالىزىندە كونە قالالار وتە كوپ. ولار نەگىزىنەن جەتىسۋدا، تارازدا جانە الماتى وبلىسىندا ورنالاسقان. ولاردىڭ كوبى يۋنەسكو-نىڭ مادەني مۇرالارىنىڭ تىزىمىنە ەنگەن. «اتالعان قالالاردى كورىكتەندىرىپ، تۋريستىك باعىتتارعا قوسۋ قاجەت»، – دەدى قاۋىمداستىق باسشىسى.

سونىمەن قاتار فورۋمدا ءسوز العان شىعىس قازاقستان وبلىسى اكىمدىگى تۋريزم باسقارماسىنىڭ باسشىسى جاسۇلان سارسەباەۆ جىل سايىن استانادا جىبەك جولىنىڭ ەكونوميكالىق بەلدەۋىنە قاتىسۋشى ەلدەردىڭ تۋريستىك فورۋمدارى مەن كورمەلەرىن وتكىزىپ تۇرۋدى ۇسىندى. «جىبەك جولىنىڭ ەكونوميكالىق بەلدەۋىن قۇرۋ تۋرالى يدەيانى سين تسزينپين مىرزا 2013 جىلى العاش رەت استانادا ايتقاندىعىن اتاپ ءوتۋىمىز قاجەت. قىتايدىڭ سىرتقى ساياساتىن تۇسىنەمىز، ولار ءۇشىن جىبەك جولىن جانداندىرۋ ستراتەگيالىق جاعىنان ماڭىزدى. وسى ارىپتەستىكتى جانداندىرۋ ءۇشىن بىزگە مۇنداي شارانى استانادا وتكىزۋ ءتيىمدى»، – دەدى ول.

تالقىلاۋدا مودەراتور بولعان «اتامەكەن» قر ۇكپ باسقارما توراعاسىنىڭ ورىنباسارى يۋليا ياكۋپباەۆا وسى ۇسىنىستى فورۋمنىڭ قارارىنا قوسۋعا ۋادە بەردى.

Abai.kz

0 پىكىر