"ەلباسى كەلە جاتىر" دەگەن حابار جەتسە بولدى، شەنەۋنىكتەردەن مازا كەتەدى. بۇرىن-سوڭدى جوندەۋ كورمەگەن جولدار جوندەلىپ، ەسكى ۇيلەردىڭ سىرتى اقتالىپ، كوشەلەر تازالانىپ، بۇكىل حالىق بولىپ ابىگەرگە ءتۇسىپ-اق جاتقانى. بۇل - بۇعان دەيىن دە تالاي ايتىلعان، تالاي جازىلعان ماسەلە. دەسەك تە، وسى جولى قىزىلوردالىقتاردىڭ دايىندىعى تالاي قازاقتى تاڭداي قاقتىرىپ جاتقان كورىنەدى. 

كەشە كتك ارناسى ەلباسىن تاعاتسىزدانا كۇتكەن قىزىلوردالىق شەنەۋنىكتەردى سىن تەزىنە الدى. پرەزيدەنتتىڭ ساپارى قارساڭىندا جەرگىلىكتى اتقامىنەرلەر شاھاردىڭ كەمشىل تۇستارىن جاسىرىپ الەك بولىپ جاتىر ەكەن. تەك جاقسى قىرىنان كورىنۋدى قالايتىن ولار قۇلاعالى تۇرعان ۇيلەردىڭ سىرتىن، ياعني كوشە جاق بەتىن جارتىلاي بوياپ، جول بويىنداعى ەسكى اۋىلدى مۇلدەم قورشاپ تاستاپتى. قازىر كوشە جاق بەتى بۇتىندەلگەنمەن، ءىشى ادام شوشىرلىق ۇيلەر قۇلاعالى تۇرعان كورىنەدى.

قىزىلوردا ساپارى بارىسىندا پرەزيدەنتتى تيتوۆ قىستاعى ماڭىنداعى اينەك زاۋىتىنا اپارۋ جوسپارلانعان ەكەن. ەندى جولاي سۇرقى قاشقان سول اۋىلدى مارتەبەلى مەيمانعا كورسەتپەۋ ءۇشىن اكىم-قارالار قاڭىلتىر دۋالمەن قورشاپ تاستاعان.

ءبىر كەزدەرى وسى قىزىلوردا وبلىسى پرەزيدەنت كەلەردە مۇعالىمدەرگە كوشەنىڭ ءشوبىن جۇلعىزىپ، ەلدى دۇرلىكتىپ ەدى. 

بۇل جولعى كوزبوياۋشىلىق تا ءبىراز شىندىقتىڭ بەتىن اشاتىن بولدى. 

مۇنداي دايىندىق تەك قىزىلوردادا عانا جاسالمايدى. پرەزيدەنت باراتىن مەكەننىڭ ءبارى ەلباسى كەلەردە شالا-شارپى بولسىن جوندەۋدەن ءوتىپ، بەتى بەرى قاراپ قالاتىنى بەلگىلى. وسىنداي جاعدايلارعا قاراپ وتىرىپ، "شىركىن، ەلباسى بۇكىل قازاقستانداعى اۋىل-اۋدانداردىڭ ءبىرىن قالدىرماي ارالاپ شىقسا عوي. تالاي جەرگە كورىك كىرىپ، ادەمىلەنىپ قالار ەدى" دەپ ويلايمىز. 

جالپى، كەيدە بىزگە شەنەۋنىكتەر حالىق ءۇشىن ەمەس، ەلباسى ءۇشىن عانا جۇمىس جاسايتىنداي كورىنەدى.

ءشارىپحان قايسار

Abai.kz