ءسىز قاي ەلدىڭ ءمينيسترىسىز؟
قۇرمەتتى راشيد تولەۋتايۇلى!
ءسىزدىڭ مينيسترلىك قازاقستانداعى ادامداردى يدەنتيفيكاتسيالايتىن بىردەن ءبىر مەملەكەتتىك ورگان بولعاندىقتان، قازاقتاردىڭ اتى-ءجونىنىڭ راسىمدەلۋىنە بىردەن ءبىر جاۋاپتى بولىپ تابىلادى. الايدا، ءسىز الەمدەگى ەكى جۇزگە تارتا مەملەكەتى بار ۇلتتىڭ بىرىنە جاتاتىن قازاق حالقىنىڭ بۇگىنگى اسا كۇردەلى جاعدايداعى ونيم ماسەلەسىنەن بەيمالىم بولارسىز. بىراق بۇل ماسەلە قازاق ورتاسىندا ابدەن جاۋىر بولعان جايت. ەگەر ءسىز بۇل ماسەلەدەن حاباردار بولساڭىز، وندا كەيبىر قازاقشا ەسىمنىڭ نەمەسە تەكتىڭ كەمىندە جيىرما ءتۇرلى بۇرمالانىپ، ورىس تىلىندەگى تولقۇجاتتارعا ءتۇسىپ، قور بولىپ وتىرعانىنا نازار اۋدارعان بولار ەدىڭىز، ءتىل ماماندارىنىڭ داۋىسى قۇلاعىڭىزعا جەتكەن بولار ەدى.
ارينە، ءاربىر بالانىڭ، ازاماتتىڭ اتى-جونىندە ءسىزدىڭ مينيستر رەتىندە ءىسىڭىز بولماۋى مۇمكىن جانە ول اركىمنىڭ جەكە قۇقىعى دا، شارۋاسى دا. الايدا، ءوزىنىڭ تاۋەلسىز ەلىندە ءومىر ءسۇرىپ، اتى-ءجونىن انا تىلىندە راسىمدەي الماي وتىرعان قازاق دەگەن حالىقتان حاباردار بولۋ - ءسىزدىڭ ازاماتتىق پارىزىڭىز عانا ەمەس، مەملەكەتكە مايەك بولىپ وتىرعان قازاق ۇلتىنىڭ الدىنداعى مىندەتىڭىز بولار ەدى.
قۇرمەتتى راشيد تولەۋتايۇلى!
ءسىزدىڭ مينيسترلىك قازاقستانداعى ادامداردى يدەنتيفيكاتسيالايتىن بىردەن ءبىر مەملەكەتتىك ورگان بولعاندىقتان، قازاقتاردىڭ اتى-ءجونىنىڭ راسىمدەلۋىنە بىردەن ءبىر جاۋاپتى بولىپ تابىلادى. الايدا، ءسىز الەمدەگى ەكى جۇزگە تارتا مەملەكەتى بار ۇلتتىڭ بىرىنە جاتاتىن قازاق حالقىنىڭ بۇگىنگى اسا كۇردەلى جاعدايداعى ونيم ماسەلەسىنەن بەيمالىم بولارسىز. بىراق بۇل ماسەلە قازاق ورتاسىندا ابدەن جاۋىر بولعان جايت. ەگەر ءسىز بۇل ماسەلەدەن حاباردار بولساڭىز، وندا كەيبىر قازاقشا ەسىمنىڭ نەمەسە تەكتىڭ كەمىندە جيىرما ءتۇرلى بۇرمالانىپ، ورىس تىلىندەگى تولقۇجاتتارعا ءتۇسىپ، قور بولىپ وتىرعانىنا نازار اۋدارعان بولار ەدىڭىز، ءتىل ماماندارىنىڭ داۋىسى قۇلاعىڭىزعا جەتكەن بولار ەدى.
ارينە، ءاربىر بالانىڭ، ازاماتتىڭ اتى-جونىندە ءسىزدىڭ مينيستر رەتىندە ءىسىڭىز بولماۋى مۇمكىن جانە ول اركىمنىڭ جەكە قۇقىعى دا، شارۋاسى دا. الايدا، ءوزىنىڭ تاۋەلسىز ەلىندە ءومىر ءسۇرىپ، اتى-ءجونىن انا تىلىندە راسىمدەي الماي وتىرعان قازاق دەگەن حالىقتان حاباردار بولۋ - ءسىزدىڭ ازاماتتىق پارىزىڭىز عانا ەمەس، مەملەكەتكە مايەك بولىپ وتىرعان قازاق ۇلتىنىڭ الدىنداعى مىندەتىڭىز بولار ەدى.
ءسىز باسقارىپ وتىرعان مينيسترلىكتىڭ بۇگىنگى قىزمەت ءداستۇرى بويىنشا، قازاقستان ازاماتتارى وزدەرى جالىنىپ-جالپايىپ بولماسا تالاپ ەتپەيىنشە، مەملەكەتتىك تىلدەگى كۋالىك پەن تولقۇجات الۋ مۇمكىن ەمەس، ەسەسىنە رەسەيدىڭ مەملەكەتتىك تىلىندەگى جانە ورىس داستۇرىنە نەگىزدەلگەن اتى-ءجوندى ارقالاۋ قازاقتاردىڭ زاڭدى تۇردە بەكىگەن سىباعاسى ىسپەتتى. سوندا مەملەكەتتىك تىلدە قۇجاتىن راسىمدەي المايتىن ادام ءوزىن قاي ەلدىڭ ازاماتى سەزىنۋى كەرەك دەپ ويلايسىز؟ ال، ءسىز ازاماتتارىن وگەي داستۇرمەن راسىمدەيتىن ورگان باسشىسى بولا تۇرىپ، ءوزىڭىزدى قاي ەلدىڭ ءمينيسترى سەزىنەسىز؟
ءسىزدىڭ ويىڭىزشا، ورىس ۇلگىسىندەگى اتى-جوننەن اجىراماۋ - قازاقتىڭ ماڭدايىنا جازىلعان زاڭ با، الدە كۇناھارلىق بەلگىسى مە؟ تاۋەلسىزدىگىنە جيىرما جىل تولعالى وتىرعان ۇلتتىڭ قۇلدىق بەلگىسىندەي «وۆ» پەن «يچتەن» اجىراۋ سونشالىقتى قاۋىپتى مە؟ نورماتيۆتىك-قۇقىقتىق جاعداي كوتەرمەسە، ءسىزدىڭ مينيسترلىك نەگە باستاما جاساپ، ءوز مىندەتىن اتقارمايدى؟ ەلدەگى ازاماتتاردىڭ سەكسەن پايىزى تۇركىتەكتى جاندار بولا تۇرىپ، سلاۆيانتەكتى ونيممەن راسىمدەلۋ قانداي ىرىم، قانداي اكت؟ ءبىر ەلدىڭ ازاماتتارى الا-قۇلا تىلدە نەگە راسىمدەلەدى؟
مينيستر مىرزا! اتالعان ماسەلە، ءاتۇستى قارايتىنداي ۇساق-تۇيەك نارسە ەمەس، ءتىپتى، زاڭنان تىس تا جايت ەمەس! قازاقستاندىق كۋالىك پەن تولقۇجاتتا بارلىق ازاماتتاردىڭ اتى-جوندەرى اۋەلى مەملەكەتتىك تىلدە راسىمدەلىپ، قوسىمشا ورىس جانە اعىلشىن تىلدەرىندە ترانسكريپتسيالانۋى مۇمكىن! ەلدەگى بارلىق اكتىلەر ەڭ اۋەلى مەملەكەتتىك تىلدە راسىمدەلۋ ءتيىس ەكەندىگىن جاقسى بىلەسىز، بىراق بۇل جايت بويىنشا قوردالانعان ماسەلەنى قاراستىرماۋ مەملەكەتتىك مۇددەنى اياقاستى ەتۋ ەمەس پە؟! قازاق اتىنان مينيستر بولىپ وتىرعان سىزگە ەشقانداي قاتىسى جوق پا؟ ءسىزدىڭ مينيسترلىك نەگە قوعامدىق ەليتا مەن ءتىل ماماندارىن قاتىستىرىپ، ماسەلەنى قولعا المايدى؟
قويا بەرسەك، ساۋال كوپ. بۇكىل ۇلتتىڭ اتىنان سويلەۋگە، ونىڭ جوعىن جوقتاۋعا مەنىڭ قاقىم جوق، بىراق قازاق دەگەن سۇراۋسىز حالىق تا جوق ەمەس ەكەنىن ءسىز دە ەسكەرۋىڭىز كەرەك.
ساعات ەسماحانۇلى، قازاقستان رەسپۋبليكاسى ازاماتى
