وڭتۇستىك قازاقستان وبلىسى شاردارا اۋدانى اقشەڭگەلدى اۋىلى مالشىلىقپەن پەن ديقانشىلىقتى قاتار يگەرىپ كەلە جاتقان بەرەكەلى اۋىل. اسىرەسە، اۋىل ديقاندارى ءونىمنىڭ بارلىق ءتۇرىن ەگۋمەن اينالىسىپ، ناپاقاسىن جەر-انادان ايىرىپ كەلەدى. بيىل شارۋا قوجالىقتارى تاۋەلسىزدىكتىڭ 25 جىلدىعىنا اۋىل شارۋاشىلىعى ونىمدەرىنىڭ 25 ءتۇرىن شىعارىپ، كورمەگە ۇسىندى.

«راحىم» شارۋا قوجالىعىنىڭ ءتورايىمى امانكۇل نايمانباي ينتەنسيۆتى باق رەتىندە وتىرعىزعان الماسى مەن ايۆاسىن اكەلگەن ەكەن. باعبان كەلىنشەك: «5 گەكتار القاپقا جەمىس اعاشتارىن وتىرعىزعان ەدىك، ەندى ءونىمىن الىپ جاتىرمىز. جاز بويى الما ونىمدەرىن اۋىل اراسىنا قولجەتىمدى باعامەن وتكىزدىك. المامىز ءالى جاس، الداعى ۋاقىتتا ءونىم كولەمى ارتا تۇسەدى دەپ وتىرمىز. ءونىمدى وتكىزۋدە ەشقانداي پروبلەما جوق، حالىق ءتاتتى المانى جاقسى الىپ جاتىر، - دەيدى. 

اۋىل حالقى دا «بۇل جاقسى بولىپ قالدى. وزىمىزدە وندىرىلگەن، قوسپاسىز، تازا المانى توي-تومالاققا ەشقايدا سابىلماي-اق اۋىلدان الىپ جاتىرمىز» دەپ ريزاشىلىقتارىن بىلدىرەدى. وسى اۋدانعا قاراستى «التىنبەك» قوجالىعىنىڭ الماسى، ء«تاجىحان» شارۋاشىلىعىنىڭ قىرىقپا قاۋىنى، «سالىقباي» شارۋاشىلىعى وندىرگەن ءجۇزىم، جەرجاڭعاق داقىلدارى، «ورال» شارۋاشىلىعىنىڭ قارا داربىزى، «بەيبىت» شارۋاشىلىعىنىڭ ءسابىز، ماش، پىستە، پياز ونىمدەرى، «جاندوس» شارۋا قوجالىعىنىڭ قىزىناق، قيار، بولگار بۇرىشى كوكونىستەرى، «شاپاعات» شارۋاشىلىعى وندىرگەن بيداي مەن جۇگەرىسى جەرگىلىكتى حالىقتىڭ ماقتاۋىنا، اۋدان باسشىلىعىنىڭ ماراپاتىنا يە. بەرەكەلى اۋدان قۇنارلى جەرىنىڭ ونىمىمەن الداعى ۋاقىتتا ءوڭىر حالقىن عانا ەمەس كورشى باسقا دا وبلىستاردى قامتاماسىز ەتۋدى ويلاستىرىپ وتىر. 

Abai.kz