بۇگىن الماتى قالاسىندا IV حالىقارالىق فورۋم باستالدى. حالىقارالىق ەكونوميكالىق فورۋمعا الماتى قالاسىنىڭ اكىمى باۋىرجان بايبەك، قر ۇب توراعاسى دانيار اقىشەۆ، UBS  «Asset Management» ستراتەگيالار جانە جاھاندىق نارىقتار بويىنشا باسشىسى ماسسيميليانو كاستەلي مەن «Sanlas hoiding» كومپانياسىنىڭ نەگىزىن قالاۋشى گيۋنتەر نەبەل سەكىلدى ساراپشىلار قاتىسۋدا. جالپى فورۋمعا بەدەلدى ساياساتكەرلەر، الەمدىك جانە وتاندىق بيزنەس كوشباسشىلارى، ينۆەستيتسيالىق كورپوراتسيالار باسشىلارى، قارجى ينستيتۋتتارى مەن حالىقارالىق ۇيىمداردان بارلىعى 500-گە تارتا جوعارعى قىزمەتتەردەگى ماماندار كەلدى.

ەل تاۋەلسىزدىگىنىڭ 25 جىلدىعىنا وراي ۇيىمداستىرىلعان فورۋمدا الماتى قالاسىنىڭ ەكونوميكالىق الەۋەتى، شاعىن جانە ورتا بيزنەس وكىلدەرىنە جاسالىپ جاتقان مەملەكەتتىك قولداۋدىڭ تەتىكتەرى تالقىلاندى. فورۋم بارىسىندا فورۋمعا قاتسۋشى نەگىزگى تۇلعالار تومەندەگى جايتتاردى ورتاعا سالدى.

باۋىرجان بايبەك، الماتى اكىمى:

-  بۇل فورۋم ەل تاۋەلسىزدىگىنىڭ 25 جىلدىعىنا وراي ۇيىمداستىرىلىپ وتىر. بۇگىندە الماتى بيزنەس پەن جەكە كاپيتالدىڭ، مادەنيەتتىڭ ورتالىعىنا اينالدى. وسى جىلدار ىشىندە قالا بيۋدجەتى 41 ميلليارد دوللارعا دەيىن جەتتى. بۇل ەلىمىزدىڭ مۇنايدان بولەك كىرىستەرىنىڭ 1/3 بولىگىن قۇرايدى. قالادا شاعىن جانە ورتا بيزنەس 130 ەسەگە ءوسىپ، 183 مىڭعا جەتتى، ونىڭ 14 مىڭى شەتەلدىك كاپيتالدىڭ كاتىسۋىمەن جۇمىسىن جۇرگىزىپ وتىر. سوڭعى 5 جىلدا الماتى 2 ەسەگە ءوستى. مەگاپوليس حالقى اگلومەراتسيا تۇرعىندارىن قوسقاندا 3 ميلليونعا جەتتى. الماتى - ۇلى جىبەك جولىنداعى 1000 جىلدىق تاريحى بار قالا. تاۋەلسىزدىك جىلدارى قالانىڭ ينفراقۇرىلىم سالاسىنا 3 ملرد دوللاردان استام قارجى جۇمسالدى. اتاپ ايتقاندا، قالادا 28 جولايرىق سالىندى. كەلەسى جىلى 4 جولايرىق پەن ۇلكەن جولدار قۇرىلىسىن جالعاستىرامىز.

الماتىدا ينۆەستيتسيا تارتۋدىڭ درايۆەرى - تۋريزم سالاسى. ەلىمىزگە كەلگەن ەكىنشى شەتەلدىك تۋريست الماتىعا سوقپاي كەتپەيدى. الماتىدا جوعارعى ساپاداعى 2000 مەيرامحانا قوناقتاردى قابىلداۋعا دايىن. الداعى ۋاقىتتا الماتى حالىقارالىق اۋەجايىن كەڭەيتۋ، ماشينا جاساۋ كاسىپورىندارىنا، حيميالىق فارماتسەۆتيكاعا كوڭىل بولىنبەك. بيىل الماتى الەمنىڭ 600 ءىرى مەگاپوليسىنىڭ قاتارىنا كىردى.  الماتى بيزنەسىنىڭ 88 پايىزىن سەرۆيستىك قىزمەت تۇرلەرى قۇرايدى.  سونداي-اق، الەمنىڭ ەڭ ۇزدىك برەند يەلەرى ءبىزدىڭ قالامىزدا جۇمىس جاساپ جاتىر. سونىڭ ءبىرى كۇنى كەشە عانا ەلباسى نۇرسۇلتان ءابىشۇلى تەلەكوپىر بارىسىندا ىسكە قوسقان «Tokyo Rope Almaty» زاۋىتى. بۇگىنگى جيىنعا اتالعان كومپانيا باسشىسى دا قاتىسىپ وتىر. الماتىدا ينۆەستورلار ءۇشىن بارلىق جاعداي جاسالعان. ەلىمىز 30 جىلعا دەيىن كەدەرگىسىز تابىس تابۋعا كەپىلدىك بەرەدى.

ماسسيميليانو كاستەلي، UBS  «Asset Management» ستراتەگيالار جانە جاھاندىق نارىقتار بويىنشا باسشىسى:

-بۇدان بىرنەشە جىل بۇرىن الماتىعا كەلگەن ەدىم. ول كەزدە ءبارى باسقاشا ەدى. بۇگىندە الماتى قاتتى وزگەرگەن. مۇندا بيزنەسپەن اينالىسۋ ءۇشىن بارلىق جاعداي جاسالعان. 3 ميلليونداي حالىق پەن تولاسسىز كەلىپ جاتقان تۋريستەر كەز كەلگەن كاسىپكەردىڭ نارىعى ءام اۋديتورياسى. قالانىڭ ەكونوميكالىق دامۋ دەڭگەيى ايتارلىقتاي وسكەن. ءتىپتى ءبىر عانا الماتىنىڭ ءجىو كورسەتكىشى رەسپۋبليكانىڭ 20 پايىزىن قۇرايدى.  مەملەكەتتەن كورسەتىلىپ جاتقان قولداۋ تاعى بار. قازاقستان حالىقارالىق  «doing business» رەيتينگىسىندە 6 پايىزعا جوعارىلاپ، ۇزدىك ناتيجە كورسەتتى. مۇندا قازاقستاننىڭ ەڭ ۇلكەن قالاسى – الماتىنىڭ ۇلەسى ايتارلىقتاي ەكەنى داۋسىز.  مەن ءبىر عانا مىسال كەلتىرەيىن. الماتىنىڭ بۇگىنگى ەكونوميكالىق دەڭگەيى – قىرعىزستان، تاجىكستان مەن گرۋزيا سىندا ەلدەردەن جوعارى.

رەداكتسيادان: اتالعان فورۋم ەرتەڭ دە جالعاساتىن بولادى.  فورۋم بارىسىندا الماتى قالاسىنىڭ ينۆەستيتسيالىق احۋالىن جاقسارتۋ بويىنشا ينۆەستورلاردى تارتۋ جونىندەگى كەڭەستىڭ ءماجىلىسى وتكىزىلدى. سونداي-اق ينۆەستيتسيالىق مەموراندۋمعا قول قويىلدى.

فورۋمنىڭ باستى ماقساتى – الماتى قالاسىن ورتالىق ازيا كەڭىستىگىندە جاھاندىق كورپوراتسيالار مەن ريتەيلەرلەر ءۇشىن ەكونوميكالىق جانە ىسكەرلىك ورتالىعىنا اينالدىرۋ.

نۇرزات توعجان

Abai.kz