استانا. 10 قىرقۇيەك. قازتاگ – قر اۋىل شارۋاشىلىق مينيسترلىگىنىڭ (اشم) ناقتىلانعان مالىمەتتەرىنە سايكەس، پاۆلودار وبلىسىنداعى ءورت وقيعالارىندا قازا بولعانداردىڭ سانى 7 ادامدى قۇراپ وتىر، دەپ ءمالىم ەتتى اشم ورمان جانە اڭشىلىق شارۋاشىلىعى كوميتەتىنىڭ توراعاسى ەرلان نىسانباەۆ.

«بۇگىن تاڭەرتەڭ كۇيىك جارالارىن العان نۇرباەۆتار وتباسىنىڭ اناسى اۋرۋحانادا قازا بولعانى حابارلاندى»، - دەدى ە. نىسانباەۆ جۇما كۇنى ءباسپاسوز ءماسليحاتىندا.

سونداي-اق، ول وتكەن بەيسەنبىدە نۇرباەۆتاردىڭ اكەسىنىڭ جانىپ كەتكەن دەنەسى تابىلعانىن ايتتى.

«وسىمەن، قازا بولعانداردىڭ سانى قازىر 7 ادامدى قۇراپ وتىر»،-دەدى كوميتەت توراعاسى.

ەسكە سالا كەتەيىك، ءورت كەزىندە 4 ادامنان تۇراتىن وتباسى زارداپ شەكتى. نۇرباەۆتار ءورت ورنىنان اۆتوكولىككە ءمىنىپ، كەتۋگە ارەكەتتەنگەن، اكەسى مەن ەكى ۇلى العان كۇيىك جارالارىنان كوز جۇمدى. بالالاردىڭ اناسى اۋىر جاعدايدا بولعان.

بۇرىن حابارلانعانداي، پاۆلودار وبلىسىندا تىيىلماي وتىرعان ورمان ورتتەرىندە قازا بولعانداردىڭ اراسىندا «ەرتىس ورمانى» مەملەكەتتىك تابيعي رەزەرۆاتىنىڭ بەسقاراعاي فيليالىنىڭ قىزمەتكەرلەرى، ونىڭ بىرەۋى بەسقاراعاي فيليالىنىڭ ديرەكتورى ەرجان بايكەتاەۆ، ەكىنشىسى تراكتورشى ن. سامۋس جانە مەملەكەتتىك ينسپەكتور ە. مولعاجداروۆ.

سونداي-اق، بەسقاراعاي فيليالىنىڭ كوكجال ورمان شارۋاشىلىعىنداعى ءورتتى ءسوندىرۋ كەزىندە 46 جانە 59 جاستاعى ەكى ءورت ءسوندىرۋشى قازا بولدى.

تجم باسشىسى ۆلاديمير بوجكو مالىمدەگەندەي، شالداي قاراعاي ورمانىنداعى ءورتتى ءسوندىرۋ كەزىندە قازا بولعان ورمانشىلار ماراپاتتالادى. ولاردىڭ وتباسىلارىنا ماتەريالدىق كومەك كورسەتىلەدى.