وڭتۇستىك قازاقستان وبلىسى، قازىعۇرت اۋدانىنداعى «امانگەلدى» سەرىكتەستىگى 17 جىلدان بەرى جەمىس-جيدەك، ءداندى داقىل ءوسىرىپ، ونى وڭدەۋمەن اينالىساتىن وبلىس كولەمىندەگى ءىرى اگروقۇرىلىم. 150 گەكتار القاپقا ءجۇزىم باعى وسىدان 9 جىل بۇرىن وتىرعىزىلعان، ودان بولەك الما، قارا ورىك، شابدالى، المۇرت وسىرەتىن سەرىكتەستىكتىڭ جەمىس باعى بۇگىندە 550 گەكتارعا جەتكەن. 

«جىلىنا ءجۇزىمنىڭ ءبىر گەكتارىنان كەمىندە 15 توننا، المانىڭ ءبىر گەكتارىنان 30 توننا ءونىم جينايمىز. كەلەسى جىلى بۇدان دا كوپ بولادى دەپ ويلايمىز. جەمىستىڭ ونىمدىلىگىن 25 تونناعا جەتكىزەمىز دەپ جوسپارلاپ وتىرمىز» دەيدى سەرىكتەستىكتىڭ باس اگرونومى بيرول كارابۋلۋت.

بەس جىل بۇرىن سەرىكتەستىك تامشىلاتىپ سۋعارۋ ادىسىنە كوشكەن. ينتەنسيۆتى جەمىس باعىنىڭ كولەمى 190 گا. جاڭا تەحنولوگيا سۋدى ۇنەمدەپ قانا قويماي، جەمىستى ۇسىكتەن، داۋىلدان، زيانكەستەردەن ساقتايدى. 

«جەمىس اعاشتارىنا تامشىلاتىپ سۋعارۋ ءادىسىن قولدانامىز، سۋمەن بىرگە تۇتىكشەلەر ارقىلى جەمىسكە قاجەتتى مينەرالداردى جىبەرەمىز. كەلەسى جىلى باقتىڭ توبەسىن ارنايى قورعانىش تورمەن جاپپاقپىز. مۇنىڭ ءبارى ونىمدىلىكتى بىرنەشە ەسەگە ارتتىرۋعا سەپتىگىن تيگىزەدى»، دەيدى باس اگرونوم.

جالپى قۇنى جارتى ميلليون تەڭگەلىك جوبانى مەملەكەتتىك كومپانيا قارجىلاندىرعان. سونداي-اق سەرىكتەستىك 2000 توننا جەمىس ساقتايتىن قويمانىڭ قۇرىلىسىنا قاجەت 195 ميلليون تەڭگەنى دە ءتيىمدى ليزينگپەن مەملەكەتتەن العان. ينۆەستيتسيالىق جوبا جەمىستەردىڭ ساقتالۋ ماسەلەسىن تولىق شەشكەن. 

اگرونوم بالابەك شۇلباەۆتىڭ ايتۋىنشا، 2015 جىلى سالىنعان قويمانىڭ پايداس وتە زور. مۇندا ءجۇزىم، قارا ورىك شابدالى سەكىلدى جەمىستەر ەكى-ءۇش ايعا دەيىن ساقتالادى، ال الما ءتىپتى ءبىر جىلعا دەيىن سقتالادى. 

جەمىس-جيدەك ساقتاۋ كامەراسىنا تۇسكەن سوڭ ونداعى وتتەگى سورىپ الىنىپ، ارنايى گاز جىبەرىلەدى. ناتيجەسىندە ءونىم ۇزاق ۋاقىت بالعىن كۇيىندە ساقتالادى. ونىمدەر قازاقستاننان بولەك رەسەيگە ساتىلادى. جىل ون ەكى اي بويى مۇندا جەمىس بارىن بىلەتىندەر ۇنەمى حابارلاسىپ، ءونىمدى ساتىپ الادى، ياعني سۇرانىس وتە جوعارى. 

بۇگىندە سەرىكتەستىك 150 ادامعا تۇراقتى جۇمىس بەرىپ وتىر. بولاشاقتا باۋ-باقشا كولەمىن جانە جۇمىسشىلار سانىن ۇلعايتۋ قاراستىرىلىپ وتىر.

Abai.kz