قاراماي قىراۋ شالدى بوز باسىما،
قويمايتىن كوڭىل شايىپ،قوزباسىڭا،-
تۇنشىعىپ ويانامىن كەي تۇندەرى،
توگىلگەن قالىڭ قازاق كوز جاسىنا.

مۇندا ءبىر گاپ بار بىلەم ءتۇس دەگەنمەن،
تاستا دا داق قالادى تىسدەگەننەن.
قىس تا ۇزاق جاتىپ الدى جامباسى مۇز،
كەتپەيتىن ادامدايىن كۇشتەگەنمەن.

شارپىسقان وت پەن وقتىڭ اراسىندا،
قارالى قام-جاي مەڭدەپ باراسىڭ با؟
وقالى انا ادامنىڭ،قازاقتارعا،
سۇمدىق ءبىر سۋىقتىق بار قاراسىندا.

يىمەي جاستان توككەن تۇر-اۋ كونىڭ،
تاعدىردىڭ سەزىنە مە، قىراۋ دەمىن؟،-
جاڭاوزەن، شەرلى جانىڭ سياقتانىپ،
جۇرەگىم ءجيى قاعىپ تۇر-اۋ مەنىڭ.

قۇم مىنەز، قۋ تىرلىكتى، جايلاپ وپپا،
تۇرعاندا، تۇساۋعا ونى ايلا جوق پا؟.
تالقى ەمەس، تاعدىردا ەمەس، ادام قولى،
جىبەردى بوزبالانى بايلاپ وققا.

ۇقساعان وكسىك قىستى ءور تەڭىزگە،
جان جەگەن جوقتاۋ كۇيىن شەرتەمىز بە؟
سانام دا سالقىن تارتتى، سارتاپتانىپ،
ۇرىنعان جاپىراقتاي ەرتە كۇزگە.

سىڭسيدى جەل وتىندە قياق تالىپ،
جايىنا كەي ءبىر جاندا ۇيات قالىپ.
جانىمدى جەپ بىتەتىن شىعار قايعى،
قالىعا تۇسكەن كۇيە سياقتانىپ.

امانحان ءالىم

Facebook-تەگى پاراقشاسىنان