قازاقستان رەسپۋبليكاسىنىڭ ىشكى ىستەر ءمينيسترى,

پوليتسيا گەنەرال-لەيتەنانتى 

ق. ن. قاسىموۆقا

قۇرمەتتى قالمۇحانبەت نۇرمۇحانبەتۇلى!

ءبىز قحر-نان شقو بورودۋليحا اۋدانىنا كوشىپ كەلىپ، تۇراقتى تىركەۋگە تۇرۋعا قۇجات جيدىق. سوتتىلىعىمىزدىڭ بار نە جوقتىعى تۋرالى انىقتامانى راستاتۋ ءۇشىن قر-داعى قىتاي ەلشىلىگىنەن راستاتۋىمىز كەرەك ەكەن. مىنە، ەكى وتباسىنىڭ سوتتىلىق تۋرالى انىقتاماسىن راستاتقالى استاناعا كەلگەنىمە ەكى اپتا بولدى، ءالى بىتكەن جوق. وتكىزگەن قۇجاتتى  قىتاي ەلشىلىگى التى كۇن ۇستادى. ولار ماعان سوتتالمادى دەگەن انىقتاما بەرگەن جوق، تۇراقتى تۇرۋىنا بولادى دەگەن رۇقسات قاعاز بەردى. ەندى ول رۇقساتتى قر سىرتقى ىستەر مينيسترلىگى راستاۋ كەرەك ەكەن. وتكىزىپ ەم، مىنە ءتورت كۇن بولدى ءالى شىققان جوق. ءسىم ءار كىسىنىڭ قۇجاتىن راستاۋ ءۇشىن 8 مىڭ تەڭگەدەن اقشا الدى. ەستۋىمشە ءسىم ول قۇجاتتى قىتاي ەلشىلىگىنە جىبەرىپ، تاعى انىقتايدى ەكەن. قۇجاتىمىزدىڭ قاشان شىعارى بەلگىسىز، استانانىڭ سۋىعىندا ءبۇرىسىپ ءجۇرمىن.

ال، وسى قۇجاتپەن تۇراقتى تىركەۋگە تۇرىپ، ازاماتتىعىمىز شىقسا، قىتاي تولقۇجاتىن قىتاي ەلشىلىگىنە وتكىزۋىمىز كەرەك ەكەن.  ول ءۇشىن تاعى دا استاناعا، نە الماتىعا بارۋىمىز كەرەك. ءبىز عانا ەمەس، قىتايدان قازاقستانعا كوشىپ كەلىپ، ازاماتتىق الام دەگەن ءار وتباسى، قاي وبلىسقا كوشىپ كەلۋىنە قاراماستان، وسى جولدى باسىپ ءوتۋى ءتيىس. ويلاڭىزشى، بۇل – ازاپ قوي!

ءوزىڭىز جاقسى بىلەسىز، قىتاي ەلى سوتتالعان ازاماتقا تولقۇجات بەرمەيدى. سول ءۇشىن سىزدەن وسى ماسەلەنى شەشۋدى، ءبىزدى بۇل ازاپتان قۇتقارۋىڭىزدى سۇرايمىن.

بىلەتىندەردىڭ ايتۋىنشا، «شەتەلدىكتەرگە جانە ازاماتتىعى جوق ادامدارعا قازاقستان رەسپۋبليكاسىندا ۋاقىتشا جانە تۇراقتى تۇرۋعا رۇقساتتار بەرۋ قاعيداتى» دەگەن قازاقستان رەسپۋبليكاسىنىڭ ىشكى ىستەر مينيسترلىگىنىڭ №992 بۇيرىعىنىڭ  10 تارماعىنىڭ 7)-تارماقشاسىنا تولىقتىرۋ ەنگىزىپ، «ەگەر حالىقارالىق شارتتا وزگەشە كوزدەلمەسە، قىتاي حالىق رەسپۋبليكاسىنان كەلەتىن ەتنيكالىق قازاقتاردى قوسپاعاندا;» دەگەن ءبىر اۋىز ەسكەرتپە قوستىرسا، بۇل ماسەلە شەشىلەدى ەكەن.

سوندا، قىتايدان كەلگەن قانداستارىڭىز قىتاي تولقۇجاتىن تاپسىرۋ ءۇشىن استانا مەن الماتىعى ءبىر-اق مارتە كەلەتىن بولادى.

ەكى وتباسىنىڭ اتىنان قارقىن توقتارعالي

Abai.kz