جاڭا عانا ءبىر قۇدايدىڭ قۇلى، پايعامباردىڭ ۇمبەتى ۇيالى تەلەفونىما حابارلاستى. «وسىنداي دا وسىنداي، تاڭعا تاياۋ ءتۇس كوردىم، سونى ساعان جورىتايىن دەپ ەدىم» دەدى. ايتىڭىز دەدىم. «ايتسام، ءبىر جەڭىل ماشينەدە كەلە جاتىرمىن. شوپىردىڭ قاسىنداعى الدىڭعى ورىندا اتاقتى اقىن، مارقۇم قادىر مىرزا ءالى وتىر دا، مەن ارت جاعىندا وتىرمىن. ءبىر كەزدە قادىر اقىننىڭ اۋزىنان، جىلقىنىڭ قىلى سەكىلدى، ءبىر ۇز-ى-ىن قىل سۋىرىپ جاتىرمىن، ءوزى سۇمدىق ۇزىن ەكەن، تاۋسىلار ەمەس، ءبىر كەزدە ارت جاعىنا لاس قوقىس-قىبىر، ءجۇن-جۇرقا ىلەسكەن ەكەن، ءتۇپ-كوتەرە ءبىر-اق سۋىرىپ الدىم. سول ەكەن، قادىر اقىن كوزدەن عايىپ بولىپ كەتتى. ءبىر تالدىڭ بۇتاعىندا مەن سۋىرىپ العانعا ۇقساس قىل-قىبىر ىلىنگەن ەكەن، جاقسى بولدى عوي، جەل ۇشىرىپ اكەتەتىن بولدى دەپ، قولىمداعى قىل-قىبىردى سونىڭ ۇستىنە ءىلىپ جاتىرمىن. سول كەزدە ويانىپ كەتتىم» دەدى الگى قۇدايدىڭ قۇلى. 
 قاپەلىمدە نە دەپ جورىرىمدى بىلمەي، ويىم-سان-ساققا كەتتى. «قادىر اقىن اتەيست بولدى ما، جوق، قۇدايعا سەنۋشى مە ەدى؟» دەيدى ءالى تانىس پەندەم قاراپ تۇرماي. «ول كىسى دىنگە جاقىن بولمادى-اۋ دەيمىن، جۇما نامازعا بارىپتى، اۋليە-امبيە ارالاپتى دەگەنىن ەستىمەپپىن. بىراق تەگىن ادام ەمەس قوي، قازاقتىڭ ۇلكەن اقىنى، قاسيەتتى كىسى، ولەڭ قونعان ادام، ول دا ءبىر اۋليە دەسەڭىز بولادى» دەدىم. 
«اۋليە دەيسىڭ بە، اپىر-اي، مىناۋ ءبىر قادىر اقىننىڭ ماعان ايان بەرگەن ءتۇسى بولدى-اۋ. جاڭا عانا سەنىڭ الدىڭدا ءتۇسىمدى تۋعان قارىنداسىما ايتقانىمدا، ول جاقسىعا جورىپ، «جارىقتىق قادىر اقىننىڭ ارۋاعىنا ارناپ قۇران وقىپ جىبەرىڭىز، ءومىر بويى زاماننىڭ، قوعامنىڭ مۇڭ-شەرىن جىرمەن قوزعاپ، ىشتەي كۇرەسۋمەن وتكەن ادام عوي، ول كىسى – زامان، ال ءسىز سول زاماننىڭ قىل-قوقىسىن سۋىرىپ الىپ وتىرسىز، ەزىلگەن ەلدىڭ باسىنا تۇسكەن اۋىرتپالىق وسىمەن بىتەدى ەكەن دەگەنى» دەدى. 
«وندا قارىنداسىڭىز اۋليە ەكەن، ءوزىڭىز دە تەگىن ادام ەمەسسىز عوي» دەدىم تولقىپ تۇرعان ءتۇستىڭ ارناسىنا تۇسكەنىنە قۋانىپ. سول كەزدە ەسىمە اۋليە ءماشھۇر ءجۇسىپتىڭ تۇسە كەتكەنى. حاق اۋليە ماشەكەڭ ايتقان ەكەن دەگەن ءسوز بار: «قازاق جەتپىس جىل قۇدايسىز قوعامدا ءومىر سۇرەدى، ودان سوڭ ەلدى 25 جىل ۇرى-قارىلار بىلىقتىرادى، ودان سوڭ قازاققا قوي ۇستىنە بوزتورعاي ۇيالاعان زامان تۋادى» دەگەن. جەتپىس جىلىمىز اتەيستىك كومپارتيانىڭ زامانى عوي، ال ودان كەيىنگى 25 جىلدا پرەمەر-مينيستردەن باستاپ، وبلاكىمدەرى، مينيسترلەرى، گەنەرالدارى بار، نەبىر اتاعىنان ات ۇركەتىن شەندىلەردىڭ شەتىنەن سوتتالىپ جاتقانىن كورىپ وتىرسىز، ۇرى-قارىنىڭ زامانى دەگەنى سول ەمەس پە اۋليەنىڭ؟! ينشاللا، ماشەكەڭ ايتقانداي، قازاققا قوي ۇستىنە بوزتورعاي ۇيالاعان زامان كەلەدى ەكەن. قادىر اقىن، شىنىمەن دە، ءسىز ارقىلى ايان بەرىپ تۇر دەدىم. ء«اۋميىن» دەپ، ول كىسى قاتتى قۋانىپ قالدى. «جاقسى ءتۇس – جارىم ىرىس» دەپ، مەن بۇل جاقسىعا جورىلعان ءتۇستى فب ارقىلى ەلگە جەتكىزگەندى ءجون كوردىم.

تورەعالي تاشەنوۆتىڭ FB پاراقشاسىنان الىندى